حماس لا اسراییلین توققوشماسی نه لره گتیریب چیخارا بیلر؟
سانال اورتامینیدا دونیا اوزره سیاسی گرگینلی ایزله‌ین هر بیر نورمال دوشونجه‌لی سیراوی اینسان دا، سیاست اوزره اوزمان اولماسا بئله، بیر چوخ مسئله‌نین هانسی یؤنده گئدیشاتینی اینجه‌له‌ییب سونوجونو دوشونه بیلر.
2020-جی میلادی ایلین باشلانیشیندان بری، دونیادا گئدیشات کوتله‌لرین دوشوندویوندن تام فرقیلی بیر ایستیقامت‌ده گئتمه‌یه باشلادی.
اوزون ایللر دونیانی دولاندیران گؤزه گؤرونمز گوجلرین ایسته‌یی سانکی بوتونلوکده دَییشیب.
آمریکانین اوزون‌موددتلی پلانی اساسدا فرانسانین بیرباشا رولو ایله حاکیمییته گلمیش سؤزده ایران اسلام جمهوریتی، اؤز دؤولتچیلیینی تثبیت ائتدیکدن سونرا، یاواش- یاواش آغالارینا بوینوز چیخارتماغا باشلادی واصلینده غربین اویونجاغی و ال آلتیسی اولماقلا، آلدادیجی اساس شعارلاری:« نه شرقی، نه غربی» دن بیر باشا شرقه قوجاق آچدی.
بو ایسه تاپشیریلمیش ایران- عیراق ساواشیندا شوروی نین صدام حاکمیتینه وئردییی اوزاق منزیللی (دوربرد) راکتلری ایرانین باش کندی تهران لا باشقا شهرلرینی شوخوملاماسیندان سونرا، ایران شوروی نین واریثی روسیا ایله استراتژیک ایلگیلنمه‌سی و متفقلییی ماراقلی ایدیر.
دئمه‌لی چین اؤلکه‌سی‌نین هئژمون دؤولته چئوریلدییی و روسیانین کئچمیش شوروی ایمپئریاسینی یئنیدن قورماق هوسی، آرتیق باشدا آمریکا اولماقلا، غرب دونیاسینا هیجان طبیلی نی(زنگ خطری) سسلندیردی.
اونلار بیر زامان اؤزلرینه گلدیلر کی، ایران اسلام حاکمیتی بوتون اربابلارینا قارشی پرده آرخاسی عؤهده‌لیکریندن بویون قاچیرمیشدیر. . بو ایسه قیسماً یئرآلتی و یئراوستو طبیعی ثروتلرینین، نتیجه سی اولسا دا، اساس سببی روسلارلا متفیقلیکدن قایناقلانیردی.
ائله بونا گؤره ده سؤزده اصیل اسلام رئسپوبلیکاسی ایرانین اساس متفیقلری، عرب اؤلکه لری یوخ، بوتونلوکده کومونیست اؤلکه لر، او جومله دن کوبا، قوزئی کورئیا، چین، روسیا و بو اؤلکه‌لرین هم پیمانلاریندان عبارتدیرلر.
بو آرا بعضی کیچیک دؤولت- میللت‌لرین گؤزله‌نیلمز دیره‌نیشلری، دونیانی دولاندیران قارا قووه‌لرین پلانلارینی آلت-اوست ائدیر. او جومله‌دن آذربایجان رئسپولیکاسی بو ساحه دئمک اولار کی بؤلگه ایله دونیا سَوییه‌سینده دنگه‌لری دَییشن ایلک اؤلکه دیر. اوزون ایللر تام حاقسیزلیقلاری گؤررکن تمکینلی داورانیب نهنگ دؤولتلرین آراسیندا بالانس ساخلاماق اوچون، عصرین موقاویله سی ان دوغرو و گوجلو آددیملاردان ایدیر.
اوتوز ایل بویونجا هر اوچو بیرلشمیش میللت‌لر قوروموندا اساس سؤز صاحیبی اولان مینیسک قوروپو باشچیلارینین اویونلارینا مجبوری دؤزن آذربایجان جمهوریتی، اؤتن ایکی یوز ایل بویوندا سیستملی ضولوملر و پارچالانمالاردان قورتارماق اوچون، سؤزون گئرچک آنلامیندا درین دوشونجه لی ذکالی بیر سیاسی لیدئرین یئتیشدیریلمه سینی هاوا کیمی واجب سانیردی.
