خالقینین قارانلیق گونلرینه ایشیق آپاران آدام
بیلمیرم او داغ ایدی یوخسا آدام. یادا داغ دایاناتلی آدام. آذرین ایگیرمیایکیسی اونون دوغوم گونویدو. قانلی آذرین ایگیرمیایکیسینده تبریز کوچهلرینی دولانیب بو شعری سؤیلهدی ایگیرمیاوچ یاشلی زهتابی:
بلی داش یاغسادا گؤیدن سن اوسان، من ده بویام
واردی سنین باشقا آنان، واردی منیم باشقا آنام
و نهایت
گون گلر، صفحه چؤنر، مجبور اولارسان گئدهسن.
بو میصراعلاری ائله بیر دورومدا سؤیلهییب کی، هر کوچه باشیندا بیر جلاد “آذربایجانی یوز ایل سوسدوردوق” دئیه باغیریردی آما دویدوغونوز کیمی زهتابیده ذره قدر اومودسوزلوق و قورخو یوخویدو. او اومودون اؤزو ایدی.
قانلی آذردن ایکی ایل سونرا، زهتابی ایکی ایل موددتینده سیبری بوزلاقلارینا سورگون ائدیلدی. زهتابینین اوردا نهلر چکدیگینی نه من حیس ائده بیلرم نه بو سطیرلری اوخویانلار. آه، آه، کئشگه بو سطیرلری یازماغا مجبور اولمازدیم.
هاوا صیفیر آلتی اوتوز-قیرخ درجهده، یوغون ایپلری سورگون وارلیغیمیزین ساغ چیگنیندن سالیب سول قولتوغوندان کئچیریردیلر حئیوان استالینچیلر.
دوغرانمیش اودونلاری آغیر سوروتمهلره یوکلهییب قار اوستونده چکیردی تورکون انقلابچی بیلگینلری. گونده اوندؤرد ساعات و بئله آجیناجاقلی ایللرده زیندانیلر اؤزلرینی اؤلدورمهیه فورصت آختاریردی. آما زهتابی دئییردی: قالیرام خالقیما مشعل آپارام
ایران انقلابیندان سونرا، باشباخان مهدی بازرگاندان مثبت جاواب آلیب تیرین اوچونده وطنه گلدی. آما دؤرد ایل سونراسی هئچ بیر گوناهی اولمادان توتوقلانیب دؤرد ایل بیرگون محبوس ائدیلدی. دئییرلر تبریز زیندانی او ایللر آچیقجاسینا جهنم ایمیش. آلتمیش یاشلی قوجا پروفسور، او ایشکنجهلر و آلچاتمالارا نئجه دؤزهبیلرمیش.
او مشعل اینانیلماز درجه آلچاق کؤنول بیر آدام ایدی. بو قدر مجادلهدن سونرا یازدی: تورک کولتورو و ادبیاتینا کیچیجیک خیدمت ائتمیش اولسام، اؤزومو خوشبخت و بختیار حیس ائدرم.
ابراهیم ساوالان