ائلبَیلیک، یۏخسا فارس بَیلیک؟
دموکراسی؛ «پانایرانچی»لارین دوشونجهسیندن
دۆنیا چاپیندا بیرچۆخلارینین أل اۏیونجاغی اۏلموش، ائلهجه ده أن چۏخ باغیریلان سؤزلردن بیریسی ده، آنادیلیمیزده دئسک، ائلبَیلیک (دموکراسی) سؤزۆدۆر. باخمایاراق اۏ قدر بو سؤزۆن تیرچیغینی چیخاریبلار، آرتیق «دموکراسی» یۏخ، «دموقراضه» دئییلیر.
بیرینجی، گلین گؤرک دموکراسی نه دئمکدیر؟
دئموکراسی تۏپلومون عدالتلی قورولوشودور. بو سؤز یونان دیلیندن گلیر؛ هابئله ایسوئچ (سوئد) دیلینده «میللتین ایداره ائتمهسی» دئمکدیر. دئموکراتیک اؤلکهلرده سیاسی حاکمیت میللتین ألیندهدیر. دیکتاتۏرلوق ایسه، دئموکراتییانین ترسیدیر.
فرانسا دیلینده:«حکومت عامه»؛ فارسجا دا: «حکومت مردم برمردم=مردم سالاری» دئمکدیر. آنجاق، دموکراسیدن پانفارسلارین آنلاییشی بۆتۆن میللتلرله؛ یئردن-گؤیه دک فرقلیدیر.
اۏنلار ارسطو دان توتموش، کارل پوپر، جان لاک، ژان ژاک روسو، فرانسیس فوکویاما، هگل، ائلهجه ده هابر ماسلارین بۆتۆن دۆشۆنجهلرینی لاغلاغایا قۏیموشلار.
اؤرنک اۏلاراق، افغانیستاندا یاشایان فارسلارا، بیر ایرانلی پانفارسین باخیشی، دموقراضه بیر باخیشدیر. بو نه دئمکدیر؟ ایندی دئییم: ایرانلی پانفارسلار، اؤز اؤلکهلرینده بیر افغانلی دیلداشینا قول-کؤله (برده )گؤزۆیله باخیر! آنجاق اۏنلارین دیل-مدنیتینین افغانیستان چاپیندا قۏرونوب -ساخلانیلاسینا، هابئله بیرینجی یئری توتماسینا تام اینانیر.
بیر پانفارسین گؤزۆیله، قاراباغ چاتیشمازلیغینا باخاریقسا؛ آزربایجان تۏرپاق ییهسی اۏلاراق؛ خانکندی ایله هَندهورینده یاشایان دۆنیانین دؤرتبیر بوجاغیندان ییغما ائرمنیلرین، لاچین دهلیزیندن ائرمنیستانا هئچبیر مانع (باخیش-بوراخیلیش) اۏلمادان گئت-گَل حاقلاری اۏلمالیدیر؛ آنجاق یاریم میلیون ناخچیوانلیلارین زنگهزور دهلیزیندن بارینماغا اۏخشار حاقلاری اۏلمامالیدیر!
پانفارس اینسانین باخیشینا گؤره، آزربایجان اؤلکهسینده یاشایان آز سایدا بۆتۆن میللتلرین ایلکل حقوقلاری وئریلمهلی دیر، آنجاق ایراندا میلیونلارلا یاشایان فارساۏلمایان لار، بونو ایستهسهلر، سئپاراتچی ( تجزیهطلب- بؤلۆجۆ- آیریمجی)، ائلهجه ده اؤلکه خایینی دیرلر!!! ( باخمایاراق آزربایجان جمهوریتینده بۆتۆن میللتلرین دیللری ایله مدنیتلری، هابئله سیاسی حقوقلاری تام یئرینده دیر).
چۏخ یازیقلار اۏلسون؛ أللی ایل باتینین آکادئمیک محفللرینده اوستاد لقبینی داشییان بیر پانفارسین دموکراسیدن آنلاییشی، گئرچک آنلامدا تام دموقراضه دیر.
اؤرنک اۏلاراق، پانفارسلارین أن گۆوَندیکلری (رضا ربعپهلوی) ساچ-ساققالینی آزادلیق بئشیگی آمریکادا آغارتماغینا باخمایاراق، اینسانلارین أن ایلکین حقوقلاریندان ( آنا دیلینده تحصیل دن) سۏرغولانارکن: «من بونو آنلامیرام» دئییر!
بیر پانفارسین یاشام چئوره(اطراف محیط- محیط زیست) اینامینا گلدیکده؛ ایش داها گۆلۆنج اۏلور. گۆلۆنج ده دئدیکده، داها دۏغروسو آغلامالی اۏلور. اۏنلار اورمو گؤلۆنۆن قورودولماسیندان دۏلایی، مینلرله قوشلار- ممهلیلر(پستانداران) حئیوان دان علاوه، میلیونلارلا اینسانلارین دوز فیرتیناسیندان ساراطان توتوب اؤلۆملریندن کئفلهنیرلر؛ آنجاق بیر پیشیگین کیرمان چؤللۆگۆنده اؤلمهسینه گؤره، عزای عمومی توتورلار!!!
هن؛ بو سیاهینی اوزاداریقسا، کیتابلار یازماق اۏلار. بونا گؤره ده، سؤزۆمه بورادا سۏن قۏیورام.
سیزلر ده بو کیمی اؤرنکلری کامنتلر بؤلۆمۆنده یازماقلا، یاتان مانقورتلاریمیزی اۏیاتماغیمیزا یاردیمچی اۏلون.
حبیب ساسانیان(یاکاموز)