بروکسئل یۆرۆشو – دیاسپور گونئی آذربایجان تۆرکلرینین ایستکلرینی دستکلهییر
رئپورت. آذ یازیر: «گونئی آذربایجان تۆرکلرینین ایراندا یئنیلیکلره باشچیلیق ائتدیی بیر داها تصدیقلنیر. ۱۹۷۹-جو ایل اینقیلابی تبریزدهکی حرکات نتیجهسینده گئنیشلنیب، پهلوی رئژیمینین دئوریلمهسی ایله نتیجهلنمیشدی. سونرادان بو اوغوردان خومئینی(خمینی) و اطرافی ایسلام آدی آلتیندا پهلویدن قالما پانفارسیزم ایدئیالارینی حیاتا کئچیرمهیی داوام ائتدیردی. بونونلا دا آذربایجان تۆرکلرینین اینقیلابین غالب گلمهسی یولوندا وئردیکلری ایتکیلر و چکدیکلری عذابلار میللی حقوقلارینین تأمینی باخیمیندان نتیجهسیز قالدی. اینقیلابدان سونرا یئنی آنا یاسایا(قانون اساسی یه) میللی حقوقلارین تأمینی ایله باغلی ماددهلر داخیل ائدیلسه ده، تهران رئژیمی اؤتن ۴۳ ایلده اونلارا عمل ائتمیر.
بو ایسه یئنی حرکاتلارین یارانماسینی شرطلندیریر. ایران-عراق محاربهسی باشا چاتاندان سونرا ۱۹۹۰-جی ایللردن باشلایاراق آذربایجان میللی حرکاتی میللی حاقلارین تأمینی یؤنونده گئنیشمیقیاسلی آکسییالار(اعتراضلار) کئچیریب. بابک قالاسینا یۆرۆش، دونیا آذربایجانلیلارینین کنگرهسینین فعالیتی و باشقالارینی بونا اؤرنک گؤسترمک اولار.
سئنتیابردا ایراندا «قادین، آزادلیق، عدالت!» شوعاری ایله باشلایان اعتراض آکسییاسینا گونئی آذربایجان تۆرکلری ده اؤز شوعارلاری ایله قاتیلدی: «آزادلیق، عدالت، میللی حکومت!»
گونئیلیلرین کئچیردیگی آکسییالاردا «بورا آذربایجاندیر: بیر قانا، یوزبیر قاندیر!»، «تبریز، اورمو، قاراباغ، اسیر قالماز بو تورپاق!»، «بو تورپاقدا، بو ائلده، قالماز بو قانلار یئرده!»، «بسیج، سپاه موفتهخور، قان قوساجاق دیکتاتور! «نه شاهچییام، نه شئیخچی میللتچییم، میللتچی!»، «آذربایجان میللتی، چکنمز بو ذلتی!» کیمی آذربایجان تۆرکجهسینده شوعارلار سسلندیریبلر.
اونلارین حاقلی ایستکلرینه خاریجده یاشایان دونیا آذربایجانلیلاری دا دستک وئریرلر. بلژیکین پایتاختی بروکسئلده آوروپا پارلامئنتینین بیناسی قارشیسیندا آوروپادا یاشایان گونئی آذربایجان تۆرکلرینین تشببوسو ایله «آزادلیق و عدالت یۆرۆشۆ» آدلی آکسییا کئچیریلیب. یۆرۆشده «آزادلیق، عدالت، میللی حکومت!»، «یاشاسین آزادلیق و عدالت!»، «محو اولسون اورتا عصر ذهنیتلی ایران ایسلام رئسپوبلیکاسی!» شوعارلاری سسلنیب.
آکسییادا یئکون بیاناتی قبول اولونوب. یۆرۆش ایشتیراکچیلاری گونئی آذربایجان تۆرکلرینین تاپدانان و پوزولان میللی حاقلارینی طلب ائتمکله یاناشی بوتون دونیا اؤلکهلرینی ایران ایسلام رئسپوبلیکاسی رئژیمینین لئگیتیملیینی(مشروعیتینی) رد ائتمهیه و ایسلام رئسپوبلیکاسی رئژیمی ایله سیاسی، اقتصادی ایلگیلری دایاندیرماغا چاغیریبلار.
آکسییادا ایراندا یاشایان باشقا ائتنیک قوروپلارین نمایندهلری ده ایشتیراک ائدیب. بو، گونئی آذربایجانلیلارین میللی حقوقلارین تأمینی ایله باغلی ایرهلی سوردوکلری ایستکلرین رئاللیغی عکس ائتدیردیگینی بیر داها تصدیقلهییر. آکسییا ایراندا دَگیشیکلیگین آذربایجان تۆرکلرینین آپاریجیلیغی ایله تأمین اولوناجاغینی ایثباتلاییر.
یۆرۆش دیاسپورلا گونئی آذربایجاندا میللی حقوقلارینین تأمینی اوغوروندا موباریزه آپارانلارین مؤوقعلری و هدفلرینین ده بیر اۏلدوغونو تصدیقلهدی.»
چئویرن: حبیب ساسانیان (یاکاموز)