بؤیرک ساتیرام ، آی بؤیرک آلان!!!
چوخداندیر، دیزلریم سؤزۆمه باخمادان خیاوانلاردا آیاق کؤرپۆلریندن کئچمه میشدیم.
دۆنن نامرد اوْغلو تاکسی سۆرۆجۆسۆ راهنمایی قاباغی خیاوانین بی آر تی طرفینده یوْخ، راهنمایی طرفینده دایاندی؛ من یازیق ناچار قالیب، آغیر پیلله کانی دیرمانیب اۆسته قالخدیم.
نفسیمی درمه دن گؤزۆم بیر بیلدیری‌یه دۆشدۆ. « بؤیرک ساتیرام، تیلفون نۆمره سی…»
ایکی ، اۆچ آددیم یئنه « بؤیرک ساتیرام. جیب تیلفونو…»
اوزون سؤزۆن قیساسی، اللی مئتیرکؤرپۆده بئش دنه بؤیرک ساتیرام بیلدیری‌سی گؤردۆم.
کؤرپۆنۆن سوْنوْندا دایانیب، دوردوم. چۆن باشیمدان آغری قالخمیشدی. داها پیلله لری ائنمه یه حالیم یوْخ ایدی.
بیر نئچه دیقه سوْنرا اؤزۆمۆ تاپیب بارماقلیقلاردان توتا – توتا آشاغی ائندیم. بی آر تی ده نیصف راها دک ایچیمده آل-وئر ائدیردیم.
چتینلیکلر گؤر نه قدر آشیب – داشیبدیر کی، بیر کیمسه جانیندان کئچیر. اوْنو هله ساتماغادا ال آتیر؟!
اللریندن، باشیندان ساده جه امک چکیب قازانیب چتینلیکلرین چؤزمه دن جانین ساتماقلا اوْنلاری حل ائدیر!
نه بیلیم؟ ایللر اؤنجه کیرمان‌شاها یوْلوم دۆشمۆشدۆ. اوْردا زیبیل قابلارین آختارماسین دا گؤرۆب ماراقلانمیشدیم. بونلار نه ایش گؤرۆرلر؟ سوروسونا جاواب آلمیشدیم. اوْردا دئدیم؛ یوْخ بئلنچی ایشلر بیزیم شهرده اولماز، چۆن تبریز دیلنچی سیز شهردی، بیرده تبریزده الی جیبینه گئدن ازل گۆندن چوْخ اوْلوبدور. دئمه بوْ ایش یوْخسوللوغون باشلانیشی ایمیش! بئش ایل سوْنرا تبریز ده اوْ ایشه قوشولدو.
بیر حالداکی بیر گۆن ایکی کیمسه نی زیبیل قابی اۆسته داوا – دارتیشماسین گؤردۆم.
بوْنلاری گؤرن وارمی؟ فیکرینده اوْلان وارمی؟ یاشامین دَیَرین بیلن وارمی؟ اصلن شرفی، کیشیلیگی، اینسانلیغی تانییان وارمی؟
مهندس رحیم عباسی (اوجاق)
