نیما یوشیج: پیشهوری بیر پیغمبر ایدی، افسوس کی آذربایجان اونون قدرینی بیلمهدی!
بؤیۆک نیکاندیش، اوستاد شهریارین لاپ یاخین یۏلداشی و سیرداشی اۏلاراق، اوستاد شهریارلا بیرلیکده یاشادیغی 35 ایللیک یۏلداشلیق خاطیرهلرینی «شهریارین خلوتینده» آدلی 4 جیلدلیک کیتابلاریندا بیزلره پای وئرمیشدیر.
«شهریارلا بیرلیکده اؤزگهلشمکدن اؤزلشمهیه دۏغرو» آدلی کیتابیمی یازدیغیم گۆنلر، حتی سۏنرالار دا، دؤنهلرله نیکاندیش جنابلارینین قوللوغونا چاتیب، کیتابلاریندا یازمادیغی، داها دۏغروسو یازا بیلمهدییی، خاطیرهلرله موضوعلار حاققیندا سۏرغولاریمی اۏندان سۏروشاردیم.
بیر گۆن نیکاندیش جنابلارینا دئدیم: «اوستاد شهریارین ایستر شعرلرینده، ایسترسه دانیشیقلاریندا هئچ زامان آچیقجا پیشهورینین آدینا راست گلمهمیشم. آنجاق، اۏنون بیر پارا شعرلرینین آلت قاتیندا پیشهورینین باشلادیغی اۏلایلارین ایزلرینی گؤرمکدهیم. سیز بیر زامان اوستاد شهریاردان “تهران و تهرانی” آدلی شعرینی نئجه و نه اۆچۆن یازماسی حاققیندا سۏروشموشدونوز، اۏ دا سیزه وئردییی جوابیندا “آذربایجان دموکرات فیرقهسیندن” آد آپارمیشدی. بو اوزون ایللر سۆرهجینده اوستادین یانیندا اۏلدوغونوزدان، ایستیرم گؤرم؛ اوستادین دیلیجه پیشهوری حاققیندا بیر سؤز ائشیتدینیزمی؟ یا اۏلدو کی باشقاسی پیشهوری حاققیندا بیر سؤز دئیه و اوستاد تپکی گؤستره؟!»
نیکاندیش جواب وئردی: «بیر گۆن بانکدا ایدیم؛ اوستاد شهریار منه زنگ آچیب دئدی: ایشدن چیخدیقدا گل بیزه، نیما یوشیج گلیب بورا…
اوستادین ائوینه گیردیییمده گؤردۆم شهریارلا نیما بیربیرلرینه جان دئییب، جان ائشیدیرلر. سؤز آراسی تهراندا اۏلدوقلاری گۆنلریندن ائلهجه ده تهرانلی شاعیرلرین کؤتو داورانیشلاریندان دانیشدیلار. بیردن نیما یوشیج هیجانلاناراق شهریارا دئدی: شهریارجان، سنین تبریزین وار ایدی، دوردون گلدین. منیم هارام وار ایدی باش گؤتۆرۆب گئدم؟
بو سؤز شهریارا چۏخ تأثیر ائلهدی و شهریار بیر آن سوسدوقدان سۏنرا دئدی: نیماجان، من پیشهورینی یاخیندان گؤرمهمیشدیم؛ دموکراتلارین حؤکومتینده ده، من تهراندایدیم. سن رضاخانین زیندانیندا پیشهورینی گؤرمۆشدۆن. اۏ نئجه آدام ایدی؟!
نیکاندیش دئییر، نیما بو سۏرغونو ائشیتدییینده اۆچ سئری سۏروشدو: شهریارجان دۆزۆنۆ دئییم؟!
شهریار دا هر اۆچ سئری دئدی: هن دا نیماجان، ایستیرم گؤرۆم اۏ نجور آدام ایدی.
سۏنوجدا نیما یوشیج دئدی: شهریارجان، پیشهوری بیر پیغمبر ایدی، افسوس کی آذربایجان اۏنون قدرینی بیلمهدی!».
ی س: نیکاندیش جنابلاری ایله ایکی دؤنه گؤرۆنتۆلۆ دانیشیق آپارمیشام. بو خاطیره ده، اۏ دانیشیقلارین بیرینده اۆنون دیلیجه نقل اۏلوبدور. قیسمت اۏلسا، بیر گۆن، اۏ گؤرونتولو دانیشیقلاری یاییملایاجاغام.