بوتؤو مملکتین تؤره ادبیاتی یوخسا امپراتورلوق ادبیاتی
بوتؤو مملکت ادبیاتی کؤکده بیر اولوب سونرادان پارام-پارچا اولونموش بیر وطن وارلیغینین أن آزی تؤره ادبیاتینی، دیلینی بیر بوتون گؤرمک ایسته ییر! بو بوتؤولوک ادبیاتینا هئچ بیر آن امپراتورلوق آدینی وئرمک اولماز.
تاریخ اوزرینده بیر بالاجا آختاریش ائدن هر بیر کس باشا دوشه بیلر کی امپراتورلوقلاردا بوتؤو بیر ممکلت یا حتی بؤیوک بیر مملکت سؤز قونوسو دئییل .
امپراتورلوق نئچه مملکتین؛ نئچه آیری-آیری میللتین باشی اوسته قورولاجاق بیر چوخ چئشیتلی وارلیق دیر.
بوتؤو مملکتین تؤره ادبیاتیندا پارام-پارچالیقلاری بیر اوجاق باشینا ییغماق امپراتورلوق ادبیاتی یاراتماق دئییل دیر!
امپراتورلوقلار اسکی زامانلار دینی آنلاییشلارلا توپراقلاریندا وار اولانلاری بیر یولون یولچوسو ائتمه یه چالیشیردیلار.
چاغداش دونیادا دا امپراتورلوغون آدینی گیزلدیب ایشینی گؤرَنلر، دونیانین اوباشیندان دوروب گلیب دونیانین بو باشیندا گوج قایناقلارینین باشی اوسته اولماغی دوشونن لر. دونیا گوجلری اولاراق میللت لری دموکراسی آدینا، مدرن – پست مدرن آدینا، بشر حاقلاری آدینا، قادین حاقلاری آدینا، یئنی دونیا دوزنی آدینا، … آلداندیریب اونلاری اؤز آنا وارلیقلارییلا، دین لریله، میللیت لریله اوز-اوزه قویوب باشلارینی قاتیرلار کی اؤز چیخارلارینی الده ائده بیلسینلر.
بوتؤو مملکتین تؤره ادبیاتینا دوغرو-دوزگون باخدیقدا بیز گؤروروک میللی تؤره چیلیکده بو گون بیر چوخلارینا خوش گلن دموکرا سی، بشر حاقلاری، قادین حاقلاری، آزادلیق سینیرلارینین هر بیریسی کؤک اولاراق، تؤره اولاراق بیزده وار اولموش وارلیقلاردیرلار. بو وارلیقلارین اوزَرینه قونان توز-توپراغی سیلمک، اونلاری یئنیدن دیم-دیک آیاق اوسته قویماق أن گرکلی اولان وطن بورجودور.
گیزلی امپراتورلوقلار یا داها دوغروسونو دئسک بو گونکو دونیا گوجلری میللی تؤره ادبیاتینا قارشی هر تورلو اویون اویناماقدادیرلار، اوینایاجاقلاردا! اؤزللیکله اؤز ایچریمیزدن اولوب یئنی دونیا گوجلرینین دانیشگاهلاریندا !!!، آراشدیرما مرکزلرینده !!! پایلاشدیغی بیلگی لره، یاراتدیقلاری پروژه لره اویانلاریمیزی سیاسی شخصیت اولاراق قارشیمیزا قویاجاقلار!
هردن ایسه آلدادیلمیشلاری گوج اییه لری قیلاجاقلار کی اونلارین اوزانتیلاری بیزیم میللی ادبیات سسیمیزی چوخ راحاتجاسینا بوغا بیلسینلر.
دونیا گوجلری بیر باشا بیزه دولایی یوللارلا بونو آندیراجاقلار کی، بوتؤولوک ادبیاتی ایمکان سیزدیر! اولاسی دئییل!
– فیلان توپراقلار داها ألدن چیخیب دیر اورالاردا میللی ادبیات اوجاغی آختارمایین.
– فیلان توپلومون بو گون مبارزه روحو سیزدن چوخدور، توپراقلارینیزی اونلارلا بؤلوشون! بوش-بوش میللی ادبیات شعاریدا وئرمه یین
– فیلان خیابانا بیر اووج آسفالت سالیب اورانین چالا-چولاسینی دوزَلتمک گوجو ده سیزده یوخدور، بوراخین بو بوتؤولوک ادبیاتینی
امپراتورلوقلارا یا دونیا گوجلرینه قارشی، اؤزللیکله اونلارین پروژه لرینی بیلر-بیلمز أله آلانلارا قارشی بیزده گرک اؤز مبارزه میزی یورودوب آلینما ادبیاتینین برنامه لری اوزره دورمادان میللی چالیشمالاریمیزی آردیجیل ائدیب اؤز ایچیمیزدن اولوب دونیا گوجلرینه آلدانانلاری دا اولدوقجا یولا گتیرمه یه چالیشاق.
رامین جبرائیلی اندریان (یاشار)