آمریکا ایکیاوزلویو ایله بایدن-ین زنبیلی
آزربایجان جمهوریتینین 28 مای موستقیللیک گونو بایرامی ایلا ایلگیلی، آمریکا باشقانی «جو بایدن»، 8 گون اؤنجهدن اؤلکه میزین پریزیدنتینه تبریک مئساژی گؤندهریب.
دوشونورم هر هانسی آچیقلامادان اؤنجه، جناب جوزف بایدن-ین مکتوبونو اولدوغوکیمی اوخویون، سونرا بو مکتوبون سطیرآلتی (گیزلین مقاملارینی) تحلیل ائدیب و آمریکا باشقانیندان بیر نئچه سورغولاریمیز اولسون.
آذربایجان رئسپوبلیکاسینین پرئزیدئنتی ذات عالیلری جناب ایلهام علییئوه
حؤرمتلی جناب پرئزیدئنت،
آمریکا خالقی آدیندان سیزی و آذربایجان خالقینی ۲۸ مای – موستقیللیک گونو موناسیبتیله تبریک ائدیرم.
آذربایجانلا بیرلشمیش ایشتاتلار(ایالات متحده آمریکا) آراسینداکی طرفداشلیق بؤلگهده اینکیشافی تأمین ائدیب. بیز بیرلیکده تئرروریزمله موباریزه آپاریر، نارکوتیکلرین (مواد مخدر(مواد مخدر) قانونسوز دؤورییهسینه قارشی تدبیرلر گؤرور و کوتلهوی قیرغین سلاحلارینین یاییلماسینین قارشیسینی آلیریق. خصوصاً، روسییانین اوکراینا خالقینا قارشی غدار محاربهسی دؤورونده آوروپانین انرژی تهلوکسیزلیگینین تأمین ائدیلمهسینده بیز بیر یئرده اولموشوق. بیرلشمیش ایشتاتلار، جنوبی قافقازدا گلهجک نسیللر اوچون تهلوکهسیزلیک و اینکیشافی تشویق ائدهجک، آذربایجانلا ائرمنیستان آراسیندا دایانیقلی و عدالتلی صولحو دستکلهمهیه داوام ائدهجکدیر.
قارشیدان گلن ایلده تهلوکهسیزلیک و اقتصادی امکداشلیغیمیزین درینلشدیریلمهسی ده داخیل اولماقلا، طرفداشلیغیمیزی داها دا گوجلندیرمهگی هَوسله گؤزلهییرم. سیزه سئوینجلی و فیراوان موستقیللیک گونو آرزو ائدیرم.
صمیمیتله،
جوزئف بایدن
آمریکا بیرلشمیش ایشتاتلارینین پرئزیدئنتی.
جناب بایدن-ین 8 گون اؤنجه دن اؤتگونلوکله بئله بیر مئساژی، یادیما بیر گولمهلی مسئله سالدی. سوسیال شبکهلردن اؤنجه کۏبود نوکیا أل تلفونلاری چاغی، یئنی ایل تحویل اولماق همن، بیر سیرا دوست- تانیشلار، گلن ایلی درحال تبریک یازیب، دییهردیلر:« باخ، عؤمور اولسون، گلن ایل بایرامی سیزه ایلک تبریک ائدن من اولدوم».
بو دا، قارشی طرفین صمیمیتی اولاراق دَگَرلندیریلیردی.
جناب جو بایدن ایسه، سککیز گون اؤنجهدن بو قاباقجیل مکتوبوندا، یقین ایستهییب کی، قارداش تورکیهجمهوریتی باشقانی رجب بی طیب اردوغانی بئله ائرتهلهسین. اوستهلیک روسیا پرزیدنتی ولادیمیر پوتین دن ده قاباغا دوشسون. ائله بونا گؤرهده، مکتوبونو «صمیمیتله» ایفادهسی ایله بیتیریب.
یعنی فارسلار دئمیشکن: «میخواسته تا گوی سبقت را از دیگران برباید»!
گؤرونور بایدن هامیدان اؤنجه آزربایجان پرزیدئنتی جناب ایلهام علییئوین قاپیسنا زنبیل قویوب دئمک ایستهییر: سایین ایلهام بی، ایرانین هده-قورخولاری لا تخریباتلارینا سینه گلدیگینیزی و آوروپانین بوغازینی سیخان روسیانین یئرینی توتماغینیزا باخمایاراق، انژی قایناقلارینیزدان هئچبیر تضییق ریچارقی (اهرم فشار) کیمی سوءاستفاده ائتمهدیگینیز اوچون، سیزه گووَنن ایلک دؤولت بیزیک.
آمما نیه؟
دئمهلی آزربایجانین دونیا و بؤلگهاوزره تعیین ائدیجی پوتانسیال لاریندان یاخشیجاسینا خبرلری واردیر.
اوْ، اولوسلارآراسی تئروریزمه، نارکو بیزنئسه (تجارت مواد مخدر)، ائلهجه ده دونیا چاپیندا نووه سیلاحینا قارشی، آزربایجانین یانینندا اوْلدوغونو آچیقجاسینا بیلدیریب؛ ائلهجه ده بو ساحهلرده آزربایجانی تام حاقلیایکن دستکلرینی بیر ده وورغولاییب. بو هئچده پیس دگیل. سؤز قوْنوسو بوتونلوکله جناب بایدن-ین تمثیل ائتدیگی «آمریکا حاکیمتی»-نین یا خود جو بایدن-ین آخماقجاسینا ایکیاوزلو یوْخ، نئچهاوزلولوکلری دیر.
