روسیانین اجباری کؤچوردوگو اوکراینالی اوشاقلارین طالعی تهلوکه آلتیندادیر
آزیاشلیلارین زورلا کؤچورمه پروسئسینده جینسی ایستیثمارا(بهرهبرداری و سوءاستفادهی جنسی یه) معروض قالماسینا قارشی، «قادینلار اوکراینا نامینه» “Women For Ukraine” و باشقا بینالخالق تشکیلاتلار خبردارلیق ائدیب.
۲۰۲۲-جی ایلین فئورال آییندا روسییانین اوکراینایا قارشی نظامی موداخیلهسینین گؤرونن اۆزوندن علاوه، سونراکی ایللرده اؤزونو گؤسترهجک فسادلاری دا وار. اونلارین آراسیندا اؤلکهنین خئیلی سایدا اهالیسینین مجبوری شکیلده کؤچورولمهسی و یا محاربهنین یاراتدیغی دؤزولمز شرایط اوجوباتیندان اؤلکهنی ترک ائتمهسی، یئتیشمکده اولان نسلین گۆجلۆ پسیخی تراومایا(روحی-روانی ضربهیه) معروض قالماسی و آیریلارینی گؤسترمک اولار. بئله کی، اوشاقلارین فیزیکی و جینسی ایستیثمارینا، محاربهدن اذیت چکمهسینه قارشی موباریزه آپاران بینالخالق تشکیلاتلارین الده ائتدیگی معلوماتلارا و آپاریلان موشاهیدهلرینه گؤره، روسلارین ایشغال ائتدیگی اراضیلردن مۆلکی شخصلر( غیرنظامیان)، او جملهدن اوشاقلار کوتلهوی(دستهجمعی) شکیلده روسییایا اجباری کؤچۆرۆلۆرلر. آنجاق قونشو اؤلکهده هئچ ده اونلارین هامیسینی خوش گلهجک و راحات حیات شرایطی گؤزلهمیر.
الده ائدیلن معلوماتلارا گؤره، ایشغال ائدیلمیش اراضیلرده یاشایان اوکراینالی غیرنظامیلرخصوصی حاضیرلانمیش قاتارلاردا روسییا فئدئراسییاسینین درینلیگینه و اوجقار ویلایتلرینه داشینیرلار. اوکراینادان اجباری کؤچورولن اینسانلار، خصوصیله اوشاق و قادینلار روسییا فئدئراسییاسینین موختلیف بؤلگهلرینه سؤزون اصل معناسیندا، اجباری کؤچورولورلر. یعنی بیر اؤلکهنین وطنداشلاری اصلینده اونلارین اکثریتینین ایرادهسینه ضد اولاراق باشقا اؤلکه داخیلینه، تخمیناً ۹۰۰۰ کیلومتر اوزاغا گؤندهریلیرلر. بیرلشمیش میللتلر تشکیلاتینا (ب.ائم.تی) عضو اؤلکهلرین تانیدیغی اوکراینانین دؤولت سرحدلرینه داخیل اولان، آنجاق بو یاخینلاردا روسییانین ترکیبینه قاتیلمیش اراضیلردن زورلا کؤچورولموش شخصلرین ساییندان معلوم اولور کی، اونلار اَوَلجَه اسیرلر کیمی، الوئریشسیز(نامناسب) وضعیتده یوک ماشینلاری ایله اوکراینا ایله همسرحد(هممرز) اولان روسییا اراضیلرینه و داها سونرا دمیر یولو ایله تاقانروقدان خابارووسکا آپاریلیرلار. ان دهشتلیسی ده بوندان سونرا باشلاییر. بئله کی، اوکراینادان اجباری کؤچورولن لره ایستینادن بینالملل تشکیلاتلارین وئردیگی معلوماتا گؤره، اؤنجه تاقانروقدا اونلار ترانزیت دوشرگهلره، داها سونرا ایسه روسییا فئدئراسییاسی اراضیسینده اوکراینالیلار اوچون حاضیرلانمیش بؤیوکلر و اوشاقلار آیری-آیری دوشرگهلره یئرلشدیریلیرلر. اوکراینالی عائلهلر معین مرحلهدن سونرا پارچالانیر، اوشاقلار والیدینلریندن آیریلیر. بینالملل هومانیتار حقوقون بوتون پرینسیپلرینه ضد اولان بو تدبیرلرین اساس مقصدی اوکراینالی اوشاقلارین سونرادان روس عائلهلری طرفیندن اؤولادلیغا گؤتورولمهسینی آسانلاشدیرماقدیر.
