حاییف کی پانفارس و ایرانچیلیق دیلی ایله دانیشیریق
یازدی: آمریکا دولارلاری ایله، … آزربایجان آدینا ژنرال‌لار …، آمریکا خیابانلاریندا دولاشیب …، آزربایجانی مستقیل ائدنلر ….
سوراراق، یازدیم:
مثلن، کیملر آمریکادان پول آلیر؟
آمریکادان و آمریکا دولاریندان مقصدیز نه دیر؟
کیملر پول آلیر، آزربابجانی موستقیل ائتسین؟
من (انصافعلی هدایت) بیر اؤرنک اولاراق، 2008-دن، «رادیو فردا»دا (فارسچی رادیودا) ایشله‌سه‌ایدیم، آیدا سککیز مین دولار آلاردیم.
آمما پانفارسچیلیقلا و ایرقچیلیقلا موخالیف اولاراق، اورادا ایشله‌مه‌دیم. اؤزوموزه چالیشان گون آز‌تی وی ده، یئری گلدی، آیدا بئله بیر مین دولارا چالیشدیم. یئری گلدی، موفته بئله چالیشدیم. تیرئلی سوردوم، آمما چالئشدیم، یازدیم، دانئشدیم. اؤلوم آیاغینا گئتدیم، آمما یازدیم، چالیشدیم، یازیرام دا؛ میننتی ده یوخ دور.
آمریکادا، آوروپادا، تورکییه ده و آزربایجان جمهورییتینده یاشایان و چالیشان آزرایجانلی سیاسی فعاللارین یوزده دوخسانی، مندن داها آغیر ایشلر ایله مشغول دورلار. یاشاملاری دا چوخ-چوخ آغیر کئچیر.
من تانیدیغیم بیر آدام یوخ دور کی آمریکا دؤولتینه ایشله‌سین یا آمریکا دؤولتیندن آزربایجانچیلیق اوچون، دوز یا دولایی یولدان، پول آلسین.
توم آزربایجانلی فعاللارین یوزده دوخسانی، چوخ زحمت چکیب، پول قازانیرلار. چوخ آغیر ایشلر ایله مشغول دورلار.
حاییف اولسون، بیر یا ایکی آزربایجانلی وار کی آمریکانین و آروپانین بودجه‌سیله چالیشان رادیو-تیلویزیالاردا ایشله‌ییر. کاش، اونلارین سایلاری یوزلر، بلکه ده مین‌لر اولسایدی.
به‌یم، پانفارسلار، آمریکا و آوروپا مئدیالاریندا و دؤولت ایشلرینده، فیکیر اوجاقلاریندا چالیشیرکن، بیزلره تای متهم اولورلار می؟ یا ایران ایچینده، ایران و فارس دؤولتینه چالیشانلار خیانته، متهم اولورلار می؟ تنقید اولورلار می؟
خاریجده‌کی میللی- سیاسی، ایران‌دا و فارس رئژیمینده حبس چکمیش، آغیر جزالارا محکوم اولموش، اؤلومدن قاچمیش و دوشونجه یییه‌سی چالیشقانلاریمیزی ایتتیهاملاماق (آمریکا، ایسراییل، تورکیه و آزربایجان جمهورییتینه باغلاماق)، ایران-فارس-فاشیستلرین تبلیغاتی و بئیین یوما یاخالاما سیستیمینین سونوجو دور.
مع‌الاسف، فارس دوشونجه‌سی و سیاسی ادبیاتی ایله ایتتیهاملاماق، بیزیم حتتا دوشونجه‌لی، سیاسی، مدنی و حوقوقی فعاللاریمیزین آراسیندا بئله، یایقین دیر.
اونونلا بئله کی، ایران و فارسلا دوشمن اولان هر بیر کس، پارتی و سیستیم ایله امکداشلیق، فخر وئریجی دیر.
