بَییم قالا (زاب) سو، یۏخسا «اورانیوم» تونئلی؟..!
یئر آلت‌دان یاسا گئدیرلر
زاب تونئلی، اصلینده اورمو گؤلۆنۆ جانلاندیرماق اۆچۆن یوخ، گؤلۆ محو ائتمک اۆچۆندۆر.
ایلک باخیشدا بو سؤز بؤیۆک بیر ادعا نظرینیزه گلسه ده، یازیقلار اۏلسون کی، چۏخ آجی بیر گئرچک‌دیر. چۆنکی اۏ تونئلین قازینتی ایشلری ایرانین رسمی خبر آژانس‌لاری ایله گۆنئی آزربایجانین مجلیسده کی نماینده لرینه دایاناراق، چۏخدان دیر بیتیب. اۆسته‌لیک استفاده یه ده وئریلیب. آنجاق سو چاتدیرما یۏخ، اورانیوم آییرما اۆزره!!!
بیرچۏخلارینیزین بیلدیگی کیمی، سۏن گۆنلرده اورمو گؤلۆنۆن گرگین دورومو اوزاندیقجا فاجیعه‌وی بیر چئوره چاتیشمازلیغینا چئوریلمه‌سی، گۆنئی آزربایجانین طالعی ایله اۏیناماق دئمکدیر.
گئرچک هابئله سانال اۏرتامدا ۲۰ گؤندن آرتیقدیر کی، بو ساحه ده هرطرفلی قیناق‌لار، رئاکسیالار(قارشی‌دورمالار)، توئیتر فیرتیناسی، مقاله‌لر، ائله‌جه ده اینیستا گرام واسیطه‌سی ایله جانلی یایینلار داوام ائدیر.
بۆتۆن بونلارین باشیندا، یالنیز اورمو گؤلۆنۆن دیرچلدیریلمه‌سی دورور.
بیرینجی مسئله ایسه، زاب چایینین سویونو اورمو گؤلۆنه اؤتۆره جک «کانی‌سیب» (زاب)» دئییلن بَییم قالا
تونئلینین یوباندیرلماسی دیر. اینترنئت چاغیندا معده گۆجۆنه هرهانسی غرضلی هابئله مرضلی ادعالاری ایره‌لی سۆرمک، مدعاچی‌نین آخماقلیغیندان باشقا هئچ بیر شئیین گؤسته‌ریجی‌سی اۏلا بیلمز.
یالنیز بونا گؤره، گلین فاکتلارا دایاناراق، ألیمیزده اۏلان داشلاریمیزی (پازل‌لری) سیرا ایله یان-یانا دۆزک؛ بئله‌لیک‌له چاتیشمازلیغی(مسئله‌نی) آچیقلایاق.
۱- جمهوری اسلامی خبر آژانسی: « مركز انرژي اتمي بناب به عنوان مجتمع پژوهشي كاربرد پرتوهاي شمالغرب فعاليت خواهد كرد.»
قایناق: https://bit.ly/3G3x5p0
۲- بیلدیر یعنی ۱۴۰۰-جۆ ایلین آبان آیینین ۳۰-دا باتی آزربایجان استانداری، تسنیم خبر آژانسینا موصاحبه سینده، تونئلین قازینتی ایشلرینین بیتمه‌سینی رسمی صورت ده آچیقلادی.
قایناق: https://bit.ly/3PYOqE6
۳- کُردپرس سایتی بو ایل خردادین ۲۲-ده، زاب تونئلینین آغیر خرجینه باخمایاراق، وعده وعیدلر آراسیندا ایتیب باتدیغیندان گیلئی‌لندی.
قایناق: https://bit.ly/3WNskqm
۴ – مهر خبر آژانسی بو ایل یعنی ۱۴۰۱ خردادین ۲۱-ده ساعات ۱۴:۰۴ دا یازدی: « گؤله سو چاتدیراجاق تونئلین آچیلیشی، بهمن آیی‌نا قالدی»
قایناق: https://bit.ly/3Gkwwbo
۵- تبریز، توفارقان (آذرشهر) له اۆسکۆ شهرلرینین مجلس نماینده‌سی مسعود پزشکیان، اؤتن آخشام میللی – مردمی آکتیویستلرین همتی ایله اینیستاگرامداکی آردیجیل جانلی یاییمدان زۏردا قالاراق آچیقجاسینا :« تونئلین قازینتی ایشلرینین بۆتۆنلۆکده بیتدیگینی، آنجاق نه‌دن اۏنون آچیلیشینی یوباندیریلماسینی اؤزۆ ده بیلمه دیگینی» بۏیون آلدی (اعتراف ائتدی)!
