بو خێنا اۏ خێنالاردان دئییل آمما…
بیر چۏخ سیاست آلانێ‌نێن اوزمانلارێ‌لا عادی خالقێن دۆشۆنجه‌سی‌نین ترسینه اۏلاراق، بو گۆن ایولون آلتێسێ 2024- ایراندا 1403-جۆ ایل تیر آیێ‌نێن 16-سێ لا برابر، نهایت کی مسعود پزشکیان ایران پرئزیدئنتی وظیفه‌سینه سئچیلدی!
بیز تۆرکلر آراسێندا:«ایکی ایش وار، بیر عمل» دئییلن بیر سؤز واردیر. دیلچیلیک باخێمێندان بو تۆملج یانلێشدێر. چۆنکۆ ذاتاً ایش و عمل بیر سؤزدۆر. دۆشۆنۆرم مسعود پزشکیانێن سئچیلمه‌سی ده بونا تای یانلێش بیر توتوم ایدێر.
سؤزۆمۆن اساس بؤلۆمۆنه کئچمه‌دن اؤنجه، بیر نئچه مسئله‌یه تۏخونماق ایسته‌ییرم.
- مسعود بی پزشکیانێن ایران پرئزیدئنتی سئچیلمه‌سینی ایسته‌ین قیسماً گونئی آزربایجان میللی حرکاتێ چاپێندا میللی دۆشۆنجه‌لی‌لر بئله، «نهایت ایراندا ایلک دفعه بیر تۆرک پرئزیدنت سئچیلیر» فیکرینی یایماقلا، اؤلکه‌نین چۏخونلوقدا اۏلان تۆرک دیللی میللتینین سسینی قازانماق اییسته‌میشلر و بونو باشاردیلار. گئرچک‌لیکده ایسه، بو هئچ‌ده بئله دئییل.
- بو گۆن ایراندا بیرینجی سؤز صاحیبی اۏلان سئیید علی خامنه‌ای نین رسمی سایتێندا عرب کؤکنلی و 34 نسل ایله امام سجادێن تؤره‌مه‌لریندن اۏلدوغونون یازێلماسێنا باخمایاراق، اۏنون تبریز یاخێنلێغێندا خومناو آدلێ (خامنه) شهریندن اۏلدوغو دا دیللر ازبری‌دیر. بو آدام هیندیستانلێ روح‌الله موسوی خمینی دن سۏنرا بو گۆنه‌دک انقلاب رهبری وظیفه‌سینده اۏلوب. اۆسته گل، 17 مهر 1360-دان 25 مرداد 1368-جی ایله قدر (9 اۏکتیابر 1981 -16 آوقوست 1989) ایرانێن اۆچۆنجو پرئزیدئنتی وظیفه‌سینده اؤلکه ده سؤز صاحیبی اۏلان‌لاردان اۏلموش.
- اونوتمایاق کی ایران آدلێ اؤلکه ده ایلک پرئزیدئنت همدانێن ایندیکی کبوترآهنگ دئییلن کؤورنگ ماهالی‌نێن باغچا کندی تۆرکلریندن ابوالحسن بنی صدر اۏلموشدور. اۏنون 3 ایلدن آز باشقانلێغێ سۏنونون نئجه بیتدیینی ده هامێ یاخشێ بیلیر. بیلمه‌ینلر ده ساده جه ویکی پئدیادان اؤیرنه بیلر. چۆنکی بو یازقێمدا سۏز قۏنوسو باشقالارێنێ تانێتماق دئییل.
- اۆسته گل قزوینلی محمدعلی‌رجایی، تبریزلی مهدی بازرگان و میرحسین موسوی موقتی دؤلت باشقانلێغێندان توتموش 8 ایل ایران- عراق ساواشێ دؤنه‌مینده باش باخان وظیفه‌سینده اۏلموشلار.
- بونلارلا یاناشێ، ایران اسلام انقلابێ حاکمیتی‌نین موقتی انقلاب شوراسێ اۆیه‌لری اۏ جۆمله دن مصطفی چمران آدێیلا تانێنمێش ساوانێن چَمَریم کندیندن مصطفی چَمَریملی، خالخال‌لێ صادێق، سئیید کاظێم شریعتمداری، آیت‌الله مئشکینی و… تۆرک سۏیلو اۏلاراق عملده تهران مرکزلی پانفارسیزمه قوللوق ائدن تام پان‌ایرانچێ بیر سیستئمین داوامێندا جان-دان باشدان قوللوقچولار اۏلوبلار.
بئله‌لیکله، «نهایت ایراندا ایلک تۆرک پرئزیدئنت قدرته گلیر» سؤیله‌ین‌لر یا بیلگیسیزدیلر و یا فێرێلداقچی.