بونو زامانین داهی لریندن درین دؤولت و کشفیات تجروبه‌لی مرحوم حیدر علی‌یئو لاییقینجه باجاردی و زامانه میزین نادرشاهی عالی باش کاماندر جناب ایلهام علی‌یئوی بئجه‌ریب یئتیشدیردی.
دؤوران دولاندی و جناب ایلهام علی‌یئو اؤزو بویورموشکن:« من نه‌یی نه واخت، نئجه ائده جه ییمی یاخشی بیلیرم» سؤزونه صاحیب چیخدی.
او، بوتون داخیلی و خاریجی تضییقلره باخمایاراق، لازیمی یوردسئور اوردونو قوروب، بئشینجی نسیل سلاحلارلا تأمین ائتدیکدن سونرا، ایلدیریم سورعتلی عکس هجوما کئچیب، 4 ایل عرضینده ایتیریلمیش تورپاقلاریمیزین بؤیوک حیسسه‌سینی ائرمنی ایشغالچیلاریندان 44 گون عرضینده قورتاردی.
9 نویابر اوچ‌طرفلی آنلاشما و ولادیمیر پوتینین:«قاراباغ ایستاتوس مسئله‌سینین گله‌جک نسیللره قالماسی» ایفاده‌سی نی ائشیدیب بیلن بعضی دار دوشونجه لی موخالیفت لیدرلری له سیاسی ائکسپئرت لر، ائلهجه ده عاوام کوتله، خان‌کندی و اطراف شهرلرینین ابدی اولاراق ائرمنی ایشغالیندا قالاجاغی ایتتیهامینی ایره لی سوردولر.
بونون آردینجا روسیانین هرهانسی سبب‌دن اوکراینیا هوجومو دا، آذربایجانین باشدا عالی باش کاماندانی اولماقلا مودروک سیاسی- حربی رهبرلیینه ایکینجی و قورتاریجی شانسی یاراتدی کی، قاراباغداکی خونتا رئژیمینه سون قویسون و:« ایستاتوس گوربا گور اولوب جهنمه گئتسین».
جناب پرئزیدنت ایلهام علی یئوین اوکراینیایا روسیانین هوجوموندان بیر گون اؤنجه روسیا ایله استراتژیک متفقلیک موقاویله سینی باغلاماسی، عینی حالدا لازیمی قدر اوکراینیا دسته یی، و جناب اردوغانین حل ائدیجی واسیطه‌لییی، آذربایجانین رئگیوندا هژمون بیر دؤولته چئویریلمه سینده و حتی ایرانین بوتون هده لرینی نئتراللاشدیرماقدا دانیلمازدیر.
اونودمامالییق کی، ولادیمیر پوتین جناب ایلهام علی‌یئوله قاراباغ اوزره شاه-مات اویونوندا گئرچک آنلامدا آچمازدا قالدی. پاشینیانین آذربایجان تورپاق بوتؤولویونو قاراباغ قاریشیق مئتراژی‌له قبول ائدیب دیله گتیرمه‌سیندن سونرا، روسیا پرئزیندنتی دئدی کی: پاشینیانین ایفاده‌سی قاراباغین حلی مسئله‌سینده بیزه باشقا چیخیش یولو قویمادی. بو او دئمکدیر کی، روسیا گونئی قافقازدا قالماق اوچون، قاراباغداکی تئرورچو ائرمنی‌لری قوروماق‌دان باشقا توتارغاسی قالمامیشدیر. ایندی روسیا صولح‌مراملی کانتینگئنتینین قاراباغداکی پست‌لارینین آرد-آردا باغلانماسی اونلارین ایستر-ایسته‌مز یاخین گله‌جکده آذربایجان اراضی سینی ترک ائتمک زوروندا قالاجاقلاری دئمکدیر.
