احمد عمی سارسیلماز مبارز
بیز کنددن تبریزه کؤچن چاغ، حؤکماوارین چئوره سی باغ – باغاتدا یئنی محله لر، تزه کنددن گلنلرله یارانیردی. اوْنلاردان بیری ده دیزه محله سیدیر. دیزه نین گۆن باتانیندا یئنی کۆچه سالینیردی. اوْ زامان آدی بللی اوْلمایان کۆچه نین آدی آبادلاشاندان سوْنرا کوی مهر یا مهر کۆیۆ آدلاندی. بیزیم ائو اۆچۆنجۆ ایکی اوْتاق بیر دهلیزیدی کی سالینیردی.
مهر کۆیوْنۆن یارانماسین، گلیشمه سین، چیچکلنمه سین، سو، اؽشؽق، آسفالت و بیر – بیر ائولرین تیکیلمه سین گؤزۆمۆزله گؤرۆردۆک.
مهر کۆیۆنۆن یۆزده دوْخسانی قاراداغدان گلمه ایدیلر. بوْنلاردان بیری ده احمد عمی دی.
احمد عمینین گئیینیشی، دانیشیغی و داورانیشی دئمک اولاردی هامیدان سئچیلردی.
ایکینجی ائولنمه سیندن ایکی قؽزؽ وارایدی. قؽزلارؽن آدی مؤحترم له زیور ایدی. یوْلداشینین آدی من بیلن زینییت ایدی.
احمد عمی اوزون بالدون گئیردی. شابقا بؤرک قوْیاردی. چوْخ سایغیلی بیر اینسان و قایغی کش آتایدی.
دئییردیلر برق لامعین حوْولو کرخاناسیندا گؤزتچی ایشلردی.
آمما یاشی یوْخاری اوْلماغینا باخمایاراق سانکی بیر اوْردو کوْماندانیدی.
اوزون بالدون، شابقا بۆرک، دیک یئریش اوْنو باجاریقلی اوْردو باشچیسی کیمین گؤسترردی.
چوْخ واختلار دیل – دوداغی آلتیندا بیر سؤزلر دانیشاردی. سانکی ماهنی اوْخویاردی، بلکه ده مارش اوْخویاردی. بیر گۆن آتامدان سوْردوم؛ آتا! احمد عمی نی تانیییرسانمی؟ سؤیله دی؛ نئجه اوْغول؟ سؤیله دیم؛ چوْخ لاریندان سئچیلیر. گئیینیشی، یئریشی، دوْروشوغو، داورانیشی…
آتا! احمد عمی بو یاشدا نییه ایکی بالاجا قؽزؽ واردی؟ یوْلداشی اؤزۆنه گؤره چوْخ جاواندی.
آتام دئدی؛ احمد عمی نی چوْخدان تانیرام، قوْنشو کندلیمیزدی. احمد عمی امیر علی بابانلا بیرگه فیرقه فدایی لریندن‌ایمیش.
احمد عمی نین آز- ماز ساوادی بیرده باجاریغی اوْنو یۆکسلدیب فیرقه کوْماندانی ائتمیشدی.
اگنینده کی بالدون اوْ زاماندان قالمادیر. بلکه شابقا بۆرکده ائله اوْ زامانین کی اولسون.
خیردا یاشلی اوْلماغیما باخمایاراق احمد عمی یه یاخینلاشیب، قؽزؽ مؤحترمله دوْستلاشیب ائولرینه گئت، گل ائدردیم. ائشیکده قوْرو داورانماغینا باخمایاراق تام اؤرگی تۆنۆک، حلیم و یوْموشاق اینسان ایدی.
بیر ایکی تاقجادا، فدایی شکیللری گؤزه دَییردی. ان باشدا دورانین آدین سوْردوم. دئدی؛ بالا! اوْ میر جعفر آغا پیشه‌وریدی.
سوْردوم؛ پیشه وری کیم ایدی؟ درینه باتمیش گؤزلری یاشارارکن سؤیله دی: « منیم رهبریم، منیم باشجیم.»
فیرقه نین مارشین اوْخوماغا باشلادی. یوْلداشی اؤزۆن یئتیریب دئدی؛ کیشی یئنه باشلادین ها؟!
اوْ قدر بوْنو اوْخوموسان کی داها باش – بئینیمیز گئدیبدیر.
هر نه دن احمد عمی نین کاسیبلیغی و یوْخسوللوغو گؤزه ده ییردی.
دئمک یوْخسوللوق ائوده گؤردۆکلریمین هامی سین آلتینا آلیب، چوْلقالامیشدی.
اوْنسوزدا قؽزلارؽن اۆست – باشی اوْنو گؤستریردی. آمما احمد عمی سارسیلماز و ایراده‌لی داوراناردی. سوْنرالار گؤستردی کی دوْغرودان سارسیلماز اینسان‌ایدی.
اللی یئددی انقلابی اوْلاندا احمد عمی قاییدیب، کؤچۆب کنده گئتدی، عؤمرۆنۆن سوْنونا دک اوْردا یاشادی.
من بیلن انقلابچیلارین قوْرخوسوندان جانین و بالالارین گؤتۆرۆب کنده قاچدؽ. اوْچاغلار بیرینه پاپیش دۆزه لتمک چتین ایش دئییلدی.
احمد عمی نین قؽزلارؽ آتالاری یاشدا کیشیلرله ائولندیلر. بیر حالداکی چوْخ گؤزل و گؤیچک قؽزؽدؽلار.
احمد عمی اوْلدو گئتدی. آمما کیمسه یه دئمه دی باشینا نه لر گلمیش؟
من بیلن شاهین وْور- توْتونا دۆشمۆشدۆ. آنجاق سیرلرین اؤزۆنله توْرپاغا آپاردی. تانری رحمتینده اوْلسونلار. آمین یا رب العالمین.
مهندس رحیم عباسی