دوْکتور حسین محمدزاده صدیق
قالاسی دئییلم سیزین بو یورددا،
یوْلومو گؤزلهییر گؤزل وطنیم.
ائلیمین آغرییان یاراسییام من،
قلبیمی تبریزده باسدیرین منیم.
بادام آغاجلاری گۆللهنن گۆنده،
گؤی مچیدده قؽلین اؤلو نامازین،
ارکین قوْخوسویلا عطیرلندیرین،
کؤنلومون ان درین راز و نیازین.
عؤمرونون ان گنج چاغلاریندان دیلیمیزله ادبیاتیمیز اوغروندا گئجه-گۆندوز چالیشیب قلم وورماقدان یوْرولمامازلیغی اؤزونه یاشام یوْلو سئچمک حسین محمدزاده صدیقین یاشاییش حیکایهسینین اؤزتیدیر. نسیمی، فضولی، نباتی، صراف، صابیر، هیدجی و… کیمی کلاسیک شاعیرلریمیزین دیوانلارینی تاپیب، تصحیح، تحشیه و ساهمانلاماقدان سوْنرا اؽشیق اۆزونه چؽخارماق درین دیقّت، آغیر حؤصله، آلقیشا دگر چالیشماق ایستر.
کاشغارلی محمودون «دیوان لغات الترک»، میرزا مهدیخان استرآبادینین «سنگلاخ» سؤزلوگونو دوْغرو-دۆزگون بیر شکیلده چاپا یئتیرمک یوخاری ساواددان باشقا، عؤمور قوْیوب چالیشماق ایستر. هله نه یاخشی امیر علیشیر نوایینین اثرلری اۆزرینده چالیشدیغینا گؤره اؤزبکیستانین تهرانداکی ائلچیسی الیندن اوْ دؤلتین فخری میدالی سینهسینه تاخیلدی.
اینقیلابین ایلک چاغلاریندا «یوْلداش» کیمی درگینی، سوْن زامانلاردا دا خلف اوْغلو ائلدار بیگین ایش بیرلیگی ایله «نامه صدیق» کیمی درگیلری چؽخارماقلا حرفهای ژورنالیزمه دامغانی باسماق، قارشینیزدا باش اگمگی یئتیرلی قؽلمیر اوستاد. بیر قلم صاحیبینین اؤزونه درگیسی اوْلا-اوْلا باشقا درگیلره ده مقاله وئرمهسی اوْ اینسانین بؤیوک بیر اۆرگه صاحیب اوْلدوغونو گؤستریر.
«آنا وارلیق» درگیسینی چؽخارماغا باشلادیغیمیز ایلک گۆندن، آدلارینین درگیمیزین یازیچیلار قورولو لیستینده یازیلماسی وازکئچیلمز بیر مسئله ایدی، نییه کی اوستاد صدیقین مقالهسی اوْلمایان آزاراق ساییمیز اوْلموشدور.
اوستاد، بو گۆن بیزی قوْیوب بو دۆنیانی ترک ائتسهنیز ده، قلمینیز یئرده قالمایاجاقدیر و بو سیزین کیمیلرین کؤنلونو سئویندیرر. دیلیمیز و ادبیاتیمیز اوغروندا بارلی عؤمور سۆردوگونوز اۆچون چوْخ ساغ اوْلون اوستاد.
«آنا وارلیق» درگیسینین تحریریهسی بو آغیر ایتگینی بۆتون ائلیمیزه باش ساغلیغی وئریب، قالانلارینا جان ساغلیغی آرزیلاییر.