قید: همن لایو دا، آپاریجی، جناب پزشکیان‌دان مدافعه اۆچۆن، ۲۶ –جی دقیقه ده دئدی:« بوندان آچیق نئجه دئمک اۏلار ، آقای پزشکیان بویورور؛ بیر عیدده لر تونئلین آچیلماسیندا رئیس جمهورون دا سؤزۆنه باخمیرلار!».
ایندی گلین گؤرک بو بیر عیدده‌لر کیملردیلر، ائله‌جه ده هاردان گۆج آلیرلار؟
۶- ۱۴۰۰-جۆ ایلین دی آیینین ۵-ده یئنه ده تسنیم خبر آژانسی، گؤلۆن محدوده سیندن مجوزسیز هابئله اؤزباشینالیقلا دوز ایله باشقا معدنی املاح‌لارین گؤتۆرۆلدۆیۆندن گیلئی‌لندی.
قایناق: https://bit.ly/3hUZWDC
دیققت: اورمو گؤلۆنۆن دیرچلیش قورومو(ستاد احیاء دریاچه‌ی اورمیه)نین قرارینا گؤره، مجوزلری اۏلانلار، ایلین اؤزل آیلاریندا یالنیز قدیمکی ساحیلی خط دن 200 متر ایره لی، تکجه 20 سانتیمتر درینلیکده دوز گؤتۆره بیلرلر. بو بیر حالدادیرکی، آدی هئچ بیر یئرده چکیلمه‌ین سپاه پاسداران-ین «الغدیر شرکتی» ایسته‌دیکلری آن‌دا گؤلۆن أن درین یئرلریندن، ایسته‌دیکلری قدر قازیب؛ سؤزده دوز، عمل ده ایسه لیتیوم لا اورانیوم‌لاری تام احتیاطسیزلیقلا بیلینمز یئرلره داشییرلار!!! هله اۏنونلا یاناشی شۏرابلی سویون اۆستۆ آچیق کامیونلاردا داشینماسی یاشام چئوره‌سی‌نی (اطراف محیط – محیط زیست)له مسیرده اۏلان آسفالتی خاراب ائدیر. أن اساسی سویون دا آزالماسینا سبب اۏلور، یاندا دورسون؛ دئمه‌لی، ایندی سؤزۆن باشی آچیلیر.
گلین سۏن لینکین خبرینی ده اۏخویاق، سۏنرا مسئله نین اینجه لیکلرینه دؤنۆب، سۏنوج آلاق.
قایناق: ( https://bit.ly/3FONxcg)
دیرناق آراسینداکی لینکه اساسن، بیرگه ایقلیم شرایطینده اۏلان «وان» گؤلۆنۆن تکینده، ۷.۵ میلیارد دۏلار دَگَرینده ۵۰ تۏن اورانیوم واردیر. بو ایسه اورمو گؤلۆنده ده عین ماتئریاللارین اۏلدوغوندان خبر وئریر.(تهلۆکه سیزلیک دن دۏلایی، بو ایشله مشغول اۏلان تانیشین وئردیگی بیلگی نی سیزینله شخصین آدینی چکمه‌دن پایلاشدیم.)
بیر نئچه سۏرغو یارانیر:
- درینلیک دن گؤتۆرۆلن دوزلارین سببی له نه دن محیط زیست فعاللارینین قیشقیر-باغیرمالارینا اؤنم وئریلمیر؟ بو شۆبهه یه آچیقلاما گتیریلمهلی دیر. طبیعی دیر کی ایلگیلی اۏرقانلارا بو مسئله نی یئرلی -دیبلی دانماقدا قالین – قاییم تاپشیریق وئریلیب، دۆز دئییرلر سه، خارجی لابراتووارلاردا درینلیکدن بیر آنالیز نمونه سی آراشدیریلسین.
- پزشکیان دان اؤنجه کی لایو دا، باشقا بیر وکیل‌الدوله(متفکر آزاد) آچیقجاسینا پزشکیانین ترسینه :« من اؤزۆم گئتدیم تونئلی گؤردۆم ، هابئله تونئلین ایچینده قۏرخونجلو چارتداقلارین اۏلدوغو، اۏنون ترمیمی آچیلیشین یوباندیریلماسینا سبب اۏلدوغونو» وورغولادی! (مسئوللارین دیلیندن بو کیمی ضدیتلی ایفاده لر گؤستَریر کی، نه سه بیر سیرری گیزلتمک ایسته ییرلر).
