دیدیلیب داغیلان ائلیمیز بیر اولسون
ایران اوستانلار تقسیماتی، دیل و دین فاکتورلارینی نظره آلمایاراق، بعضن ده؛ دیللری و دینلری بیر اولان اینسانلاری بیر-بیریندن اوزاقلاشدیرما مقصدیله ایجرا ائدیلمیشدیر.
قاجالارین تقسیماتیندا، بیر واحید ایالت کیمی گؤزه چارپان آذربایجان، ایرانین بوگونکو بؤلمهلرینده سککیز-دوققوز اوستان آراسیندا دیدیلیب داغیلیبدیر. قاجالارین بئش ایالتی رضاشاه سلطنتینین ایلک یاریسیندا آلتی ایالته و 1316دا اون اوستانا و 1346دا ایگیرمی دؤرد اوستانا بؤلوندو. بیرینجی آددیمدا زنجانی و ایکینجی آددیمدا همدانی موستقیل اوستان ائدرک آذربایجاندان آییردیلار. آستارا گیلانا و گروس ماحالی کوردوستانا وئریلدی. جمهوری ایسلامی دؤنمینده اردبیل و قزوینی آذربایجاندان آییراراق اونلاردان و تورکلویو سیلمهیه چالیشدیلار.
بو میندار سیاست، هله آذربایجاندان خاریج تورک شهرلرینه گلینجه، داها شیدتلی و نیفرتلی ایجرا ائدیلمیشدیر. بو شهرلرین هرهسی بیر اؤزگه ایالته پای وئریلهرک رسمی دایرهلر طرفیندن اونلارین تورکلویو اینکار ائدیلدی.
آما باشقا طرفده…
سپاه پاسداران تبلیغات شوعبهسی، بوکان شهرینین بیر چوخ دووارلارینا «کوردوستان ایسلامین محکم قالاسیدیر» جوملهسینی یازماقلا او شهری کوردوستان شهری کیمی تانیتماغا چالیشیر آما هئچ زامان آستارانین سپاهی او شهرین دووارلارینا «آذربایجان ایرانین باشیدیر» جوملهسینی یازیب اورانین آذربایجان شهری اولدوغونو وورغولامیر. ندن؟
مسلهنین داها قورخونج و تهلوکهلی یؤنو بوراسیدیر کی، بئله بیر داورانیشلاری همی حوکومته باغلی اولان اورقانلاردان، همی اونا قارشی دوران اوپوزیسیون قوروپلاریندان گؤرورک. بونا گؤره، ایرانین بو غئیری اینسانی تقسیماتینین، انبؤیوک قوربانلیغی تورک خالقیدیر.
ابراهیم ساوالان