جو بایدن، روسیه نین اوکراینا حربی تجاوزون یاخیندان قیناسین دییه، دونن لهستانا سفر ائتمیشدی. او بو دفعه بیر ملائکه قیلیغینا گیریب، اوکراینالی ساواش قاچقینلاریلا یاخیندان همدردلیک ائدیب، روسیه قوشونون یاراتدیغی جنایتلری بیر بیر ساییب قیناماق فیگورولاریلا چیخیش ائتدی.
جو بایدن پوتینی قصاب لقب ایله خطاب ائدیب اونون هر نه تئزراق دئوریلیب حکومتدن دوشمه سین ایسته دی. البته پوتینی، یاراتدیغی جنایتلره گوره قیناماق، اوکراینادا ساواش قاچقینلارینین حالینا، گوز یاشی توکوب اوره ک یاندیرماق، ظاهری نمایش ده اولسا، دیپلماسی عالمینده گوزله نیلن بیر داورانیشدی. بو سوزلرین ایچه ریی یالانلارلا دولو اولسادا، کهنه تکرارلاردان باشقا هئچ بیر اهمیتلری یوخدو. اما بایدنین باریش و اینسان سئور نمایشلرینین تام اورتاسیندا بیر “تپه گوز” گورونوردی، آغزیندان قان آخیردی. بو اینسان سئور نمایشلرین آرخاسیندا واقعی بیر چهره وار، اودا دیل دوداغیندان قان سوزن “تپه گوزدو”. بایدن اصلی سوزو اونون دیل ایله دئدی. “بو جنگ چوخ اوزون سوره جک و بوتون دونیا اوزون سوره بیر جنگه، اوزون حاضیرلامالیدی، اوکراین ساواشی بو جنگین بیر کیچیک پارچاسیدی”.
بایدنین لهستان گوروشونون جوهری و اوزه یی همان بو “تپه گوزون” سوزودو. بقیه سی دونیانی یاهالتماق اوچون شوون بازلیقدی.
دونیانین دورد گوشه سینده اوز وئره ن اولایلاری بیربیرایله توتوشدوراندا، نظره بئله گلیرکی دوغورداندا اوکراین ساواشی، دونیا یاییملی بویوک بیر ساواشجیلیین باشلانجیغی دیر. بو گونلر، بوسنی ده یاشایان تورک مسلمانلارین علیه ینه دسیسه لر قورولماقدادی. یعنی اروپانین تام اورتاسیندا بیر تازا جنگین نشانه لری گورونور. البته، اوردا بیر ساواش اوز وئررسه، روسیه صربلره دستک وئره جک. بئله بیر حالدا تورکیه بوسناق لاری یالنیز قویا بیلمز. اولماسین بایدنین تپه گوزو روسلارلا تورکلری بوسنی و هرزگوین ده اوز اوزه ساواشماغا ایته لییر؟!.
البته بئله بیر ساواش اوز وئررسه، پانبیق خرمنینه اود دوشن تکین، بوتون اوروپانی اود بورویه ر. بو همان گیزلین آرزودو کی آفای بایدنین باریش سئور سوزلرینین آرخاسیندا گیزله نیر. بایدنین لهستان داکی سوزلری بو گیزلین آرزونو بایدیریب، افشا ائتدی.
اولو تانریندان بوتون اینسانلیق دونیاسینا باریش و خوشلوق آرزو ائدیرم.
حسن ارک
