ائل منیم آرخام، من کیمدن قورخام
بویوک فضولینین بیر حیکمتلی بیتی وار، اوردا بویورور:
دهر بیر بازار دیر، هر کیم متاعین عرض ائدر
اهل دونیا سیم و زر، اهل هنر فضل و کمال
حقیقتا ده بو دونیا بویوک بیر بازارا بنزهییر، بیر شئی وئریرسن، بیر شئی آلیرسان و بو آل-وئر لر ایچره یا قازانیر یا اودوزورسان.
انسانین الینده اولان ماتاحینی کیمسه اوجوز ایستیر، کیمسه باها، باجاریب ماتاحینی موشتریسینه ساتا بیلسن قازانیبسان.
منجه بو بازارین ان انصافلی و سخاوتلی موشتری سی “ائل” دیر. هر کیم اوز عومور ماتاحینی ائله ساتیرسا قازانیر، یعنی مطلق قازانیر و شخصا بو باره ده هئچ شبهه یوخومدور.
بابالارینیز دئمیشدیر ” ائل گوزو ترهزی دیر“. هر کیم اوز ماتاحینی اوترهزی یه قویا بیلیرسه، هئچ شوبههسیز اوز قیمتینی آلیر.
سوزومون شاهیدی سون گونلر آرامیزدان کوچن توحید قاغام دیر. ایندی بیر هفتهدیر آذربایجان مدنی توپلوملارینین تقریبا هامیسی یاس توتوب، و بوتون ائلیمیز بیر سس ایله توحیده قیمت وئردی. بلکه توحید اوزو ده اینانمازدی اونون عومور ماتاحینی ائل گوزو ائل ترهزی سی بئله آغیرلاسین.
منده بو ائلین بیر کیچیک ائولادی کیمی ماتاحیمی ائل ترهزی سینه قویموشام، هر زامان سخاوتلی ائل گوزو، منیم قارا دمیریمی قیزیل باهاشینا قیمتلندیریب، ایندی ده بو دوام ائدیر.
هم کئچن هفته توحید له باغلی، هم بوگون منیم دوغوم گونوم له باغلی، ائلیمیز بیر سس له یانیمدا دوروب بو کیچیک ائولادینا بویوک مینت قویدو. من بو سخاوتلی قیمتلرسن قارشیندا باش اگیرم و گوز یاشلاریمی گرو قویوب آند ایچیرم کی سون نفسیمه قدر ائلیمین قوللوغوندا وار گوجوم ایله دایاناجایام، و ائلین سخاوتینه نانکور اولمایاجایام.
آللاه هامینیزی وار ائلهسین و بو بیرلیکلری الیمیزدن آلماسین.
شاعیری ساخلایان ائل و ائلین قورویان شاعیر/دکتر فرمان فرضی