آنجاق همین مرحلهیه قدر اوکراینالی اوشاقلار داها جدی تهلوکهلرله اۆزلهشیرلر. روسییا فئدئراسییاسینین باشقا سوبیئکتلرینه، اؤلکهنین داها درینلیکلرینه داشینما پروسهسینده اینسانلارین نورمال یاشاییشی اوچون شرایطین یارادیلماماسی، قاتارلاردا رطوبت و کیفسیگین اولماسی، هابئله تمیزلهییجی ماددهلرین، تمیز سویون و یئیینتینین اولماماسی، اوستهلیک سویوق هاوانین مؤوجودلوغو الوئریشسیز(نامناسب) و غیر بهداشتی وضعیتی داها آجیناجاقلی ائدیر. بونون نتیجهسیدیر کی، بؤیوکلرده و اوشاقلاردا چوخسایلی خستهلیک و اینفئکسییا (عفونت) حاللاری باش قالدیریر.
وضعیتین ان آجیناجاقلی طرفی ایسه اودور کی، اجباری سۆرگۆن اوشاقلار آراسیندا سون مرحلهده ایدزه یول آچان اینسانین ایمنی چاتیشمازلیغی ویروسونا (İİV) یولوخما حاللاری داها گئنیش یاییلیب. بونلارین سببینی آراشدیرماق اوچون چوخ دا اوزاغا گئتمک لازیم دئییل. بئله کی، روسییا فئدئراسییاسیندا تعیینات یئرلرینه (اصلینده اسیر دۆشرگهلرینه) چاتدیریلما پروسئسینده اوکراینالی اوشاقلار تئز-تئز زورلانما و جینسی ایستیثمارا(بهرهبرداری یا سوء استفادهی جنسییه) معروض قالیرلار. بو فاجعهلی مسئلهده تکجه نقلیات و داشیما پروسئسینده ایشتیراک ائدنلر یوخ، هم ده بو اوشاقلارین فیلتراسییا دۆشرگهلرینده قایغیسینا قالمالی اولان شخصلر مسئولیت داشیییرلار.
همین اوشاقلارین تعیینات نقطهسین ده دری-زؤهرَوی خستهلیکلرین(بیماری های مقاربتی-پوستی) یاییلماسی تهلوکهسینه گؤره معاینه اولونماسی اونلارین روسلار طرفیندن اؤولادلیغا گؤتورولمهسی پروسئسی ایله باغلی اولسا دا، اصل حقیقت همین واخت اورتایا چیخیر. بئله کی، طیببی آنالیزلر زامانی دری-زؤهرَوی خستهلیکلر (بیماری های مقاربتی پوستی] و یا ایدز آشکارلانانلار «نئویراپین» درمانیندان گئنیش ایستیفاده اولونماقلا معالیجه اولونورلار. روسییانین آیری-آیری بؤلگهلرینده یئرلشن همین اوشاق اسیر دوشرگهلریندن طلب ائدیلن «نئویراپین» درمانینی عمومی میقداری ایندییه کیمی باش توتموش اونلارلا کؤچورمهنین هر بیرینده یۆزلرله اوشاغین زورلاندیغینی گؤستریر. عینی زاماندا، روسییا فئدئراسییاسینداکی اوشاق اسیر دوشرگهلرینده یاشاییش شرایطی موختلیفدیر. بئله کی، اؤولادلیغا وئریلمک اوچون سئچیلمیش اوشاقلار آیریلارینا گؤره داها یاخشی شرایطده ساخلانیلیرلار. بۆتۆنلۆکله، همین اوشاقلار طیببی-بهداشتی باخیمدان شرایطی اولدوقجا آغیر اولان و توتوموندان دفعهلرله آرتیق اینسانین یاشادیغی یئرلردیر.
