تاریخیمیزین گیزلی قهرمان لاری
بویوک تورک اولوسو و آذربایجان میللتی نین تاریخی، دولودور چالیشقان بیلگین ضیالی لارلا کی اولوسوموزون اویانیش، قورتولوش و یوکسلیشی اوچون عُومور بویو چالیشیب، اثرلر یارادیب، تاریخ، کولتور و میللی وارلیغیمیزی دولغونلاشدیریبلار.
آما قوزای آذربایجان دا #فاشیست روسلار وگونئی ده فارسچی حکومت لر بو زنگین و دولغون تاریخیمیزی بیزدن گیزلی ساخلاییب، میللتیمیزی مانقوردلاشدیریب، کوله لیکده یاشادیب، اؤز ایستک لری اساسیندا یؤنلتمه یه چالیشیبلار.
مدرن تاریخین بیرینجی تورکچو-میللتچی سی، “میرزاکاظیم بیگ” و اونون دیَرلی یازیلاری بیزیم زنگین آما گیزلی تاریخیمیزین بیر پارچاسیدیر.
میرزا کاظیم ین آتاسی، آذربایجانین “دربند” شهری نین تانینمیش عالیم لریندن ایمیش کی رشت شهرینه سفر ائدرکن او شهرین قاضیسی باقرخانین قیزی “شرف النسا” خانیما عاشیق اولور، اونونلا ائولنیب، اورادا یاشماغا باشلاییر.
بئله لیکله کاظیم بیگ، #رشت شهرینده دوغولور. سونرا عائله سیله بیرلیکده دربنده قاییدیر.
بو استثنائی اینسان گنجلیک چاغیندا، تورک دیلیندن علاوه، #فارس، #عرب و #روس دیل و ادبیاتینا تماما مسلط اولوب، 17 یاشیندا عرب دیلی اوچون “صرف و نحو لسان عرب” آدلی بیر کیتاب یازیب، اوز دها و درین بیلگی سین گوستریر.
همن ایللرده انگلیس #میسیونر لری ایله دربند شهرینده مباحثه ائدیب ، صلیبی ساواشلار تاریخی حاقیندا درین بیلگی الده ائتمک اوچون #عبری و انگلیس دیلین اؤیرنیر.
عینی حالدا #خاقانی، #گنجوی، باکی خانُف و … اسکی بویوک #تورک یازارلارین اثرلریندن ده فایدلانیب، تاریخ و دیل ساحه سینده اَن یوکسک بیلگیه صاحیب اولوب، #کریمه خانلیق لاری نین تاریخین تورک دیلینده ” عصاب السیار” آدلی کیتابدا، هابئله #اویغور تورک لری نین قدیم تاریخی، دربند تاریخی، اسلام تاریخی و ایرانین سیاسی تاریخی و” #بهائیت و مذهب ساواش لاری” تاریخی نی یازیب ، بو ساحه ده، اؤز گئنیش و درین بیلگی سین اورتایا قویور. بو اثرلر فرانسا، آلمان، انگلیس و … دیل لرینه چئوریلیر.
بئله لیکله کاظیم بیگ بوتون دونیادا شرقشناسلیق علمی نین بیرینجی اوزمانی ساییلیب، 26 یاشیندا ایکن “بریتانیا کرال شرق شناسلار جمعیتی” نین اویه سی اولور.
کاظیم بیگ دیلچیلیک ساحهسینده اوزبیلیمی نی گوجلندیرمک، همده باتی اثرلرینی اصلی دیلده اوخوماق اوچون، فرانسا و آلمان دیلینی اویرنیب، روس آکادمی سی نین ارشد ناظیری اولموش، تورک و فارس دیلینی تدریس ائدیر.
او 37 یاشیندا ایکن” تورک-تاتار دیل لری گرامری” آدلی کیتابینی یازمیش،
تورک-تاتار دیل لری گرامری” آدلی کیتابینی یازمیش، بو بیلیمسل اثردن دولایی چوخلو اؤدول لر قازانیر.
بو داهی اینسان تورک دیلی نین چئشیدلی لهجه لرین آراشدیریب، اونلارین فونتیک و صرف-نحو لر قایدالاری، هابئله “عثمانلی تورکجه سی نین گرامری” نی یازمیش، دونیا سویه سینده چوخ آدلیم ، معتبر بیر شخص اولاراق بریتانیا، دانمارک، امریکا و فرانسا آکادمی لری اویه سی و روسیه شرق شناسلیق بیلیم یوردونون باشقانی اولوب، “شرق تاریخ” فاکولته سینی قورور.
بو ضیالینین اساس ایستگی دونیا تورک لری نین بیرلشیب، روس بویروغو آلتیندان قورتولماغی اولموشدور. بونون اوچونده، تورک دیل بیرلیگی یارتماغا چالیشیب، تورک دونیاسی و تورکستان کتیبه و سکه شناسلیق و دیلچیلیک جمعیتی نی قوروب، تورک دیلی نین چئشیدلی لهجه لری نین بیرلشمه سی و باشقا دیللردن آریندیرماسینا چالیشیر.
دونیانین بیرینجی تورکولوگ و بویوک دیلچی و تاریخچی لریندن ساییلان تورکچو داهی، 68 یاشیندا دونیایا گؤز یومور.
روس امپریالیزمی، بو بویوک یازار و اونون تورکچولوک دوشونجه سینی ایتیریب، یوخ ائتمک اوچون چالیشیر. آما کاظیم بیگین یولو، اونون دِیرلی اثرلری و اسماعیل گاسپرالی، حسن بی زردابی و محمدامین رسول زاده کیمی بیلگین اینسانلار ایله دیری قالمیش، بیزه چاتدریلمیشدیر.
بو اینسانلارین یولونو دوام ائدیب، تورک اولوسونو آزادلیق و بیرلیگه چاتدیرماق، بیزیم بورجوموزدور.