جناب مسعود پزشکیان سئچکی عرفه‌سینده بیر چۏخ وعده‌لر وئرمیش کی، ایراندا حاکمیت قورولوشونو نظره آلاراق، نئجه دییه‌رلر«آغزێندان یئکه تیکه گؤتۆرمۆش».
اۏ، اؤلکه‌نین آنایاساسێ‌نێن اۏن ایکینجی اصلینه اساساً غیر شیعه اۆممتلرین یۆکسک مقاما چاتماماقلارێنا آچێق-آیدێن قارشێ اۏلدوغونو سؤیله‌میش. علاوه اۏلاراق پان‌فارس ژورنالیستلرین :«غیرفارس‌لاری پان‌تۆرک، پان عرب، پان‌کۆرد، پان بلوچ و … دۆشۆنجه ده اۏلدوقلارێ ایتتیهاملارێنا: «میللتلرین ایلکین اینسانی حقوق‌لارێ وئریلمز سه، طبیعی دیر کی، مجادله ائتمک زۏروندا قالمالێ دێلار» دئمک‌له، ایران خالقێنێن غیرفارس کسیمی نین سسینی قازانا بیلدی.
مسعود پزشکیان حتی اجباری حجاب قانونونا و گشت ارشادا قارشێ اۏلدوغونو و بۆتۆن بونلارێن حللی اۆچۆن قانونی ایمکانلارێندان فایدالاناجاغێنێ دا سؤز وئردی. عکس تقدیرده، یعنی هر هانسێ مانعه‌لرله اۆزله‌شر سه، قازاندێغێ سسلره خیانت ائتمه‌سین دئیه، خاتمی و یا روحانی سایاق سوسمایاجاغێنێ و استعفا وئره جه یینی ده سؤیله‌میش.
بئله بیر حالدا، یاخێن گله‌جک ده ایرانی هئچ ده یاخشێ گۆنلر گؤزله‌میر. چۆنکی خالقێن دؤزۆم کاساسێ آرتێق دۏلوب یۏخ، داها دۏغروسو داشێب. قادێنلارێمێزێن بیر نئچه تئلی گؤرۆنمکدن دۏلایی مرحوم مهسا امینی و اۏنون اوجوباتێندان باشقا حدیث نجفی‌لرله آیلار حقی‌لرین مظلومجاسێنا اؤلۆملرینه دؤزمه‌یه جکلری آیدێندیر. بو ایسه انقلابێن اولیندن اللری ماسۏنلارلا بیر کاسادا اۏلان سؤزده سوپر انقلابچێ، عملده ایسه فاسد مجتهدلرین منافعینی بیرباشا هده‌له‌مک دئمکدیر.
شۆبهه‌سیز کی، اۏنلار بئله حالدا «اسلام وای» شعاریلا پزشکیان سهلی، علی خامنه‌ای نی ده بئله، یئری گلسه تکفیر ائدیب، پانتورک و اسراییل عامیلی آدلاندێرماقدان چکینمه‌یه‌جکلر. بئله بیر وضعیت ده جناب پزشکیان یا ائلین گۆجۆنه آرخالانێب بو زیبیل دۆشۆنجه‌لی‌لری سئله تاپشێرمالێ دێر، یا دا سید کاظێم شریعتمداری کیمی مئیلی تلویزیۏندان آلچالدێجێ اعترافا بۏیون قۏیمالێ دیر.
آمما اۏنون مدنی اصلاحات وعده سین دن اۆستۆن و داها اؤنَملی سی، اقتصادی وعده‌لری ده کؤلگه آلتێندادێر. چۆنکی کرمان، یزد و اصفهان لابی سی سۆنگۆن کیمی معدنین تالاماسێنا بو آسانلێقدا گؤز یوماسی دئییل.
یوخارێ‌دا قئید ائتدییم کیمی میللتلرین صبری بیتیب.
شهریار دئییب:
« عمر ما را مهلت امروز و فردای تو نیست
این قدر با بخت خواب آلود من لالا چرا؟»
«بو گۆن-صاباح دئمه، یۏخ عؤمره اعتیبار ایندی یاتان بو بختیمه لای-لای چالێب یاتێرما، بسیندی»(ترجۆمه اۏزۆمدن دیر).
اؤزۆم ایسه دئییرم:
« بو قدر بختیمه لای-لای چالما گل دئمیرسن بو میللت دێغلایێب اؤلر؟».
سانال اۏرتامێن فیلتیرینگ مسئله‌سی نین آرادان قالدێرێلاجاغێنێ دا نئجه دئیه‌رلر: میللت قولاغێنێن دالێنی گؤره بیلسه، یقین کی اۏنو دا گؤره‌جکلر.
