اینجا ایلانه، خلیج همیشه فالس
ایران آدلانان اؤلکهنین یایلاسیندا یاشایان تۏپلومسال تۏرلاردا (سوسیال شبکهلرده) اۏلان هر بیر اینسان، خۏی زلزلهسیندن یارانمیش گرگین دورومدان آز دا اۏلموش سا، بیلگیلری وار.
هرگۆن کئچدیکجه حاکمیتین تۆرک میللتینه خایینجهسینه یاناشماسی، داها آیدین گؤرۆنۆر. ایران بۆتؤولۆیۆنۆ قوتسال و تۏخونولماز بیلن شاه لا شیخ یانداشلاری، طبیعی فلاکتلرده بئله تۆرک علئیهینه ایگرنج ایفاده و حرکتلریندن، هئچ ده اوتانمیرلار.
10 ایل بوندان اؤنجه قاراداغ زلزلهسینده تۆرکیهنین (قیزیل آی جمعیتی=هلال احمر تورکیه) تام حاضیرلیقلا 3 گۆن سرحد ده یوباندیریلدی! عئین زاماندا اؤزلری نین مئدیالاریندا بایکوتلا یاناشی، «خندوانه» ایله گۆنئی آزربایجانین آغیر فلاکتله اۆزلشدیگینه اۆرَکلرینده گۆلۆب، گۆلۆب، «تۆرکلر، قیریلسالار یاخشی دی» دئییردیلر.
50 ایله یاخین غربده یاشامیش فارس دۆشۆنجهلی و آکادمیک اۏلان سؤزده ایندیکی حاکمیتین مخالفلری (اپوزسیون فارس محور)، بیزیم میللتیمیزهقارشی، مۏللا رئژیمیندن هئچده گئری قالماییب. تانینمیش ائل شاعری (هوشنگ جعفری) دئمیشکن:
« یامان گۆنده بیزی قارداش سانیرلار بؤلگۆده باجیدان أسگیک تانیرلار
حاققاۆسته اۏتوروب، حاققی دانیرلار بو نئجه قارداشلیق؟ بو نه دۏستلوقدو؟!
بس نئجه اۏلور لبنان دا بیرینین ایتینین قیچینا داش دَگَنده، ایرانین بۆتۆن مئدیالاری حئیوان حقوقلاری یۆخ، اینسان حقوقلارینی بار-بار باغیریرلار! آمما بیزیم میللت چارهسیزلیکدن تلیسلردن قوراشدیردیقلاری کۆمهلری ایسیندیرمک اۆچۆن کؤمۆر قالاییر و سؤزده ایسلام حکومتی نین باجاریقسیزلیغی ایله بیلهرکدن خیانتی نتیجهسینده، زلزلهدن جان قورتاران عزیزلریمیز دَم گازیندان(دی اکسید کربن دان) حیاتینی ایتیریر.
قودرت ساواشی آپاران اۏپۏزسیۏنلارین بیزه سیریماق ایستهدیکلری (فاذریلشمیش مانقورد ) و ساختا ستارخان ائلهجه ده سانکی بو میللتی قورتاراجاق اۏ یالانچی پهلوان(حسین رونقی) هاردا ایتیب – باتیب؟ کرمانشاه زلزله سینده جاندان -باشدان چیخان و :«تبلیز مالِ عیلانه» باغیران مانقوردت(علی دایی) هۏو هۏولوب – جۆت ساویلاندان سۏنرا؛ اۏنو دا میللی حرکتین سۏسیال شبکهلرده کی باسقیسیندان دۏلایی، بیر هفته دن سۏنرا خالا خَطیرین قالماسین دئیه:« آذربایجانم تسلیت…»عنوانلی بیر پۏست پایلاشیب!!!
