1305ده ماراغادا ایشچی عایلهده بیر اوغلان اوشاغی حیاتا گؤز آچدی. آتا- آناسی اوشاغین آدینی «ماحمود آغا» قویدولار. مشروطه انقلابی، شاهلارین، اربابلارین آیاقلارینین آلتیندا تاپدالانمیش، ازیلمیش بیر خالقین، دیلینه، یولونا، دوشونجهسینه چئوریلیمیشیدی. اویانـیش روحو، ترپنیش روحو، اللرین، ائللرین بیرلشمهسی گونویدو. ادبیاتیمیزدا «بولود قاراچورلو» «سهند» تخلوصیله تانینان« ماحمود آغا» بئله بیر آتمسفئرده بویا باشا چاتیردی. هله 15 یاشینا چاتمامیشدی وطنی متفقلرین طرفیندن ایشغال اولونموشدو. «سهند» اورتا مکتبی بیتیرمهدن دایانیش یولون -دؤیوش یولون سئچدی. عدالتسیزلیگه قارشی، خالقینین سعادتی اوغروندا چالیشماغا باشلادی: «سهند» ایلک شعرین 1324ده آذربایجان دموکرات فرقهسینین همت ایله یارانان«شاعیرلر مجلیسنده» اوخویور. سهند 19یاشیندا مدینه گولگون، بالاش آذراوغلو، محمد بیریا، علی توده، مظفر درفشی، هاشیم ترلان، یحیی شیدا، سلیمان رستم… و اونلار داهی شاعیرله شاعیرلر مجلیسینده تانیش اولور. شاعیرلر مجلیسی سهندین ادبی اجتماعی، سیاسی دوشونجهسینده اونودولماز تاثیر بوراخیر.
دئمک آذربایجان ادبیاتی، شاعیرلر مجلیسی مشروطه انقلابینا، «شیخ ممد خیابانی» آرزیلارینا، ایستکلرینه اینانان، وفالی قالان موباریز بیر شاعیر دوغموشدو،
یئنی بیر سس، یئنی بیر نفس یورولمادان ائلینین، خالقینین داردا قالمیش آرزولارینی یازیب یارادیردی «آراز آخیردی»، «منظوم خاطیرلر»، «سازمین سؤزو»… او آرزولارین ترنومچیسیدیر.
تاریخلر بویونجا ائی بؤیوک وطن
یاغییا، دوشمنه اییلمهدین سن
بوگون طبیعتدن ایلهام آلدیم من
گئچدی سحر واقتی بو سؤز اورکدن
اینسانا روح وئرهن دیلینه آلقیش
آتاسی قورقود سهندین حیاتینا اونودولماز ایشیق ساچمیشیدی. او درین ایزی اونون بوتون یازیلاریندا گؤرمک اولار، یورد سئوهرلیک، ائل سئوهرلیک «سهندین» اول آخیر سؤزودو،
آنجاق بیر سؤزوم وار: منده اینسانام
دیلیم وار، خالقیم وار، یوردوم یووام وار،
یئردن چیخمامیشام گؤبهلك كیمی
آدامام حاققیم وار، ائلیم اوبام وار
قول یارانمامیشام یاراناندا من
هئچ كسه اولمارام نه قول نه اسیر
قورتولوش عصریدیر اینسانا بو عصر
اسیر اولانلارین بوخووون كسیر.
«شهریارا مکتوب»، شاعیرین قالارقی اثرلریندن بیریدیر. شهریارا مکتوب صنعت باخیمیندان« سهندین» گوللری کیمی الوان، بولاقلاری کیمی آشیب داشان، حبیب ساهیردن سونرا چاغداش شعریمیزین ایلک نمونهلریندن و ان گؤزل و دیرلی نمونهلریندندیر.
اؤزگه چیراغینا یاغ اولماق بسدیر
دوغما ائللریمیز قارانلیقدادیر
یانیب، یاندیرمایاق یادین اوجاغین
ائویمیز سویوقدور، قیشدیر، شاختادیر
«یاساق نغمهلر» اوددور، آتشدیر، جانلاری یاندیریب آلیشدیران بیر مشعلدیر. بو شعرلر یالنیز و یالنیز موباریزه مئیدانیدا بئله ایتیله بیلردی.«یاساق نغمهلر» حقیقتده سهندین اؤز حیاتی و یوزلر زیندانینین، کؤچرینین، قوْلوباغلی، دیلیباغلی اینسانین دیلی، گؤزو و سؤزودور.
اذربایجان دموکرات فرقهسینین سرکوبوندان سونرا آذربایجاندا مختلیف جمعیتلر یارانیر، (جمعیت مبارزه بافاشیسم، جمعیت مبارزه با استعمار، جمعیت صلح۰۰۰) سهند، محمدعلی فرزانه، دوکتور کاتبی، ونسان، عبدالرحیم طهوری، بقایی صولح جمعیتینین مدیره هئیتینین عضولریایدیلر. سهند دوستلاریلا بیرلیکده او اتهاما توتوقلانیرلار. او گروهی ایکی دستهیه بؤلورلر: یاریسی اردبیل ده دوستاق اولور، یاریسی ماراغادا. 1331ده سهند دوستلاریلا بیرلیکده تبریزه محاکمه اولولار.
ماحمود قارا چورلو «سهند» ۱۳۳۲ ده صولح جمعیتینین هئیت مدیرهسی ایله بیرلیکده شاهین زیندانلاریندان اؤزگور بوراخیلیر.
سهند زنداندان سونرا تهرانا گلمک مجبوریتینده قالیر. تهراندا تریکو بافی سانترالی یولا سالیر. اذربایجانین مشهور طناز آکتوری اوزون ایللر زندانلارین یورغونو ممدباقرحاجی زاده، بهروز دولت آبادی «چای اوغلو»، گنجعلی صباحی، احمدبرادران و دیگر جلای وطن ائدنلر، دوستاقلاردان قورتولانلار، «ماحمود قارچورلو»(سهندین) ان یاخین دوستلاری تریکو سانترالین ایشچیلری اولورلار.
«سهند» زنداندان بوراخیلسادا، امما هله ده آنادیلی و ائلینین نغمهلری تاریخی یاساق ایدی.
اؤز وارلیغینا اینانان، سؤیکهنن، آنادیلینین دادیندان دویمایان شاعیر، طبیعی انسانی حاقلارینان محروم اولان شاعیر، ظالیملره قارشی اؤز خالقینین طالعی حاقیندا بئله یازیر،
طالعیمه سن باخ
دوشونجهلریم یاساق
كئچمیشیمدن سؤز آچماغیم یاساق
آتا بابامین آدین چكمهییم یاساق
آنامدان آد آپارماغیم یاساق
بابا دییاریم ایسه
پیتراق پیتراق بیلیرسن
دوغولاندا بئله
اؤزوم بیلمییه بیلمییه
دانیشماغیم دا یاساق ایمیش، یاساق..
کریم قربانزاده