پاشینیان ایسه روسیادان داها اوزاقلاشماق اوچون:«صولح‌مراملی لارین ائرمنستاندا نه ایشی وار» ایفاده‌سی پوتینی اونون حاکمیتینه قارشی داها جیددی آددیملار آتماسینا یؤنلندیردی. بونا گؤره ده، اونون MDBتوپلانتیسیندا:« بو حاقدا آذربایجانلا مذاکره ائده‌جه ییک» سؤزونده اینجه مقامین اولدوغونو گؤسته‌ریر. دئمه‌لی روسیا آیاغینی گونئی قافقازدا برکیتمک اوچون یئنی بیر گرگینلییه گَرَیی وار. قاراباغ مسئله‌سی چؤزولدوکده، بو گرگینلیک غربی آذربایجان و زنگه‌زور بؤلگه‌سیندن باشقا یئر اولا بیلمز. البته بونون اوچون آذربایجانین تاریخی، و حقوقی باخیمدان لئقال حاقلاری وار.
- زنگه‌زور اراضیسی شوروی چاغی 1920-نین دکابریندا آذربایجان ایسته‌مه دن مسکووا وریندن تورک دونیاسی‌نی پارچالاماق اوچون آذربایجاندان قوپاریلیب ائرمنیستانا وئریلیب
- ائرمنیستانین آذربایجان تورپاقلارینی 30 ایل بویوندا ایشغال و تالان ائتمه‌سی و بیرلشمیش میللتر تشکیلاتی نین دا تصدیقینه گؤره ایشغالچی بیر دؤولت اولاراق، آزربایجانا ووردوغو 100 میلیارد آبیش دوللاری جیواریندا(حدودوندا) ماددی زیانلاری اؤده‌مه لی دیر. بو ایسه 2033-جو ایلدن 800 میلیون دوللار خاریجی بورجونو اؤده یه بیلمه ین آج -یالاواج ائرمنستانین بوتون مالیه قایناقلارینین تاوانیندان خاریج دیر. نظره آلساق کی دئکابرین ۸-ده ائرمنیستان پارلامئنتی ۲۰۲۳-جو ایلین دؤولت بودجه‌سی لاییحه‌سینی قبول ائدیب؛ بیلدیریر کی، بودجه لاییحه‌سین‌ده گلیرلر ۲ تریلیون ۳۰۲ میلیارد درام (۵،۸ میلیارد دوللار)، خرجلر ۲ تریلیون ۵۹۱ میلیارد درام (۶،۵ میلیارد دوللار) گؤسته‌ریلیر. یعنی بودجه ده منفی تارازلیق اولارکن، بیر قپیک بئله خسارت اؤده مک ایمکانی اولمایان ائرمنستان، 30 ایل اؤنجه یئدیی سومویو ایندی دفع ائتمکده سانجیلانمالی دیر و سانجیلانیر. بو اوزدن زنگه زورو آذربایجانا وئرمکدن باشقا سئچیمی قالمیر.
- آذربایجان اوردوسونون قاراباغ‌دا آنتی ترور تدبیری عملیاتی ایله عین واختدا روسیانین مدافعه ناظیری شویقونون تهران سفری هئچ ده تصادفی دئییلدی.
- او گونه قدر قیرمیزی خط دن دانیشان ایران، سانکی یئلی آلینمیش شار کیمی فیس یاتدی. چونکو شرق اربابی روسیا بئله طلب ائتدی.
- ایندی روسیا دونیا اجتماعیتی‌نین فیکرینی اوکراینادا دوشدویو باتاقلیقدان یاییندیرماق اوچون، ایرانین واسیطهسیله حماسی ایسراییله قارشی کوشکورتمکله، غرب اؤلکه لرینی چیخیلماز وضعیته سالیب.
- باخمایاراق کی بیر چوخلاری ایسراییلین غافیل اولماسینی بیله‌رک‌دن بیر بهانه الده ائتمک اوچون سؤیله‌ییرلر، آنجاق ایرانین خاریجی ایشلر ناظیری نین بیروت دا کی دونیا مئدیالارینا رسمی مصاحبه‌سینده، «غزه زولاغینین وورولماسی داوام ائدن صورتده یئنی جبهه‌لرین آچیلماسی قاچیلمازدیر» ایفاده‌سی ایرانین ایسراییل له بیرباشا ساواشا گیره‌جه‌یی‌نین گؤسته‌ریجی سی دیر.
