گؤرکملی اهل‌بیت مرثیه‌خوان و مداحی “حاج سلیم مؤذن‌زاده” نین حیاتی ویارادیجیلیغینا باخاندا بیر نئچه مساله‌یه راست گلمک اولور:
۱-داهی اوستاد تاریخ باخیمیندان بیر دؤورده یاشاییب کی سس یازیلاری تزه تکنولوژی‌لر واسطه‌سیله دونیایا یایملانیردی .ائله بو سبب‌دن استادین یارادیجیلیغیندا یاخین و اوزاق ملت‌لرین موسیقی ماتریال‌لاری گؤرونور.
۲- اؤز آتابابادان قالمیش زنگین آئینی موسیقی ارثینی قوروماقلا برابر آیری موسیقی‌مکتب‌لریندن دوزگون فایدالانماق واونو پاپیولار وضعیت‌ده سنتز ائدیب و اؤز ملتینه تقدیم ائتمک بیر خاص نبوغ و باجاریقلا استادین اؤزللیک‌لریندن ساییلا بیلر.
۳- ملودی‌لر و ریتم تنوعی استاد موذن‌زاده‌نین ایفالاریندا حددن آرتیق‌دیر. نظره گلیر مرحوم اوستاد، کوتله‌نین استتیک دوشونجه‌لرینده‌کی رفرم‌لاری دقت‌له رصد ائديب، یارادیجیليغیندا نظره آلميشدير.
نئجه‌کی فارس موسیقی‌لردن فایدالانماقدا چوخ قدیم مکتب‌لردن یوخ، معاصر رادیو اِفیرینده گئدن گلها موسیقی سیندن پای گؤتورموش و اونو اؤزونه مخصوص بیر طرزده ایفا ائتميشدير. تورک و عرب موسیقی‌لردن فایدالانماسیندادا بو ساياق گؤرونور.
۴- سس تِمبری اعلا و تایسيیز اولماقلا برابر آئینی اوخویانلار سایاغی نفس تکنیک‌لرینه اولدوقجا تسلطی اولوب و بئله‌لیک‌له حتی اوچ ساعاتلیق مجلس‌لرینده‌ده سسین دوزگون اداره ائتمه‌گینی باجاریب. بونونلا برابر زنگوله‌لری چوخ درین و گوج طلب ائدن اولوب آنجاق هرایفاسین چوخ مکمل وضعده باشا چاتدیریب.
۵-بیر مداح و آئینی خواننده‌نین اوغورو او زامان اولور کی شعری و محتوانی بلاواسطه دینله ییجی‌لره چاتدیرا و بو اردبیل مداحلاریندا چوخ یوکسک وضعیتی اولوب و بو خصوصیتی نظرده توتاندا گئنه لاپ باشدا اوستاد موذن زاده یئر توتور.
۶-مرکب‌خوانلیق و مودولاسیون موسیقی‌ده همیشه پاساژلار وکؤرپولرایله اولار. .مثال ایچون بیز ماهور موغامیندان شوشتر موغامینا کئچمک اوچون همان ماهور گامیندا بئشینجی پرده‌ده ولایتی شعبه‌سیندن بیر کؤرپو کیمین فایدالانمالی‌ييق .آنجاق مداح‌لیق سویه سینده ظاهری ملودیک کؤرپولر یوخ بلکه شعر ومحتوانین دَيیشمه سی اونا بیر یول تک عمل ائدیر و بو خصوصیت اوستادین ایفالاریندا مکمل وضعده گؤروروک. مثال اوچون “اکبره باخ” حماسه سینده دؤنه‌لرله لحن وموغام دَییشیلیر آنجاق او قدر معنوی قرینه لر وار کی قولاق بو دَيیشمه‌لردن اینجیمه سين.
هر موغاما مراجعت ائدرکن اونون شاخص شعبه لرین ایفا ائدیب. مثال اوچون افشاری ده درآمد،عراق،رهاب ویا ماهوردا درآمد،شکسته،عراق و…(من شخصا کامل بیر دستگاه استادین ایفاسیندا ائشیتمه میشم و منجه هئچ بیر لزومی‌دا اولا بیلمز کی بیر مداح حتما تام بیر دستگاه اوخوسون)
بیرده بو کی ادوات تحریردن چوخ آز استفاده ائدیب و بونا منجه سیاسی اجتماعی مساله‌لر سبب اولا بیلر. عموما تحریرلر کلمه‌لرین اوستونده اولوب.
۸-بونو یاددان چیخارتمامالی‌ييق کی هر بیر نابغه‌نین عرصه‌یه گلمه‌سینده ادبی ،هنری محیط لرین یوز فايز تاثیری اولوب. اردبیل تعزیه محیطینده‌ده اولان بیضا،یحیوی،انور،منزوی ومنعم کیمی شاعیرلر ،اهل بیت عاشیق‌لری و جوشقون و سؤنمز تعزیه مجلس‌لری سلیم موذن زاده‌نی عرصه‌یه گتیرمک‌ده بؤيوک پایی اولوب.
تانری استادین روحونو حقیقت عالمینده سیدالشهدانین سفره‌سیندن متنعم ائتسین.
مهدی شاهمرادی