أن بؤیوک اینقیلاب؛ یئنی نسیل یئتیشدیرمک چابالاری دیر
یازدی: لطفاً سیزلر ماهر روزنامه نگارلارسیز. یاردیم ائدین، حرکتده بیرینجی نسیلل‌لری أمک‌لی(بازنشست) ائدک. چون نه‌قدر بونلار وار، بیز دونیادا رسمی اوپوزوسیونا چئوریله بیلمه‌یه‌جه‌ییک.
یازدیم:من، اون ایلدن چوخدور، بونو دئییرم، آمما اولماز. بیر نسیلی امکلی ائتمک چاباسی، ساده‌جه ایختیلافلاری چوخالدار؛ چونکو، بیز، ایندی دؤرد نسیل‌له اوز به اوزوک.
1)- یئتمیش یاشدان یوخاریلار: بونلارین هامیسی‌نین بئیین‌لرینده ایرانچیلیق اوتراق ائتمیش. او نسیلین طبیعی اؤلوب- قورتارماسین گؤزله‌مه‌لی‌ییک.
ایکی)_ قیرخ- یئتمیش یاشلی‌لار: بونلارین یوزده دوخسانی پان‌ایرانیست دیرلر (گؤرونمز پان‌ایرانیستلر). چوخو بیلمیر و قبول ائتمیر کی بئیین‌لری قوروموش. بو نسیل، بعضی فیکیرلری اوره‌ته‌بیلَر. بونلار تشکیلات قورا بیلرلر آمما دوشونجه‌لرینین درینلیگینده آزربایجانچیلیق، تورکچولوک و ایستیقلال ضعیف اولابیلر.
بونلار، چوخونلوقدا، عاییله و ایش صاحیبی اولدوقدان، موحافیظه‌کارلار دیرلار. بونلارین بو شانسی وار کی آزدان-چوخدان دئییشسین‌لر. آمما بو نسیلدن ساواشچی و رئژیم دَییشدیرن چیخماز. اؤزللیک‌له خانیملار، ایرانچی-فارسچی مئدیالارینا باغلی اولدوقلارینا گؤره، ایرانچی‌دیرلار.
3)- ایگیرمی-قیرخ آراسی یاشلی‌لار؛ موختلیف سببلردن دولایی، بونلارین بئینی، ایران، فارس و موللا رئژیمی ایله موخالیف دورومدا دیر. دیندن، موللادان، تراختورا اولان عدالتسیزلیکدن، ایشسیرلیکدن و … گیلایه‌لی دیرلر.
بونلارین بیر چوخو، ایران-فارس استعمارین آنلاییرلار. دئییشه‌رک، آزربایجان و تورکچولوک ائده بیلیرلر؛ آمما قورخاق نسیل و 1357 اینقیلابین سوی قیریمیندان ناغیل‌لار ائشیدیب، توتوقلانمالاری گؤروب، ایشکنجه خبرلرین ائشیدیب و … قورخاق دیرلار.
هابئله، مدرسه، رادیو-تیلویزیونلاردا، فارس رئژیم‌لرین پروپاقاندالارینا قوربان گئدیبلر. بونلارین سیاسی و دونیا گؤروشلری، بئیین آلتی و دوشونجه بونؤوره‌لری (زیر بنای فکری) یاریم یامالاق ایرانچی‌دیر؛ آمما فارسلا و فارس دیلی ایله موخالیف دیرلر. بونلاردان، آلتئرناتیو فیکیرلر و دوشونجه‌لر اورتایا چیخابیلر. تشکیلات قورماغا چابا گؤسته‌ریرلر.
4)- بیر – ایگیرمی یاش آراسی: بونلارین آنالاری تورکچو و آزربایجانچی اولورسا، میللی، تورکچو، آزربایجانچی، فداکار، قورخماز، عوصیانچی، عدالت آختاران، آزادلیق و ایستیقلال اوغوروندا جان آلان- جان وئرن نسیل اولاجاقلار.
بو نسیل، ایگیرمی-قیرخ یاشلی قورخاقلارین فیکیر اورونلرین ائشیده‌جک، او دوشونجه‌لرین اوستونه قات-قات آرتیراجاق. تشکیلاتلانماقدان چکینمه‌یه‌جک. تشکیلاتلاناجاق، سیاسی و دونیا گؤروشو، فارس و ایرانچیلیقلا درین قارشی- قارشییا دوراجاق.
بیر-ایگیرمی یاشلی‌لار، قورخوسوز، وطن‌پرور و جسور اینسانلار اولاجاقلار. وطن و میللتین آزادلیغی و گؤزل گله‌جگی اونلارین ألی ایله معنالاناجاق.
سؤزون اؤزَتی: ایندیدن، اون-اون‌بئش ایل واختیمیز وار، تا بیر یئنی آمما دوغرو-دوزگون نسیل یئتیشدیرک. واختیمیزی او بیری اوچ نسیله هدر ائتمه‌مه‌لی‌ییک.
قالان عؤمروموزو، یئنی یئتیشمه‌لریمیزه، فارس-ایرانچیلیقدان آلدیغیمیزدان باشقا تعریفلر و دوشونجه‌لر وئرمه‌لی‌ییک.