آدی چکیلمک ایسته مه ین بیر سیاسی اوزمانین دئدیینه اساسن، آمئریکا ایله فرانسا رئگیوندا ایراندان بیر خوخان کیمی سوءایستیفاده تاریخی بیتمک عرفه‌سینده دیر. چونکو اونلار پیس ایله پیس دن پیس آراسیندا سئچیم ائتمه‌لی دیلر.
ایرانین حماس-ین هوجوموندا رولو دانیلمازدیر / تکجه کئچن ایل مالییه یاردیمی اوچ قات یاریم آرتیب
اؤتن ایل ایسلام رئسپوبلیکاسی حماس-ین حربی قانادینا مالییه یاردیمینی ایلده ۱۰۰ میلیون دوللاردان تخمیناً ۳۵۰ میلیون دوللارا قدر آرتیریب.
اؤتن اون ایللیک‌لرده ایسراییلی محو ائتمه‌یه چالیشدیغینی بیان ائدن ایران ایسلام رئسپوبلیکاسی سون بیر نئچه آیدا تل آویوه قارشی ریتوریکاسینی(لفاضی‌سینی) گوجلندیریب. تئهران حاکمیتی دفعه‌لرله فیلیسطینین «مقاومت» قوروپلارین‌دان ایسراییله قارشی هوجوملارینی آرتیرماغی ایسته‌ییب.
آمئریکان اینتئرپرایز موسسه‌سی نین دانیئل پلئتکا “فارین پالیسی” ژورنالین‌دا درج اولونان مقاله‌سینده یازیر کی، ایسلام رئسپوبلیکاسین‌دان ایللرله دستک اولماسای‌دی، حماس، حماس اولمازدی…
باشقا یاندان آمئریکا ایله قطر دؤولتی آراسیندا آنلاشمایا اساسن، ایرانین تخمیناً 7 میلیارد دوللارینا حماس مسئله سی آیدینلاشانا قدر قاداغا قویولوب.
ایندی پادوکسلارا باخاق
آغ ائوین سؤزچوسو دئدی: بیز ایرانین ایسراییله قارشی دوشمنچیلیین‌دن ناراحاتیق/حماس ایرانین دسته‌یی اولمادان فعالیت گؤسته‌ره بیلمه‌یه‌جک.
علی مطهری: ایسراییل قورودان غزه‌یه گیرسه و سوی‌قیریم ائتسه، ایران دا گیره‌جک/بو توفان داوام ائتمه‌لی‌دیر
دئکابرین 13-و اسرائییلین رسمی تئلویزیاسی « ایران هدف آلیناجاق» جومله‌سینی فارسجا تکرار سؤیله دی.
◀️ آمئریکا میللی تهلوکه‌سیزلیک شوراسینین ایستراتئژی کوممونیکاسییالار اوزره کووردیناتورو دا ایرانین رئگیون‌داکی رولو ایله باغلی دئییب: حماس-ین ایسراییل مؤوقعلرینه هوجوموندا ایرانین «بیرباشا رولو» ادعاسینی ثبوت ائدهجک اعتبارلی دلیل یوخدور! باخمایاراق کی، ایرانین بو باخیمدان داورانیشی ناراحات‌لیق دوغورور.
جان کئربی: ایرانین حماسی اوزون مدت‌دیر دستکله‌دیینه گؤره، عمومیتله، بو ساحه‌ده اورتاق رول اوینادیغینی آچیق شکیل‌ده بیلیریک. ایران حکومتینین دسته‌یی اولماسای‌دی، حماس عمومیتله فعالیت گؤسه‌تره بیلمزدی.
ایرانین عالی دینی و سیاسی رهبری اوفیسی‌نین باشقانی اوکتیابرین 12-ده: «صهیونیست رئژیمین روسوای اولموش باش ناظری ایلانین باشی ایران‌دا اولدوغونو سؤیله‌دی؛ بو ایلانین باشی دئییل، موسانین اساسی دیر، اینشاللاه بوتون ایلانلاری اودوب محو ائدهجک»؛ دئدی.
