بیز آلداندیق سیز آلدانمایین
🔹هندده 22 رسمی دیل وار کی بونلاردان بیری هیندیدی (Hindi). بیر چوخ ایالتلر دیل اساسیندا بؤلونوب و ائییتیم* سیستمی هر ایالتین اؤز دیلی و انگلیسجه اساسیندادی. آمریکادا گؤردوگوم قدر، آنادیللری فرق ائلیین هندلیلر انگلیسجه دانیشیرلار.
🔹هندلی دوْستوم چوخ وار. کئچن ایللرده هندلیلر آراسیندا چوخ دانیشیلان مسئلهلردن بیری دولت طرفیندن آپاریلان دیل سیاستیدی. ایندیکی هند دولتی بیر ناسیونال هیندو (Hindu Nationalist) دولتیدیر کی بیر چوخ امتیازلار هیندو مذهبینه، هابئله هیندی دیلینه تصویب ائتمهیه چالیشیر. بو امتیازلاردان بیری هیندی دیلینین اؤیرهنیلمهسینی غیرهیندی ایالتلرده اجباری ائتمهسیدی. باشقا سؤزله، غیرهیندی ایالتلر اۆچ دیل اؤیرتمهلی اوْلورلار.
🔹بو سیاست آنادیللری هیندی اولانلاری سئویندیرسه ده، غیرهیندی ایالتلری بتر اینجیدیب. حتی هندلی دوستلاریمدان بیر آزی، مخصوصا تامیل نادو (Tamil Nadu) ایالتیندن اولانلار، آرتیق هنددن مستقل اوْلماق و اؤز اؤلکهلرینی قۇرماقدان* دانیشیرلار.
🔹دولت، هیندی دیلینه امتیاز وئرمک دلیللرینی بئله دئییر:
- بیر چوخ اؤلکهلره تای، هند اؤلکهسینی تمثیل ائدن بیر دیل لازمدی و بو دیل هیندی اوْلمالیدی، چونکو خالقین ۴۴% بو دیلده دانیشیر.
- استعمار دیلی یئرینه، هند دیللریندن بیری مشترک دیل اولمالیدی
- باشقا دیللرله ایشیمیز یوخدور و هیندینی تحمیل ائتمیریک، سادجه ترویج وئریریک.
- حتی غیرهیندیلرده بو طرحی سئویرلر، چونکو اونلاردا بیلیرلر کی بیزیم کیملیگیمیز* هیندیدی و دونیا بیزی بئله تانیمالیدی.
🔹باشقا طرفدن ایسه، غیرهیندیلرین مخالفت نهدنلری* بونلاردان عبارتدی:
🔹• بو طرح صرفا لاپ چوخ دانیشیلان دیلی، باشقالارینا تحمیل ائتمک ایستهییر.
- انگلیسجه کیمسهنین آنا دیلی دئییل و اونا گؤره هامی بو دیل قارشیسیندا بیر سطحدهدیر. آنجاق بو طرح غیرهیندیلری ایکینجی درجهلی وطنداش* ائدهجک و هیندیلره سیستماتیک بیر امتیاز یاراداجاق. بیز آرتیق باشقا استعمار ایستهمیریک.
- بو طرح اتحاد یاراتماق یئرینه، نفرت یارادیر.
- هند، بیر دیل و کۆلتور اساسیندا یوخ بلکه تنوع اساسیندا قۇرولوب. هنده استقلال قازانانلار هئچ زامان بیر قومیتی باشقالاریندان اوستون گؤرمک ایسته مهدیلر. ائله بونا گؤرهده بو قدر مختلف میللتلری بیر بایراق آلتینا آلا بیلمهنی باشاردیلار.
- انگلیسجه تکنولوژی و بیزنس دیلیدی و بو دیلی اؤیرنمکله بیر چوخ فرصتلری قازانماق اولار. هیندی دیلی ایله نه ائده بیلَجهییک؟
سؤزلوک:
ائییتیم: آموزش – قۇرماق: برپا ائتمک، تاسیس ائتمک – کیملیک: هویت – نَهدَن: دلیل – ایکینجی درجهلی وطنداش: شهروند درجه دو
رحمان خرمفر