ایراندا حیوانات باغچاسینا گئتمکدن چکینردیم. حیوانلاری اوجور پیس و آجیناجاقلی وضعیتده گؤرمک، نیه لازیمدیر کی؟! او حیوانلاری اوردان نئجه خیلاص ائتمهیه دوشونمک لازیم! آنجاق بورادا اوندان یوخ، اونون یئرینه بیر اؤرنک/مدل باغوحش بارهسینده سیزه دانیشماق ایستهییرم؛
ایسوئچین گؤزللیکلریندن بیری، اونون حیوانات باغچالاری دیر. ایندییهجن بیر نئچهسینی گؤرموشوک، بیری او بیریسیندن گؤزل. آمما بو سفر گؤردیوموز بام باشقا ایدی؛ آدی «کولموردئن حیوانات باغچاسی».
کولموردئن، ایسکاندیناوی نین ان بؤیوک حیوانات باغچاسی و دونیادا ان بؤیوکلردن بیریدیر. تقریبا ۱۸۰ هکتار اراضی اوستونده قورولوب. البته بونا، لوناپارک، دلفین شوو و اوشاقلار اوچون «بامسئ لند» کیمی مختلف ایلنجه یئرلری ده داخیلدیر.
کولموردئنی باشقالاریندان فرقلندیرن اونون تلهکابین واسیطهسی ایله اولان «سافاری» ایمکانیدیر. حیوانلاری یوخاریدان ایزلمهیین باشقا دادی وارمیش. قفس دییه بیر شئی یوخدور. طبیعی مانعهلر ویا آغاج چپرلرله حیوانلاری بیربیریندن آیری توتورلار. باغچادا ۸۰ نوع حیوان ساخلانیلیر کی، چوخونلوغو آرادان گئتمک خطری آلتیندادیر. حیوانلار، ایسوئچ آبوهواسینا اویغون نوعلاردیر. یاخشی دئسم، بوردا حیوانلار ساخلانیرمیرلار، بلکی قوروما آلتیندا یاشاییرلار؛ «حیوانات یاشاییش مرکزی»! هر ایل ۳۰۰ حیوان پارکدا دوغولور.
باغچا، ۱۹۶۵ده ایشه باشلاییب. خصوصی شیرکتدیر. هر ایل ۷۰۰ مین گؤروشجوسو اولور. شیرکتین ۵۰۰ه یاخین دائمی ایشچیسی وار. توریست فصللرینده ایشچی ساییسی ۲۵۰۰ ه یئتیشیر.
کولموردئنین اساس ایدهسینین اوچ آیاغی وار:
۱- حیوانلاری قوروما: نه اینکی فقط نسلی کسیلمکده اولان حیوانلار بورادا ساخلانیلیر، بلکی بوردا الده ائدیلن گلیرین بللی میقداری دونیانین مختلف یئرلرینده بو حیوانلار اوچون خرجلنیر. باشقا سؤزله، هر گؤروشچو، اؤز نوبتینده بو ایشه یاردیم ائدیر. بو دوغرولتودا ایلده یوز مینلر دولار، شیرکت طرفیندن باغیش ائدیلیر.
۲- آراشدیرما: حیوانلار و چئورهنی تانیماق و قوروماق اوچون، کولموردئنی بیر آراشدیرما مرکزی کیمی گؤرمک اولار. دونیانین بعضی یونیوئرسیته و آراشدیرما مرکزی ایله ایش بیرلیک ائدیر. مثلا، همین آراشدیرمالارین نتیجهسینده، نادیر بیر دولفین نوعونون بالتیک دنیزینده جوتلشمه و دوغما یئری تثبیت ائدیلیب، ایسوئچ دؤولتی طرفیندن قوروما آلتینا آلینیب.
۳- اؤیرتیم: کولموردئنده اولماق، چئوره اوچون بیر گونلوک آموزش کیمیدیر. اوشاق دیلینده، چئوره اوچون چوخ دیرلی حساسیت یارادا بیلیرلر.
خولاصه دئسم، کولموردئن گؤروشچو اوچون اؤیرتیم، ایلنجه و یاردیم ائتمهیی ساغلاییر. اوچونو بیر یئرده! چوخ ذکی بیر کونسئپتدیر. بونا علاوه اولاراق، چئورهنی قورویور، ایش یارادیر و پول قازانیر! داها نه ایستهییرسینیز؟!
سون