حقارت گیریشیمی، نیفرت سؤیله‌می، و اخلاقسیزلیق، هجو یا طنز دئییلدیر! بیزیم اینانجیمیزدا، یاسا و تؤره‌لریمیزده: «حاقسیزلیق و یانلیش‌لیق‌لاری تنقید ائتمک (الَشدیرمک) مشروع، آما شخص‌لری، طیف‌‌لری، خالق‌لاری، اینانج‌لاری و میللی معنوی دَیَرلری کوچومسه‌مک (تحقیر و حقارت ائتمک) و استهزاء یاساق (قدغن) ائدیلمیشدیر.»
فاشیست و شووونیست ذهنیت‌لی کیمسه‌لرین، گیزلی و کیرلی نییت‌لرینی، عادت عنعنه‌میزه، مدنییت‌یمیزه، اینانج‌لاریمیزا و میللتیمیزه قارشی آلایچی و آشاغی‌لاییجی (مسخره‌آمیز و تحقیرآمیز) ائیلم‌لرینی (عمل‌لرینی)، اولو خالقیمیزا و یئنی نسلیمیزه پئسوکولوژیک و روحی ضره‌ر وئرَن قوللوق(خدمت) گؤرونوملو ایش‌لرینی، دئشیفره ائدیب توپلومون دیققتینی چکمه‌یه چالیشماق بیزیم بوینوموزون بورجو و اینسانلیغیمیزین گرَ‌یی‌دیر.
بیر حقوقا اویغونلوق نَدَنی اولاراق هجوین نَی‌لییی، حاققی و سینیرلاری بللی‌دیر.
بیر صنعت تورو دئییل، بیر ایفاده فورمو اولان هجو آراجیلیغی ایله اینسان قوصورلاری، یانلیش‌لیق‌لار، حاقسیزلیق‌لار، زوراکی‌لیق‌لار، سیاست قونو ائدیلیر.
تورک میزاح اوستالاریندان “ریفعت ییلقاز” میزاح حاققیندا بئله سؤیله‌میشدیر: «میزاح دئیه بیر یازی صنعت تورو یوخدور. یازی صنعت تورو روماندیر، اؤیکودور، کؤشه یازی‌لاریدیر (پوبلیسیستیک یازی‌لار)، آنی‌لاردیر. حتتا مکتوب بئله بیر یازی تورودور ده، میزاح بیر یازی تورو دئییلدیر. تور اولسایدی تئکنیکی اولوردو. میزاح تور دئییل، بیچیم‌دیر. میزاجیمیزدان گلن بیر چاشنی‌دیر. یازی تورلری باجاریق ایستر، تئکنیک ایستر، بونلاری ساغلادین می باجاری تامدیر. میزاح نه ایستئر؟! میزاح اینسانین میزاجیندان گلدیغی اوچون بیلگی دئییلدیر. تئکنیک ده دئییلدیر.»
بابک نهرینین لوغا و مستهجن لوده‌لییینه گلینجه، بو ایشه طنز، میزاح، هجو، فکاهی و هئچ بیر صنعت و غیری-صنعت تورو آدی وئرمک اولماز. بو لوغالیغی، طنز، فکاهی، لطیفه و حتتا هجو آدی ایله پرده‌له‌مک ایسه داها بیر حقارت، خیانت و اهانت‌دیر.
سؤزو اوزاتماماق اوچون من طنز، هجو، ایرونی، مزاح، قارا مزاح، فاتالیزم، گولمه‌جه(جوک)، آلای ائتمه، ظرَفت، بذله، پارودی، ساتاشما، آتماجا، ائسپیری، سؤیلنجه، ایلنجه، داشلاما، ایینه‌لمه و … نیته‌لیک‌لرینی و اؤزه‌للیک‌لرینی بورادا آچیقلامیرام. بو ایسته‌نیلسه، بونو دا، ان کیچیک دئتال‌لاری (خیردالیق‌لاری)، مصداق‌لاری، و فرق‌لری ایله آنلادارام.
اویسا بابک نهرینین میللی رسانه‌ده، مقدس قوپوز آلَتینی و اوزان (آشیق) صنعتینی هم ده رقص‌لریمیزی بیلدییینیز بیچیمده آلچالتما چیخیشی طنز اویان‌دا دورسون، هجو ده دئییلدیر بئله.
بو بیر حقارت گیریشیمی، نیفرت سؤیله‌می، خیانت مصداقی، آچیق اهانت، استهزاء و اخلاقسیزلیق‌دیر.
بو سوچ تکجه بابک نهرین`ی ده قاپساماز؛ بو ایشی یؤنه‌تن بوتون عوامیل او جومله‌دن، فارس شووونیزمی‌‌نین تریبوناسینا چئوریلن ایران تئلویزیاسی دا سوروملودور.
