بیزیم آذربایحان اسکی یونان و چاغداش ایرلندی اؤزونده بیرلشدیریر.
ائشیتدیکلریمه گؤره اینگیلیسلیلرین گوندم یاشاملاریندا شعرین یئری یوخدور آما ایرلندده هامی شعری سئویر؛ هامی شعری بیلیر. بو باخیمدان سانکی بیزیم آذربایجان ایرلنده بنزهییر. بیر گون اری اؤلموش بیر قادین یاشامینین چتینلییینی آناما سؤیلهییردی. دانیشدی- دانیشدی یاواش- یاواش تومجهلر بیر- بیرینه قوووشدو. آخ وای چکیب سؤزجوکری بیر- بیرینه قوشدو. یئددی اوشاغینا هم آتا هم آنا اولدوغوندان سؤز آچدی. بوتون چتینلیکلر بیر یانا ائوینین سویوقلوغوندان و اریندن سونرا او ائوه اورک قیزدیرا بیلمهدیییندن گیلئی- گوزار ائتدی. او حزین دانیشیق آستا-آستا قوشوقلاشدی.
یا کروانام یا دوه
اووساریم یوخ یا دوه
بایرام گل گؤر کی سنسیز
اَِوین اوخشار یاد اَوه
آذربایجان باشقا بیر باخیمدان دا اسکی یونانا بنزهییر. شعری، موسیقی ایله یاناشیدیر. اینسان دانیشیرسا شعر دوغور و شعر موسیقیسیز اوخونمور. یعنی دانیشار اینسان موسیقی ایفا ائدیر. قولاق آسانلار موسیقی دینلهییر. قوزولارینی شایلایان چوبان بابا کؤرپهسینی نازلایان آنا و اؤلوسونو اوخشاییب آغلایان یاسلی آبا سؤزلرینی من آشیغام عیبارتیایله باشلاییب بوغاز تئللرینی تیترهدیب؛ کلمهلری اوزادیب؛