بونونلا یاناشی ایران -عیراق ساواشیندا سپاهین فرماندهی و حاضیردا مجمع تشخیص مصلحت نظامین عضوو و بیر چوخ رسمی مسئولیتی اولان محسن رضایی نین مدیر مسئوللوغو آلتیندا تابناک سایتی سندلی فیلیم له برابر اوکتیابرین 14-و یازدی: ایراندان موختلیف نؤوع سلاحلار غزه زولاغین‌دا گتیریلیب و غزه مقاومت قوه‌لری کورنئت، فجر کیمی ایراندان گلن راکئتلردن و بیر چوخ باشقا نؤوع سلاحلاردان ایستیفاده ائدیر. بو سلاحلار دؤیوش میدانین‌دا ایستیفاده اولونور.
بوتون بونلار ایرانین ایسراییل له بیرباشا ساواشا گیره‌جه یی نین گؤسته‌ریجی سی دیر. بو حالدا ایران داها زنگه‌زورا گؤره ایکینجی جبهه نین آچیلیشینی آرزولامایاجاق و سون گونلرده زنگه زور دهلیزینه آلترناتیو اولاراق آغ‌بند دن باشلانان یولون آرازین گونئییندن کئچمه‌سینه یالوارماغی دا چوخ گومان کی بو سبب دن دیر.
عثمانلی ایمپئریاسی نین سون سولطانی ایکینجی عبدالحمیدله یئنی ایسرایلین قوروجوسو هئرتسئلین آنلاشیلمازلیغیندان دولایی دونیا یهودیلرینین لوببولاری آنتی تورک مؤوقعلرینی آرتیق دَییشمک زوروندا قالدیلار، چونکو آذربایجانین بیر نؤمره‌لی استراتژیک متفقی وقارداش دؤولتی ساییلان تورکیه نین مناسبتینی یوموشالتماق مجبوریتینده دیر و بونو آذربایجانا تام دسته‌یی له نمایش ائتدیردی.
(قئید ائتمک لازیمدیر: یهودلار دینی اینانجلارینا گؤره اؤزله‌رینی اورشلیمدن دونیایا سپه‌لنمیش و تاریخی تورپاقلاریندان دیدرگین دوشموش خالق سانیرلار. اونلارین اسلام دینی نین اساس قایناغی قورآنا استنادلاری دا ماراقلی و دوشوندوروجو مقاملاردان دیر. بیلیریک کی قورآندا أن چوخ آدی چکیلن سماوی کیتابا مالیک اولان پیغمبر موسی دیر. قورآندا محمد پیغمبرین 4 دفعه آدینین چکیلمه سی موقابیلینده، موسی و اونون امتی نین آدی 136 دفعه گلیب. بو ایسه اونلارین 3500 ایل بوندان اؤنجه بیر میللت اولاراق ایندیکی ایسراییل اراضیسی و اطرافیندا تاریخی یاشاییشلارینا دلالت ائدیر.
ائله بونا گؤره ده هئرتسئل ایصرارلی دیر کی، یالنیز او اراضی ده هئچ اولماسا بیر موختار رئسپوبلیکا قورسون. بونون مقابیلینده عثمانلی ایمپئریاسی ین بوتون خاریجی بورجلارینی یهود لوببولاری اؤده یه جکلرینی بویون آلدیلار. اوسته لیک بوتون عئلم آداملاری لا زامانین تکنولوژیاسینی عثمانلی اراضیسینه یؤنلندیره جکلرینه سؤز وئردیلر، ایکینجی سولطان حمید ایسه عثمانلی ایمپئریاسی نین پارچالانماسینا ایلک استارت ووران اولماسین دئیه، تاریخده لعنتلنمه مک اوچون بو تکلیفی رد ائتدی، هئرتسل ایسه تکرار اونون سارایینا دؤندو آمما بو دفعه داها سرت تپکی له قارشیلاشیب آوروپایا گئری دؤنور و او گوندن تورک دونیاسی نین بیرینجی دوشمنینه چئوریلن یهود لوببی لری، عثمانلییا اؤده نه جک پولو بو ایمپئریانین داغیلماسی اوزره خرجله مک قرارینا گلدیلر و بللی اویونلارلا یاناشی، ایندیکی ایسراییل دا سونرادان یئرلشمیش عربلردن تورپاق آلماغا باشلادیلار. باخمایاراق کی، س.لطان ایکینجی عبدالحمید بو مسئله‌نی بیلدیکده، یهودلارا عثمانلی اراضیسینده تورپاق ساتیشینی قاداغان ائتدی، آنجاق اونلار ایرانلی مشهور سیاستچی آنتی تورک سیدضیاءالدین طباطبایی واسیطهسیله کی عرب کؤکنلی ایدیر، یئنی دن تورپاق آلماغا باشلادیلار. بو دفعه ده یئنی حیلهنی دویان سولطان، عمومیتله خاریجی وطنداشلارا ایمپئریا اراضیسینده تورپاق ساتیشینی یاساقلادی و یهودلارین آلدیغی تورپاقلاری دا مصادره ائتدی. یهود لوببوسو سون چاره‌نی عثمانلینی چؤکدورمکده گؤرده و نهایت بونا ناییل اولدو).