حاییف اولسون، بیزیم ایشه آلدیغیمیز سؤزلرین بیر چوخونون ایچه‌ریسی، ایران-فارس و موللا-شاه رئژیمی تؤرتدییی، معنالار، دوشونجه‌لر و دونیا گؤروشون داشییر. ایستر-ایسته‌مز، بیز فارس کولتورون، دوشونجه‌سین، دونیا گؤروشون و … داشیر و پایلاشیریق.
بیز (دوشونور تورکچولر) بیر دئوریم، بیر چاغ، بیر دوشونجه پارتلاییشینا یؤنَلمه‌لی‌ییک. یئنی بیر تورکچولوک، آزربایجانچیلیق، وطن‌پرستلیک، میللتچیلیک آنلامی یاراتماغا چابا و جهد گؤسترمه‌لی‌ییک.
بو چابالاری ایندی باشلارساق، اگر شانسیمیز دا اولورسا، یئنی نسیلین تورکچو، قورخماز، ساواشچی، دوشونجه‌لی، فدایی، فرقیلی باخیشلی، گله‌جه‌یه یؤنلو و اینکیشاف آماجلی اولماسینا یاردیمجی اولاریق.
ایندیکی، ایچ ایختیلاف و ساواشلاریمیز، الده اولان آز قووه و گوجوموزو ده ضایع ائدر.
بو ایختیلافلار، یئنی نسیلی یئتیشدیرمک فورصتی‌نی الیمیزدن آلار.
دوشونجه‌‌سیز و ایران-فارس مئدیا هئژمونوسی ایله یئتیشن نسیل‌لر، ساده‌جه بیر بیرلری ایله موجادیله ائدرلر. نئجه کی بو گونلرده، بیزیم اوچ نسلیمیز، بو خسته‌لیگه آلوده‌له‌نیب. اصیل دوشمنی (فارسچیلیق و ایرانی) گؤرمزدن گلیر. اؤز آرالارینداکی ایختیلافلاری، دوشمن قونومونا اوتوردوبلار. توم فیکیر و چابالارین، اؤزلرینین گوجسوزلنمه‌سینه صرف ائدیر.
اصیل دوشمن، موستقیل آزربایجانیمیزا حمله حالیندا اولارکن، بیزی، بیر بیریمیزین جانینا سالیب تا ایچه‌ریده کی و اونا قارشی چیخابیلن گوجوموزو خنثی ائتسین.
اصیل دوشمن قیراقدا اوتوروب، بیزیم آرامیزداکی جوزئی و طبیعی ایختیلافلاری (ایچیمیزده‌کی اللری ایله) خارلاندیریر، آلوولاندیریر.
نه‌دن بو ایختیلافلار، بو سطحیده، ایندی اورتایا چیخیب؟
نه‌دن بیز ایختیلافلاری، یاشاییریق؟
هر میللت، موشترک تعریفلر اوزه‌رینده بیر بیرلری ایله امکداشلیق ائدرلر. نه‌دن بیز بو تعریفلری یاراتماعا جهد ائتمیریک؟
اصلینده، بیزیم اینسانلاریمیز، باشقا_باشقا دیل‌لرله، بیر بیرلری ایله دانیشیرلار کی هر بیریسی، او بیریلری‌نین دیلین آنلامیر.
نه‌دن، تورکچولوک، آزربایجانچیلیق، میللتچیلیک، میللی منافع، دوشمن، دوست، تورک میللتی و تورک دونیاسی، تورک بیرلیگی، و بونلارین اوغروندا فداکارلیق، اؤلدورمک و اؤلمک بیر شرف دیر دییه ادبیات تؤرَتمیریک؟
نه‌دن وار گوجوموجوز ایختیلافلارین درینلشمه‌سینه، بیر نسیلی گؤرمه‌مزلییه، حتتا سیلمه‌یه جهد ائدیریک؟
چون، بیزلر دیلده و ظاهیرده، تورکچو و آزربایجانچییق. دوغرو تورکچو، میللتچی، وطن فدایی‌سی اولسایدیق، فرقیلی باخیش و اویانیشی، تشکیلاتلانمانی، نسیل‌لری اؤز اؤولادیمیز، اؤز آتا-آنامیز کیمی گؤرور. هئش بیرین سیلیب آتمازدیق. اونلاری، اویوندان چیغارتمازدیق. هر بیری ایله، او سَوییه‌ده داوراناردیق تا هامیمیز بیرلیکده، اصیل آماجیمیزا أل تاپاق.
هر آیدین بیلر کی دارالفنون قورولاندان بو گونه‌دک، آلتی نسیلیمیزین بئینی فارسچی-ایرانچی یئتیشمیش. هره‌نین آییلماق، دوشونمک، داورانماق و فداکارلیق سَوییه‌سینین فرقیلی تاریخی واردیر. هامی منله یا بیزله بیر زاماندا آییلماییب، آییلماغا دا زورونلو دئییل.
یئنی نسیل یئتیشدیرمک، دؤزوم، فداکارلیق و عفو ائتمک گوجو ایستر. اینتیقامچی روحلا، آیدین و فداکار، جاندان-مالدان گئچن نسیل یئتیشدیرمک اولماز.
بیر بیریمیزین ایختیلافلارین، سهولرین و ایشتیباهلارین گؤرمه‌مک و باغیشلاماق ایله، قورادان، حالوا بیشر، بارامادان ایسه اطلس أله گلیر.
سایقیلاریملا
اینصافعلی هیدایت /روزنامه نگار حرکت ملی آذربایجان، ساکن کانادا
