تۆرکییه‌نین انرژی ساحه‌سینده آلترناتیولری آرتدیقجا ایرانین اؤنَمی آزالاجاق
انرژی ژئوسیاستی و اولوسلارآراسی ایلگی‌لر اۆزره اوزمان(کارشناس) اومود شۆکری آمئریکانین سسینه موصاحیبه‌ده ایرانین عالی لیدئری سید علی خامنه‌ای‌نین اسلام رئسپوبلیکاسینین داخیلی و خاریجی سیاستی ایله ایلگیلی آچیقلامالاری، چینین یاخین شرق‌ده آرتان نفوذو و تۆرکییه ایله ایران آراسیندا طبیعی گازا دایر راضیلاشما و آنکارانین انرژییه طلباتینی اؤده‌‌مک اۆچۆن قارا دنیزده طبیعی گاز و یئنی‌لنن انرژی منبع‌لرین‌دن ایستیفاده‌سی حاق‌دا دانیشیب.
اومود شۆکری خامنه‌ای نین سۏن واختلار اؤلکه‌ده سسلندیریلن رفراندوم طلبینی رد ائتمه‌سی و باشقا آچیقلامالارینا دقت چکه‌رک بیلدیریب کی، ایران‌دا اساس‌لی اقتصادی و سیاسی دگیشیک‌لیکله باغلی گؤزلَنتی‌لر رئال بیر گؤزلَنتی دگیل.
«ایرانین خاریجی سیاستی اؤزل‌لیکله ده بؤلگه‌سل سیاستّ بیرباشا خامنه‌ای طرفین‌دن طراحی اۏلونور. خامنه‌ای نین بو سۏن گۆنلرده‌کی صحبتلرینه ده باخساق، ایرانین خاریجی سیاستینده بیر دگیشیک‌لیک هله ده قیسسا زامان‌دا گؤزله‌مک چتین‌دیر. ایرانین خاریجی سیاستی دگیشمه‌دن ده، ایرانین اقتصادیاتین‌دا یاخشیلاشما و اینکیشاف و یا ایشسیزلیگین آزالماسینی گؤزله‌مک رئال دگیل،» شۆکری سؤیله‌ییب.
استرالیا چینین آرتان گۆجۆنه قارشی حربی ترانسفورماسییایا حاضیرلاشیر
ائکسپئرت(کارشناس) چینین یاخین شرق‌ده‌کی نفوذونون آرتماسینا دقت چکه‌رک، اؤلکه‌نین بؤلگه‌ده ژئوسیاسی حده‌لرینی قئید ائدیب.
«آمئریکانین افغانیستان‌دان چکیلمه‌سی ایله برابر و روسییانین اۏکراینا ساواشیندان سۏنرا یاخین شرق‌ده بیر سوپئر گۆج بۏش‌لوغو یاراندی. بو بۏش‌لوغو چین دۏلدورماغا چالیشیر. چین بو سیاستله بیر نئچه چیخار گۆدۆر. ایپک یۏلو لاییحه‌سینی رئاللاشدیرماق اۆچۆن چئشیت‌لی اؤلکه‌لرده‌کی یاتیریملارینین تهلۆکه‌سیزلیگینی هم ده انرژی تهلوکه‌سیزلیگینی تأمین ائتمک ایسته‌ییر. ژئوسیاسی چیخارلارینی قۏروماغا چالیشیر. چینین یاخین شرق‌ده اۏ بۏش‌لوغو دۏلدورماق اۆچۆن هم یئترلی سرمایه‌سی وار، هم ده تئکنولوژی‌سی. چینین تئکنولوژی‌سی اۆچۆن خصوصیله انرژی چئوریلمه‌سی و سلاح ساحه‌سینده اؤزل‌لیکله ده عرب اؤلکه‌لرین‌ده یاخشی بازار وار،» اۏ بیلدیریب.
اومود شۆکری تۆرکییه‌نین قارا دنیزده‌کی طبیعی گاز ساحه‌لری و انرژی تأمیناتی اۆچۆن آیری آلتئرناتیولرینه دقت چکه‌رک، یاخین زامان‌دا ایران گازینین تۆرکییه اۆچۆن «اهمیت‌سیز حالا گله بیله‌جه‌یینی» دئییب.
عالی روحانی رهبرین(خامنه‌ای نین) رفراندوم‌لاری رد ائتمه‌سینه ایرانلی‌لار رئاک‌سییا وئریب
«ایرانین تۆرکییه ایله ۱۹۹۶-دا باغلادیغی طبیعی گاز آنلاشماسی ۲۰۲۶-دا باشا چاتاجاق. بو گۆنه قدر بونو اوزاتماق اۆچۆن گؤروشمه‌لردن نتیجه چیخمادی. تۆرکییه ایران‌دان داها اوجوز گاز ایسته‌ییر… تۆرکییه قارا دنیزده‌کی طبیعی گازدان فایدالانا بیلر. تۆرکییه‌نین هم ده یئنی‌لنه بیلن انرژییه چۏخ یاتیریمی اۏلوب. ایلک ائلئکتریک آوتوموبیلینی(ماشین تمام برقی) ده ساتیشا تقدیم ائتدی. علاوه اۏلاراق، ۱۰ ایل ایچه‌ریسینده هیدروژن انرژی‌سینین پایی تۆرکییه‌نین ائلئکتریک استحصالین‌دا چۏخالاجاق. بیر ده کی، بو آی، آک‌کؤیۆ نۆوَه ایستانسییاسی‌نین(مجتمعی‌نین) ایلک حیسه‌سی یۏلا دۆشه‌جک… بونلارین هامیسینی بیر سبد ایچینه قۏیساق، ایرانین اۏلوب-اۏلماماسی تۆرکییه‌یه چۏخ تأثیر ائتمه‌یه‌جک. ایران کی، گازی بعضاً سلاح (ابزار)اۏلاراق ایستیفاده ائدیردی، اۏ دا ألیندن چیخاجاق و ایرانین اؤنَمی تۆرکییه‌نین خاریجی سیاستینده آزالاجاق»- دئیه، اومود شۆکری علاوه ائدیب.
امید شکری /کارشناس علوم سیاسی در حوضه انرژی