بیزه گلدیمده ایسه، کیچیک آداملاری بؤیوتمه‌میزین سانجیسینی بؤیله چکیریک البت. کتابی دده قورقوددا اوغوزلارا بلا چیخان تپه‌گؤز کیمی. بیزیم ده بوشونا بؤیوتدویوموز تپه گؤزلر آز اولمامیشدیر. بختیار واهاب‌زاده دئمیشکن:
«آلچاغی نه قدر بؤیوتسن ده سن
یئری گلن کیمی آلچالاجاقدیر»
آتالار دئمیشی:
هله بو بیر یانا دورسون، بیر خالق طرفیندن، اوچ – بئش نفرین بیر یئره ییغیلیب، بو آلچاق ایشی باغیشلاماسی و بیانیه وئره‌رک؛ بو اخلاقسیزلیغی قینایان حاقلی خالقی «سو استفاده‌چی»، «آرا قاریشدیریجی» و … سایماسی، هله او آداملارین آغزینین بئله حددی دئییل‌کی هئچ، آچیق بیر خیانت، آیمازلیق و جاهیل‌لیک‌دیر.
بونو “برتولت برشت”ین دیلینجه دئسک: «گئرچه‌یی گؤرمه‌ین کوردور، اونو گؤروب دانان و یا گؤرمزلیکدن گلن ایسه آخماق و تاماهکاردیر.»
بو بیر شخصه اهانت دئییل‌کی آخی!.. تورک دونیاسی‌نین، عموم تورک خالقی‌نین مقدس قوپوز آلَتی و اوزان (آشیق) صنعتینه و میللی رقصینه بیرحؤرمتسیزلیک، کوچومسه‌مه (حقارت) و اهانت‌دیر.
او- بئش حددینی بیلمز چیخیب دا، بیر اداری اورقانین مانقورت مسئولو قورماجیلیغی ایله بو سوچو باغیشلاماسی، اوسته گل حاقلی تنقیدچی‌لری قیناماسی، (سوچلو ایله حاقلی‌نین یئرینی ده‌ییشدیرمه‌سی) جاهیل‌لییین تا اؤزو، ساتیلمیش‌لیغین اؤزَل میصداقی، حددینی بیلمه‌مزلییین نمونه‌سی، خیانتین باریز نشانه‌سی، بؤیوک بیر خالقا و مقدس بیر صنعته حؤرمت‌سیزلیک‌دیر.
نه یازیق کی، تورک‌لره قارشی همیشه طنز، هجو، فکاهی و… آدی آلتیندا پرده‌له‌نن تحقیر، توهین، اهانت و آشاغی‌لاییجی‌لیق، بیزیم بو توم اینسان حاقلارینی چئینه‌ین اؤلکه‌ده اوزون ایللر بویونجا، اؤزه‌للیکله جزا حوقوقو بویوتوندا تنقید حاققی قاپسامیندا اله آلینمیش و اونا حاقق قازاندیرماق ایسته‌نیلمیشدیر.
آنجاق تورک یازارلاری‌نین و آیدین‌لارینین، ژورنالیست حقوقو چرچیوه‌سینده، گئرچک طنز و تنقید نیته‌لییی داشی‌یان نیطق و یازی‌لاری، همیشه؛ آیریمجی « تجزیه‌طلبی» «اقدام علیه امنیت میللی»، «نشر اکاذب» و … کیمی ساختا ائتیکئت‌لر (برچسب)لر آلتیندا آلقی‌لاناراق اوزون حبس‌لر و جزالارلا نیته‌لنمیشدیر.
بو باغلامدا اؤنملی بیر خصوص دا قوتسال دَ‌یَرلره یؤنه‌لیک یاپیلان هجودیر. هجوین حوقوقا اویغونلوق نَدنی اولاراق گؤرولمه‌سی؛ آیریمجی، نیفرت و حقارت سؤیله‌می ایله نیفرت سوچو قاپسامیندا و اخلاقی اولاراق اوتانج وئریجی قابا کومبیناسیونلارلا (اخلاقسیز و خشن ترکیب‌لرله) یاپیلان و سوموت نیسبت ائحتوا ائدن هجوی توخونولماز قیلمامالی‌دیر.
بونا حتتا هجو دئیه‌ده برائت قازاندیرا بیلمزلر. چونکو هجو حاققی دا سینیرسیز دئییلدیر. یوخاردا وورغولادیغیم کیمی، بیر حقوقا اویغونلوق ندنی اولاراق هجو حاققی‌نین قاپسامی و سینیرلاری بللی‌دیر. و حمد اولسون کی، بونو چوخلاری بیلمه‌سه ده، بیز آزربایجان یازیچی‌لاری و آیدین‌لاری یاخشی بیلیر و دئماقوژی (عوام فریب) یاپانلاری دا، تا ذات‌عالی‌لرینه کیمی یاخشی تانی‌ییریق.
اصلینده بیزیم، قیلی قاتیق‌دان چکن خویوموزو و شعوروموزو بونلار خفیفه آلینجایا دک، بیز ده، بونلارین آخماقلیق‌لارینا گوله‌جک و زوراکی‌لیق‌لارینا دیره‌نه‌جه‌ییک.
هله قارا شوخوم‌دا قارا قاریشقانی سئچن قورد خویوموزو گؤسته‌رمه‌میشیک‌کی بونلارا!.. او زامان بونلار اوچون داها چوخ گئج اولاجاق؛ چونکو بیز او زامان بونلاری چوخدان ازیب کئچمیش اولاجاییق.
نه قده‌ر اوزه‌ریمیزه گله‌جک‌لری وارسا، بیر او قده‌ر ده گؤره‌جک‌لری وار.
ووقار_نعمت