غرب اؤلکهلرینده فعالیت گؤستهرن هومانیتار تشکیلاتلار(انسان سئوَر قوروملار) واسطهسیله یاییلان بیلگیلره گؤره، همین تأمینات یئرلری، سؤزون اصل معناسیندا اسیر دوشرگهلرینی اؤزونده احتیوا ائدیر. روسییادا اینسانلیغا قارشی ایشلهنن بو جور جینایتلرین گئرچک اولماسی بارهده خبرلری حادثهلری داخیلدن موشاهیده ائدن شخصدن آلان بینالخالق تشکیلاتلار همین شخصین حیاتینی تهلوکه آلتینا آتماماق اوچون آدینی گیزلی ساخلاییرلار.
بونونلا یاناشی، اوکرایناداکی بیر چوخ آکتیویست و فئمینیست قوروپلارین دا روسییانین بوتون بینالخالق کنوانسیا و حقوقی سندلره ضد اولاراق آپاردیغی اجباری سۆرگۆن نمونهلریندن خبرلری وار. حتی ۲۰۱۴-جو ایلدن اوکراینانین لیوۏو (Lvov) ویلایتینده فعالیت گؤستهرن فئمینیست تشکیلاتلاریندان بیری اولان «فئمینیست آتلیهسی»نین “Feminist Workshop” یایدیغی معلوماتدا روسییادا یارادیلمیش بو اسیر دوشرگهلری ایله ایکینجی دونیا ساواشی زامانی آلمان-ین ناسیستلری طرفیندن تشکیل ائدیلمیش معلوم دوشرگهلر موقایسه ائدیلیر، پوتین روسییاسینداکی بو دوشرگهلری ۲۱-جی عصرین «کونسلاگئر»لری آدلاندیریلیر. عینی زاماندا، همین تشکیلاتلار (اونلارین ایشتیراکی ایله کئچیریلن موصاحیبهیه کئچید:
https://www. youtube.com/watch?v=4aw5AVrl5ng
روسییانین اوکراینایا هوجومو ایله باشلایان ایشغال پروسهسی ایله ایکینجی دونیا ساواشی آراسیندا، هابئله روسلار طرفیندن ایستیفاده اولونان «ز-Z» سیموولو ایله آلمانییا ناسیستلرین «سواستیکا»سی آراسیندا بؤیوک اوخشارلیق اولدوغو فاکتینا دقت چکمیشلر.
یوخاریدا قئید ائدیلدیی کیمی، غربدهکی هومانیتار تشکیلاتلار، بینالخالق فئمینیست تشکیلاتلاری و دایرهلری ده محاربه جینایتی حساب ائدیلن مسئله ایله جدی ماراقلانیرلار. مثلاً، آمریکا وطنداشی جون کئترین مینیکس (June Kathryn Minix) و اونون رهبرلیک ائتدیگی تشکیلاتین بو ساحهده گؤردویو ایشلری گؤسترمک اولار. یوخاریدا قئید اولونان مؤوضوعلاری بینالخالق کنفرانس، توپلانتی و فوروملاردا گوندهمه گتیریر، اوکراینادا زوراکیلیغا معروض قالان قادین و اوشاقلارین طالعی ایله ماراقلانان باشقا بینالخالق تشکیلاتلاری دا مسئلهنین بینالخالق اجتماعیته چاتدیریلماسی ایشینه جلب ائتمهیه چالیشیر.
یئری گلمیشکن، C.K.Miniksin رهبرلیگینده تمثیل اولونان «قادینلار اوکراینا نامینه» ((“Women For Ukraine” تشکیلاتی اوزون مدتدیر کی، روسییانین آپاردیغی ایشغالچیلیق ساواشی زامانی قادین و اوشاق حقوقلارینین پوزولماسی ایله باغلی جدی مؤوضوعلاری گوندمده ساخلاییر، ساواشدان اذیت چکن اوکراینالیلارا مادی یاردیم و کؤمک گؤسترمک اوچون (نقدی یاردیم-بودجه) توپلاییر.
