بیزیم کندده بیر عاغلی‌آز وارایدی، داییسندان باشقا کیمسه‌دن قورخماز ایدی، اونا گؤره ده هامی گؤز اولاردی.
بیر یئرده های – کوی اولسایدی اوردا باش ایدی.
کیم – کیمه دی، باخمازدی، هر ایکی طرفه بادالاق آتاردی، آرانی قاریشدیرماغین اوستاسی دی.
مال – قارا ناخیردان آیریلیب آزیب ایتسه ایدی، هامیدان قاباق مال ایتن یانا گئدردی، گؤرردین مال تاپیلیب گلیب، ایندی هامی بونو آختاریر!..
بیر مال – قارا زمییه گیرسه‌ایدی ، زمی ییه‌سیندن قاباق بو سس سالاردی!
بونون بیر «قولو اوزون ائنلی سوپنگی» (ساپاندی) وار ایدی. قیچی‌سینمیش کیمسه بو ساپاندی اونا پای (هدیه) وئرمیشدی. کند اهلی بو ساپانددان قورخاردیلار. چون ساپاند الینه کئچنده ایری (یئکه) داش قویوب توولاردی. ساپاندین بیر قولون اؤتورمه یین باجاراردی، ها یانا تولازلاندی؟ تانری بیلردی. هر یئره دگسه ایدی، توپ گولـله‌سی کیمین یئری قازیب، دیواری سؤکردی. هاندا قالسین آداما یا مال – قارایا دگیردی.
ساپاند الده باییرا چیخاندا کنده های – کوی دوشردی.
قولو گوجلو جاوانلار اونو دؤوره له‌ییب یئره ییخیب ساپاندی الیندن آلاردیلار.
نه بیلیم؟ بیر قادا ایدی، بیر بلا ایدی.
نه قاندیرماق اولوردو، نه یاندیرماق، نه ده اؤلدورمک، کندین بوغازیندا قالمیشدی.
آتاسی، آناسی، قارداشی، باجی‌سی یورولوب باشینا اؤتورموشدولر. بلکه ده بیر حربه ساییردیلار،نه بیلیم؟!
بونون حورمتلی بیر دایی‌سی وارایدی، کند اهلی اونا دؤندولر. ریجا ائتدیلر، سیز بیر ایش گؤرون، ایسته میریک بیزیم الیمیزده اؤلسون، کین – کودورت یارانسین، بونو قاداقلایین، بویوندوروقلایین، هر ایش گؤرورسونوزسه گؤرون، داها یورولموشوق.
دایی، صاباحدان تاپشیریغی اؤزونه ایش ائله دی.
ایلک دیله توتدو، اولمادی. سونرا سامان آنبارینا سالدی، یئنه اولمادی. سوندا قارا مال تؤیله‌سینه سالدی.
سونرالار سسین ائشیدردیم، قارا مال کیمین مؤوولدردی.
کند داها سایخاق اولوب دینج اوزه دوشموشدو.
ایندی بیلمیرم دونیا اوزره بو قدر قوروم و قورارلار دَلی پوتینین قارشینی آلانمیرلارمی؟
گئتسینلر دایی‌سین تاپسینلار، دایی‌سی یوخدورسا، اؤزلری تؤیله‌یه سالسینلار.
اوغلان، ساپاندی نووه (اتم)، دگه‌نَگی توپ – توفنگ دونیانین بوتون قوروملارینین قورارلارینی بیر بیرینه ووربدور.
رحیم عباسی