جناب بایدن، نئجه اولور؛ سیز باشدا آذربایجانین موستقیللیگینه گؤره سئوینجینیزی بیلدیریرسینیز، سوندا ایسه، جنوبی قافقازدا گلهجک نسیللر اوچون تهلوکهسیزلیک و اینکیشافی تشویق ائدهجهیینیزه اومود ادیرسینیز!
سیزجه 30 ایل عرضینده خبیص قارداشینیز فرانسا و کؤنَز قارداشینیز روسیا ایله بیرگه «مینیسک قوروپو همصدرلیگی) آدی آلتیندا، آزربایجانین 20% تورپاغینی ایشغال ائدن ائرمنیلره، نه دن جنوبی قافقازدا گلهجک نسیللر اوچون تهلوکهسیزلیک و اینکیشافی تشویق ائدیجی بیر آددیم بئله آتمادینیز؟ اوستهلیک بیرباشا ایشغالچی لارین ماراقلاری لا اوینادینیز؟
سیزجه، آمریکانین «فریدام هاوز» قورومو، بایدنله بایپاس (جیین_جینه- شانهبه شانه) آزربایجانین تورپاق بوتؤلوگونه قارشی بیاناتلار سسلندیردیگینی بیلمیر؟
سانکی فریدامهاوس قورومو، آزربایجانین دونیا دؤولتلری تشکیلاتیندا تانینمیش اؤز توْرپاغیندا آختاریش-بوراخیلش لاچین کئچیدینین قورماسینی، قاراباغدا یاشایان ائرمنیلرین فلاکتلی دوروما دوشمهسی کیمی گؤستهریر!
اولوسلارآراسی تئروریزمه، نارکو بیزنئسه (تجارت مواد مخدر)، ائلهجه ده دونیا چاپیندا نووه سیلاحینا قارشی ادعالارینیز دا، داها گولونج لو نظره گلیر. سیز مینیسک قوروپو همصدرلری ایله یاناشی، اینگیلیسلرله بیرگه، سؤزونون دال-قاباغینی آنلامیان (فعل -فاعلی) ترسه ایفاده ائدن:«من همهی شما را میکنم… لاکن نصیحت» کیمی چیخیشلاری لا تانینمیش اینگیلیسین چَر توخومو (خمینی) نی سیز بو بؤلگهیه بلا کیمی تحمیل ائتمهدینیزمی؟
یاریم عصره یاخین دونیانی پ…خا چکن، اولوسلارآراسی تئروریزمین باشیندا دوران، اؤز میللتینه غدارلیق ائدن و نهایت ده سیز آغالارینا قاباران ایران اسلام حاکمیتینی، هر زامان ییخیلاندا، بلوکلانمیش ایران میللتلرینین پولو ایله آیاقدا قالماغا، سیز بیرینجی گوناهکار دگیلسینیز سه، بویورون گؤرک بس کیملردیر؟
نه اولسون کی آغ ائو فاکتیکی «حسینیه» اولماییب، آمما، تهرانلا پرده آرخاسی «پیشیک-سیچان» اویونلارینیز، چوخ ایگرنج و آشکار صورتده گؤزه چارپیر. جناب بایدن، :«خالقین گؤزو ترهزیدی»؛ بو او دئمکدیر کی، باراک اوبامایا پرزیدنتلیک عرفهسینده، «حسین اوباما» دئیهنلر، بوشونا دئمهمیشلر.
جناب بایدن، اونوتمایاق سون آیلاردا ایرانین کئچمیش خارجه ایشلر ناظری محمد جواد ظریف آچیقجاسینا ایرانین موللاکرات حاکمیتیندن سیزلرین دستگی کسیلمک شرطی ایله، بیر هفته عرضینده تورکجه دانیشاجاقلارینا مجبور اولدوقلارینی سؤیلهمیش.
جناب بایدن، گئرچک دن دوغرو گامیش آختارانسینیز سا، آذربایجان جمهوریتینین اراضی بوتؤلویونو تانیارکن، نئجه اولور، دونیانین دؤردبیر گوشهسیندن ییغما ائرمنیلره، کیچیک قارداشلارینیز فرانسا و روسیا ایله بیرگه، قاراباغدا توخونولماز بیر شرایط یارادیبسینیز، تا بو واسطه ایله هم آذربایجانین اراضی بوتؤلویونو هدهلهسینلر، هم ده بؤلگه ده عؤمورلوک گرگینلیک یاشاماق اوچون، بیر چیبان ساخلامیسینیز!
سیز حقیقتاً بو قدر دمکرات و هومانیسم دوشونجهیه مالیک سینیز سه، نه دن ایران آدلانان اؤلکهنین داخیلینده اجباری بیرلیکده یاشایان میلیونلارلا غیرفارسلارا، قاراباغ داکی مدعاسیندا اولدوغونوز ایستاتوس دان بیر کلمه ده دانیشمامیسینیز؟!
سون سؤزوم: جناب جو بایدن، آمریکا کیمی دونیانین بیر نومرهلی نهنگ دؤلتی، سیزین کیمی یاش سببیندن باشینی ایتیرمیش هاوادا خیالی قوناقلارلا أل وئرن بیر شخصین باشچیلیق ائتمهسینه، نه من اینانیرام، نه ده منه تای بیر چوخ سیراوی(معمولی) اینسانلار.
حبیب ساسانیان (یاکاموز)