اۏنون سؤزلرینه فیکیر وئرنده، منطیق بونو گؤسته‌ریر کی، تنفیذ‌ین ایلک گۆنۆندن، اورمو گؤلۆ ایله یاناشێ، مدنی ایستکلردن دۏلایێ حبس اۏلونان میللی فعاللارێن قئید-شرطسیز بوراخێلماسێندا جیددی آددێملار آتمالێ و ثبوت ائتمه‌لی‌دیر کی، «آدام تۆپۆردۆگۆنۆ یالاماز». یۏخسا استعفا وئرمه لی دیر.
قاتێ انفلاب‌چێ دئییلن قارشێ طرفین اسلامی شورا مجلسینده سؤز صاحبی و پزشکیانێن اؤنه‌ره‌جَیی وزیرلرین یۆزده نئچه‌سی صلاحیت آلابیله‌جکلری ده بو اۏیونون چتین مرحله‌لریندن بیریسی دیر.
جناب مسعود پزشکیانێن خاریجی موناسیبتلرینی نئجه آپاراجاغێ دا اَن چتین ایشلریندن اۏلاجاق.
اۏ، اؤلکه‌نین اقتصادیاتێنێ تحریملرله گیرۏو گؤتۆرمۆش شاه‌اوللاهی شئیخلردن علاوه، ایلک نؤوبه ده گرک «آذری ها» فاشیستلریله یاناشێ حسینون تئرور اؤرگۆتۆ«حسینچی‌لر» ایله ده حسابلاشسێن.
بو ایسه ایرانێن درین دؤولتی «سپاه پاسداران انقلاب اسلامی» له آچێق ساواشا گیره‌جه‌یی دئمکدیر.
تۆرک دۆنیاسێ‌نێن آپارێجێ دؤولتلریندن آزربایجان جمهوریتی پرئزیدئنتینین پزشکیان‌دان ایران پرئزیدئنتی سیماسێندا رسمی دعوتی ده علامتدار بیر حادثه دیر. ایران حاکمیتی سۏن اۏتوز ایلده بؤلگه سیاستی اؤزللیکله ایشغالچی ائرمنیستانا دسته‌ییندن یئته‌رینجه ضررلی چێخێب. اۏنلار بو سهوی تکرار ائتمک ایسته سه لر، بیر نؤوع اینتیحار دئمکدیر. عکس حالدا، جناب ایلهام علی‌یئوین دعوتینی ممنونیتله قبول ائدیب و حتی تۆرک دؤولتلری تشکیلاتێنا رسمی عضو کیمی قاتێلا بیلرلر. بو ایسه اصلینده ایرانێن پارچالانماسێ یۏخ، بۆتؤلۆیۆنۆ قۏروماغا خیدمت ائده‌ن فاکتۏلاردان دێر. آمما بونو آنلاسالار!
باتێ دۆنیاسێلا آنلاشماق اۆچۆن برجام و 2030 سندی کیمی مسئله‌لری یۏلونا قۏیماق دا، ائله-بئله ساده گؤرۆنمۆر. چۆنکی اوزون ایللر روسیا و چین ایله سێخ امکداشلێقدان دۏلایێ آنلاشمالار پۏزولمادان بو اۏلاسێ دئییل. بئله بیر حالدا طبیعی دیر کی، روسیا ایله چین ده ساکیت قالمایاجاق و زهرلرینی تؤکمه‌لی دیرلر. دئمه‌لی ابراهیم رئیسی دؤلتینه قدر اسکی دؤولتلر عمللی -باشلێ ایرانێ بوچقویا(اره یه) تاخێێبلار.
اومود ائدیریک کی، ایران میللترینین قازانجێ اوغروندا جناب پزشکیان بو سرگردان ایران سیاستی کاروانێ‌نێ اَن آز ایتکیلرله سعادت منزیلینه چاتدێرماقدا اوغورلو اۏلسون.
هر حالدا، بلکه ده «آغزێ‌اَیری‌لر» سایتی دۆنه-نه‌دک یێخێب سۆرۆدۆکلری جناب پزشکیانێن سئچیلدییندن درحال سۏنرا: «ای ایران، ای مرز پرگهر…» یازدێقلارێ، پزشکیان جنابلارێنێن اۏ یئنی اۆزه چێخمێش گؤوهرلردن اۏلدوغونا اینانێرلار.
آمما گؤرۆنن اۏدور کی:« بو خێنا اۏ خێنالاردان دئییل».
حبیب ساسانیان(یاکاموز)