«بایرام آینین ایکیسی آنا دیلی گونو مناسبتیله»

«بایرام آینین ایکیسی آنا دیلی گونو مناسبتیله»

هر میللتین آتا-آنا دیلی اۏنون حیاتیندا نه‌قدر اؤنَملی اۏلدوغونا گؤره بین الخالق فرهنگی توپلوم(یونسکو) ایلین بیر گونون «آنا دیلی گونو» اعلان ائدیبدیر. البت کی آنا دیلین بسله‌مک؛ اینکشاف ائتمک و اونو قۏروماق هر میللتین اؤز وارلیغینی، کیملیگینی و حتی ناموسونو قۏروماق قدر اؤنَملی و قیمتلیدیر. آیدیندیر کی هر کسین دیلی اۏنون میللیتی و هویتی سایلیر. بوتون بونلارلا بئله اونوتمایاق کی «دیلین الدن وئرن میللت کیملیگیندن علاوه بوتون شعورون؛ دوشونجه سین و هویتین الدن وئریر». ائله اونا گؤره پان ایرانیست حاکیملر ۱۹۱۹ -جو ایل انگلیس-ایران آراسیندا باغلانان موقاویله اوزَرینده اؤلکه نین یوزده سَکسنینه یاخین اولان تورک میللتینی دیلیندن محروم ائده رک فارس دیللی اولملاغا مجبور ائدیبلر. البت کی تورک دیلینه قارشی اولان بو تهاجم دونیانین گیزلی حاکیملری اولان فراماسونرلر و اونلارین باشیندا اولان (m i 6)تشکیلاتینین بیرینجی دوشمانی اولان تورک خالقینا بیر تهاجم و بیر مدنی سوی قیریم سایلیر! بئله ده اولوب! اونا گؤره کی ایندییه دک میلیونلارجا تورک گیزلی حاکیملرین نوچه سی اولان پان ایرانیست گوجلری و دولتلری واسطه‌سی ایله آسمیله اولوب؛ اؤزون تورک تانیماقدان اوتانیر. چوخ گولونج اوراسیدیر کی، آنا دیلین نه‌قدر اؤنملی اولدوغونو دوشونه بیلمه‌ین آداملارا دیلینی قورو دئیَنده«بیز اوچون دیل اؤنَملی دئیل اینسان اولماق اؤنَملی‌دیر» دئیرلر! بیر حالدا کی بو اصلی دوشونه بیلمیرلر اینسان اولماقا شعور و اندیشه گرکدیر. دیلین الدن وئریب اونو دوشونمه‌یه‌نین اندیشه سی ده اولا بیلمز. اونا گؤره کی میللی شعورو اولمایانین اندیشه سی، دوزگون و یاخشی شخصیتی و جسارتی اولا بیلمز؛ پس بوش بیر سؤز بلکه ده تورک دوشمانلاری ایلقا ائدن بیر سؤز دور!  و یاخود دوشونمه دن قارشیندا اولان مسئولییتدن قاچماق اوچون  بوش و یئرسیز بیر ادعادیر! بلی منجه بو گون جامعه ده چوخالان اخلاقسیزلیق؛ شعورسوزلوق، تبهکارلیق و بوتون غیر انسانی عمل لرین اصل منبعی پان ایرانیست حاکیملر واسطه سی ایله اِعمال اولونان آسیمیلاسیون(میللتلرین دیلین و فرهنگین دؤنده‌ریب؛ اصل وارلیق وکیملیکلریندن بیگانه ائتمک) دیر. مطلب اوزون اولماسین دئیه آنا دیلی گونون جبریله دیلیندن محروم اولانلارا؛ اؤزللیکله آذربایجان خالقینا تبریک ائدیب؛ اؤز کؤکونه بالتا ساپی اولانلارا دا آییلماق آرزی ائده‌رک؛ بیر بند شعر آنا دیلین سئون‌لره وبو مقدس یولدا چالیشانلارا تقدیم ائدیرم.

دیل وارلیق هویتدی اونو بیلمه لییک بیز

ناموس‌دو بیزه، ناموسا جان وئرمه لییک بیز

هر کس کی دیلین آتدی دینین ده آتاجاقدیر

ناموسسوز اولوب خوار اولاجاقدیر باتاجاقدیر.

عقیل آذردخت – موللاباشی