علی قاقاش، بو گۆنلر، آزربایجان سندن تسلیت یۏخ، مادی- معنوی یاردیم اوموردو؛ سن ده کی بتر سیناقدان چیخدین، اۆزۆن آغ اۏلسون، بیزه یئتر؛ اؤز عاییلهنی قورتارماق اۆچۆن ایندی سنه لازیمدی ییغیشدیریب گئدهسن شاهعابباس بابامیزین پۏرتاقاللی لاردان گئری آلمیش گئنبورون (بندرعباس)دا، بیرداها دئیهسن:«گلمیشم بورایا دییهم کی، اینجا خلیج همیشه فالسِه».
بیر نئچه سؤزۆم ده اؤز میللتیمیزه: ائی باشدان -باشاسی ایشغال اۏلونموش« ایران» آدلانان گۆنئی آزربایجان لا باشقا تۆرک میللتلَری؛ یئتر آرتیق، یئتر؛ هئچ بیر قاخینج (منت) قۏیمادان، بیر عؤمۆر «پانتۆرک» چۏماغی ایله تاپدانان گئرچک ایگیدلریمیزین اؤز خالقیمیزا اۆرک دۏلو سئوگی ایلی جۏشقولارینی گؤردۆنۆز. بیر داها زنگانلی شاعیریمیز دن :
« یوخودایدیز سیزی آچدیم – بَلَهدیم، بیلمهدیز هئچ قۏللاریزدان یاپیشیب سیلکَلَهدیم بیلمهدیز هئچ…»
داها بو ایران آدلانان فارس فاشیسمینین قوللوقچولاری مۏللاکرات لار نه ائتمهدیرلر کی، آییلاسینیز؟!.
تخمیناً بیر ایل اؤنجه یازدیغیم بیر شعریمین بیر نئچه بندی ایله سؤزه سۏن قۏیورام:
اوْیان ائی کابابا رأی سالان میللت اوْیان هر دؤرد ایلدَه آللانان میللت
قؽرخایلدی آللاندین هر گۆن، هر گئجه بسدیر بو غفلتین، من دئییم نئجه؟
اوْیان سن وجدانؽن، اوْیان، دای بسدی اوْیان، بو غفلتین صبریمی کَسدی
چۆرۆیۆب ساققؽزؽ، سۆیرۆشۆب آیغؽ رئژیم، دارگۆنده دیر، سن چکمه قایغؽ
یاندؽردؽ کیتابؽم شاهؽن ارتشی قوْپوزدا عکس ائتدی مۏللا اوْ ایشی
نه شاهدان خئییر اوم، نه دَه مۏللادان اوتانؽم یئرینه اؤزۆن آللادان
مۆسلمان، ایرانچؽ، نهبیلیم نهلَر اونوتما، اینسانلیق زامانؽ گَلر
رمز وحدت اۏندا ایران سایؽلماز اؤزۆن یاتمؽشلؽقا ووران آیؽلماز
یادا کؽ فارسدیلی دۆرتۆلمز گؤره ضیالؽ مۆباریز بۆ درده دؤزه
اوْیان اؤز تاریخین کیملیگین اوْخو سن ده یامانگۆنه، بارؽ چول توْخوْ
اینجیمه سؤزۆمدن، ائششک دن، چولدان ائششک چوْخ یاخشؽدؽ کؤلهدن، قولدان
مۆستقیل بیر میللت اوْلماغؽن دادؽ نهدن بو میللتده قارشیلانمادؽ؟!
سنه نه؟ اویدورما، آریا – ایران گؤرۆم بو ایرانؽ داغؽلمؽش، ویران
بیر عده اویوبدور آیه حدیثه بیر عده آختارؽر تۆربه، کَنیسه!
کیمی کوْروْش دئییر، دؤیۆر باشؽنا زرتشتی، مۆسلمان قاتؽب آشؽنا!
«قوْندارما قاراباغ جمهوری» قوران آرخاسؽندا ایندی ایراندؽ دوران
ماسوْننؤکرینه، نؤکر اوْلماغؽن اسلام اؤرتۆیۆنده، سؤنۆب سوْلماغؽن
أن بؤیۆک سهودی، قاییت اؤزۆنه گئت فیکیرلش یاکاموْزون سؤزۆنه.
حبیب ساسانیان (یاکاموز) 05.02.2023