اونو دا خاتیرلاداق کی، “Women For Ukraine”غیری حکومت تشکیلاتی اولوب، اساس مأموریتی گلوبال تدبیرلردن ایستیفاده ائتمکله، آکتیو ساواش بؤلگهسینده اوکراینالی قادینلارین اۆزلشدیگی ان حساس مسئلهلرله باغلی معاریفلندیرمه ایشلری آپارماقدادیر. ان اساسی ایسه C.K.Miniksin هم تأسیسچیسی اولدوغو تشکیلات (Women For Ukraine) حاضیردا اوکراینادان اجباری سۆرگۆن ائدیلمیش اوشاقلارین جینسی ایستیثمارا معروض قالماسینا، اسیر دوشرگهلرینده ساخلانیلماسینا و مجبوری اولاراق روس عائلهلرینه اؤولادلیغا وئریلمهسینه قارشی کامپانییالار آپاریر. آکسییا اینتئرنئتده #UAChildrenCamps هشتگی ایله داوام ائتدیریلیر. بو، اوکراینالی اوشاقلارین مجبوری کؤچورولمسینه قارشی گلوبال اساسلی معلوماتلاندیرما حرکاتیدیر و اجباری کؤچورولنلرین محاربه جینایتی، سوی قیریمی آکتی اولدوغونو ثبوت ائتمهیه چالیشیر.
قئید ائدک کی «قادینلار اوکراینا نامینه» تشکیلاتی اوکراینالی اوشاقلارین مجبوری کؤچورولمسینه قارشی بیر چوخ آکسییا و تشببوثلره باشلایاجاغینی، معلوماتلاندیرمادان توتموش فیلتراسییا دوشرگهلرینین آشکار ائدیلمهسینه، ایلک اجباری کؤچورولنلرله باغلی اوکراینانین اساسلی حساباتلارینا(گزارشلرینه)، بیرلشمیش میللتلر تشکیلاتینداکی آمریکا سفیری لیندا توماس-قرینفیلدین بیرلشمیش میللتلر تشکیلاتی تهلوکهسیزلیک شوراسینین ایجلاسیندا «قادینلار اوکراینا نامینه» مؤوضوعسوندا چیخیشلارینا قدر، هامیسینی ایزلهییر و معلوماتلاری توپلاییر. تشکیلاتین اساس مقصدی بو محاربه جینایتلرینین قارشیسینی آلماق اوچون بوتون دونیانی آیاغا قالدیرماق و اوکراینالی اوشاقلارین زورلا سۆرگۆن ائدیلمهسینه قارشی داها جدی تدبیر گؤرمکدیر.
گؤرۆندۆیۆ کیمی، اوکراینادان زورلا اجباری کؤچورولن اوشاقلارین و قادینلارین طالعی ایله باغلی هشدار وئرن و اسیر دۆشرگهلرینه بنزر دۆشرگهلرده اوشاق جینسی ایستیثمارا معروض قالماسی حاللارینا قارشی آکتیو موباریزه آپاران C.K.Miniksin، اونون رهبرهلیک ائتدیگی، هم تأسیسچیسی اولدوغو تشکیلاتلارین، باشقا فئمینیست تشکیلاتلارین الده ائتدیگی معلوماتلار روسییا فئدئراسییاسی طرفیندن محاربه جینایتینین تؤرهدیلدیگینه دلالت ائدیر. بوتون بونلار ثبوت ائدیر کی، روسییانین اؤز سرحدلری داخیلینه اجباری کؤچورولن اوکراینالی اوشاقلارین طالعی جدی تهلوکه آلتیندادیر.
یازار: ائلئنا زامبئللی؛ کؤچورن و رداکتور: حبیب ساسانیان (یاکاموز)