سید حسن عاملی، آزربایجانیمیزین گوزل و اردملی شهری اردبیلده، امام جمعه لیک مقامیندا ایله شن، بیر روحانیدیر. بو آدامین، اوتای آزربایجانین ائرمنی جنایتکارلاریلا اولوم قالیم ساواش و دورشماسیندا کی سوزلری هله ده اوره ییمیزده بیر یارا اولاراق تاب تازادی. یاخجیدی کی او سوزلر ساواشین رئال مئیدانیندا اثرسیز ایدی، یوخسا ائرمنی لر بو تئزلیکده قویوب قاچمازدیلار.
عاملی جنابلاری بوگون نماز جمعه ده بویوروب، هر بیر امام جمعه حتی شرابخوارلاریندا امام جمعه سیدی.
بیلمیرم شرعی قایدا قانونلار اساسیندا بو ادعا دوغرودو یا یوخ. اما بو ادعانین اساسیندا سوروشورام.
آیا امام جمعه؛ اورمیه گولونون قوروتماسی اساسیندا محو و نابود اولماغا معروض قالان جماعتین ده امام جمعه سیدی یا یوخ؟
آیا امام جمعه آزربایجان علیه ینه تبعیض سیاستلر نتیجه سینده ایشین گوجون، کسب و کارین الدن وئریب سینقین چیخانلارین دا امام جمعه سیدی یا یوخ؟ آیا امام جمعه مرکز سیاستلری نتیجه سینده آزربایجان توپراقلاریندان کوچمگه مجبور قالانلارین دا امام جمعه سیدی یا یوخ؟
امام جمعه آیا آزربایجان قایغیسین چکن چالیشقانلارین دا امام جمعه سیدی یا یوخ؟ بو گونه دک مین لر مین لر آزربایجان حاقلارین ساوونان اینسانلاریمیز عدالتسیز اتهاملارلا توتوقلانیب و البته ظولم گوروبلر. آیا امام جمعه بو سایاق مظلوم اینسانلاریندا امام جمعه سیدی یا یوخ؟
ایللردی گیزلی بیر اراده اساسیندا، کورد تروریست تشکیلاتلارینین حمایت ایله باتی آزربایجاندا کورد جماعتی چوخ جدی شکیلده یاییلماقدادی. ایندی بو مهاجم جماعت آزربایجانین یئرلی خالقینی، بعضن حتی سیلاحلا، تهدید ائلیر. باتی آزربایجانی رسما کردستان اعلام ائلیر تروریست تشکیلاتلار.
آیا امام جمعه بو تهدید آلتیندا قالمیش آزربایجانیلارین امام جمعه سیده ساییلا بیلر یا یوخ؟
جناب عاملینین ادعاسینا دایاناراق، دییه بیلریک امام جمعه بو جماعتین هامی و توپلوسونون آیری سئچگی قویمادان امام جمعه سی ساییلیر.
اوندا پس؛ بئله بیر امام جمعه لیگین تظاهری و گورکملری هاردادیر؟
نییه هئچ زامان گوزه گورونمور؟
بو گونه دک نییه امام جمعه لر آزربایجان چالیشقانلارینین حاقیندا اولان ظلملره هئچ بیر اعتراض ائله مییبلر؟
آجی دیر اما، مینلرجه بو سایاق سورولار سیرایا دوزمک اولار…
حسن ارک