سورورام: تورکون و آزربایجانین دوشمنی اولان فارسچیلیق حاکیمییتین ییخماق اوچون، کیلملر ایله امکداشلیق گره‌کیر؟
بو یولدا، هر بیر گوج‌له امکداشلیق موباح و حلال دئییل می؟
سیاست تاریخینده، هانکی بیر میللیت، خاریجی گوجلرله برابر چالیشمادان، ایستیقلال آلابیلیب کی بیزده ایکینجیسی اولاق؟
او حالداکی آزربایجان و تورکییه جومهورییتلری، خاریجی و اجنبی گوجلر دئییل‌لر، بلکه اؤز دوغما باجی قارداشلاریمیز و دؤولتیمیز دیرلر. بیر گون گلر کی اونلار، بیزیم آرخامیزدا دورارلار. بیزیم دوشمنیمیزی قیرماقدا، بیزی قوروماقدا، بیزیم یانیمیزدا دورارلار.
بیزیم حاققیمیز یوخدور، غوربتده یاشایان، ایکی جوت بیر تک میللتچی و زحمت چکن‌لریمیزی، فارس سؤمورگه‌چی دیلی، سیاسی ادبییاتی و سیستیمی ایله کوسدورک، قیراغا آتاق.
بو کیمه یارار؟ کیمین ایسته‌گیدیر؟ کیمه ضرر وئرر؟
میللتچی لریمیزی، (ایچه‌ریده یا ائشیکده اولان‌لاری) ایتتیهاملاماق، ایران-فارس دیلی، دوشونجه و مئدیالاریندان آلینان سیاسی دوشونجه و ادبییات دیر.
بیر بیریمیزی ایتتیهاملاماق، میللی دوشونجه‌‌نین وئردیگی دیل و سؤز دئییل. میللی دیل آلتیندا، میللتچیلیک‌له، دوشمنچیلیک دیر. دوشمنه، سیاسی و تبلیغاتی کؤمکچیلیک دیر.
البتته کی فارس ایشغالی آلتیندا یاشایان توتقونلارین بو حاققی وار کی جانلارین ایشکنجه‌لردن و یا اوزون حبسلردن قورتارماق آماجی ایله، سورغو و سووال زامانی، خاریجده‌کی فعاللاری، قیناسینلار. منیم حاققیمدا اولورسا، حالال دیر.
آمما بو دا، او آنلامدا دیییل کی هر کیم، جیددی تهدید اولمادان، یا سورغو سووالا معروض قالمادان، ائوینده اوتوروب، قلمی ایله یا سوشیال شبکه‌لرده، دیلی ایله، خاریجده کی پارتیلری، چالیشقانلاری، یازارلاری، دوشونورلری، زحمت‌چکن‌لری و … قارالاسین ایتتیهاملاسین؛ زحمتلرین داش‌قالاق ائتسین!
کیمین خئیرینه؟ فارسین می؟
البتته آزربایجان و تورکلرین ایستکلی‌لری، میلی-سیاسی و دؤولتچیلیک چالیشقانلاری، پارتیلری و پارتی یانچیلاری، بونو بیلیرلر کی میللتیمیزین بیر چوخونون بئیین‌لری، فارس سیستیمی ایله فورمالاشمیش. بو کسیم، هله‌ده فارس دیلی ایله دوشونور، داورانیرلار.
بو بئینی یویولموشلار، میللی چالیشقانلاریمیزی، فارس دوشونجه‌سی ایله، دیله و قلمه آلیرلار. حتتا اولارا، توهین ائدیرلر.
بو یول- یؤنتم، پانفارسلارین و پان‌ایرانیست‌لرین دیلی دیر. بیز تورکلر، میللتچی‌لر، فعاللار، دوشونورلر و … بو دیلدن اوزاق دورمالییق.
اونا گؤره ده، میللت و وطن اوغوروندا جهاد ائدنلریمیز، بو ایتتیهاملایجی داورانیشلار ایله، کوسمز و میدانی پانفارس و پان‌ایرانیستلره بوش بوراخمازلار.
هئچ اولمازسا، میللی فعاللاریمیز، ایران-فارس مئدیاسینین ایتتیهاملایجی دیلی و ادبییاتی ایله داورانمامالی دیرلار. ترسینه، آزربایجانچی و میللتچی سیاسی ادبییاتا و دیله ساریلمالی دیرلار یادا بو دیلی یاراتمالی دیرلار.
سایقیلاریملا: انصافعلی هدایت / حاییف کی پانفارس و ایرانچیلیق دیلی ایله دانیشیریق