- اۆسته گل، بو ایل تیر آیینین ۲۲-ده ایسنا خبر آژانسی ساری داش ایله خانا ( سردشت و پیرانشهر) وکیلی، کمال حسین پوردان مجلسین آچیق اجلاسیندا یازدی:« اورمو گؤلۆنۆن برپاسی قرارگاهی‌نین پلانلارینین ثمرسیزلیگین‌دن امین اۏلدوغوموز حالدا، نه اۆچۆن هله ده یانلیش یۏلدا آددیملاییریق؟»!
- کۆردلرین بؤیۆک کۆردۆستان رؤیاسی ادعالارینا باخمایاراق، نه دن بو مسئله ده سوسوبلار؛ اۆسته لیک گؤلۆن دیرچه لیشینه قارشی چیخیرلار؟
- بو کۆرد دیل‌لی نماینده ادعا ائدیب: «گؤله سو اؤتۆرمه تونئلینین تیکینتی‌سین‌دن سۏنرا خانا دا (پیرانشهرده) یئرآلتی سولارین سَوییه‌سی آشاغی دۆشۆب، بولاقلار لا قویولار قورویوب. بیر نئچه اۏن ایللیک‌لر عرضینده اکینچی‌لیک‌له مشغول اۏلان خانالی لار بو گۆن بیر چۏخ چاتیشمازلیقلا اۆزلَه‌شیب‌لَر. خانا (پیرانشهرلی‌لَر)نیه بونالیما ( بحرانا) دۆشمه‌لی‌دیر؟»
- بو یالان ایفاده‌لر اورمو گؤلۆنه سو اؤتۆرۆجۆ تونئلین تیکینتی‌سینین ایندی ده بیتمه‌دیگینی ائله‌جه ده بَییم‌قالا (زاب) چایین‌دان بیر دامجی بئله سویون گؤتۆرۆلمه‌دیگی بیر واخت‌دادیر.
- کمال حسین پور ایران حکومتی له پارلامئنتین‌دن «بو مسئله‌یه اۏلدوقجا تئز موداخیله‌لرینی» ایسته‌ییب.
اۏ، دئییب: «اورمو گؤلۆنۆن دیرچلدیلمه‌سی فوندامئنتال (بنیادی- کؤکَنلی)مسئله‌دیر، آنجاق بیزیم خانادان (پیرانشهردن) گؤله سو گؤتۆرمه‌‌مه‌ییمیز له أکین‌چی‌لیک ساحه‌لرینین محوینه سبب اۏلماغیمیز قبول ائدیلمزدیر.
مسئله بوراسین‌دادیر کی، بَییم‌قالا (زاب چایینین) مجراسی سۏندا ساری‌داش (سردشت) داغیندا دگیل، عراقین قوزئیینده بیتیر. بو ائکسترئمیست (افراطچی) نماینده زابین سویونو اورمو گؤلۆنه کئچیرمکله عراق کۆرد بؤلگه‌سینه داها آز سویون چاتاجاغیندان اینجیک‌دیر.. اصلینده بئله دَگیل، اۏنون مجلسده بار- بار باغیرماسی حاکمیتین یاشیل ایشیغیندان ایره‌لی گلیر. آچیغینی دئسک، بو کیمی قارشی‌دورمالار، تردد(شۆبهه) یاراداراق، زاب تونئلینین سو مجراسی کیمی استفاده‌سینه دور دئییر. نتیجه ده، زاب‌دان اصلینده گیزلین آماج‌لا قازیلدیغی یؤنده، یعنی گؤلدن گؤتۆرۆلن دوزلو اورانیوم مادده‌سی‌نین سس‌سیزجه‌سینه آیرینتیلاری اۆزره سوءاستفاده اۏلونور. اۆسته‌لیک بَییم‌قالا (زاب) تونئلی، آنجاق یئنه ده دئییرم، آنجاق اورمو گؤلۆنه سو چاتدیرماق آدینا ایشله‌نیب، بونا باخمایاراق اساساً قرار دگیل، اکینچیلیکلر اۏندان بارینسین لار.
حبیب ساسانیان (یاکاموز) ۱۹ ایول ۲۰۲۲