بو دیرناق آراسی تاریخی آچیقلامادان سونرا، دؤنک اساس فیکریمزه.
نتیجه اعتباریله، روسیا ایران اسلام جمهوریتی رژیمینی قوربان وئرمکله بیر نئچه ایسته یینه ناییل اولا بیلر.
- یوخاری دا قئید ائتدییم کیمی دونیانین فیکرینی اوکراینا جبهه‌سیندن یاییندیریب، زلنسکی نی أن آزی موقتی آتشکسه وادار ائده جک
- آمئریکا ایله فرانسانین زنگه‌زوردان آیاغینی کسمک اوچون آذربایجانین زنگه زورا داخیل اولماسینا یاشیل ایشیق یاندیراجاق احتمالی یوکسک سَوییه ده دیر
- زنگه‌زور بویوندا معین ائنلی اراضی نین آذربایجان نظارتینه کئچه جه‌یییندن سونرا، ائرمنیستان – آذربایجان اوردولاری نین اؤن خطینده قاراباغداکی صولح مراملی لارینی یئرلشدیرمکله، هم گونئی قافقازدا قالماغا لازیمی بهانه نی الده ائده جک، هم ده پاشینیانی غربه مئییلی اولدوغوندا حقیقی معنادا تنبیه ائده جک.
سون دا ایسه، ایرانین ایسراییل و متفقلری قارشیندا گؤزله‌نیلمز مغلوبیتی له، پارچالانماسینا جیددی صورتده ساحه یاراناجاق و 1945-جی ایل سایاق سویوق ساواش ایرانین بؤلونمه سی له یئنی دن باشلانا بیلر.
ایسراییل ایسه همیشه‌لیک ایرانین شرریندن قورتاراجاق. بو دا یالنیز تورک دونیاسی ایله دوستلوق ائتمکله اولاسی دیر. نئجه کی 2020 –دن بری بونو فاکتیکی اولاراق ثبوت ائدیب.
نتیجه اعتباریله ایرانی بو گرگینلیکدن قورتارا بیله‌جک تکجه چیخیش یولو سپاهین دئوریمی (کودتاسی) دیر.
حبیب ساسانیان (یاکاموز) 10.17.2023
بو حاقدا باشقا بیر یوروم دا وار کی بو مقاله نین سون سطیرلرینی یازارکن، تانینماز بیر یازاردان الیمه چاتدی و اونون دا اؤنملی بؤلومونون ترجمه ائدیب عیناً بورادا گتیریرم.
غزه زولاغینین جوغرافییاسینا دقت یئتیرسه‌نیز گؤررسینیز کی، بو زولاغا گیرمه‌یین جمعی اوچ یولو وار.
بو زولاغین آشاغی حیسه‌سی مصره، غرب حیسه‌سی ایسه دنیزه آپاریر کی، بورادا ایسرایل حربی دنیز قوه‌لری همیشه ان جدی تهلوکه‌سیزلیک تدبیرلری ایله اونا نظارت ائدیر، شرق و شیمال حیسه‌لری ایسه ایسرایل اراضیسی ایله احاطه اولونوب.
بس ایران ایسلام رئسپوبلیکاسینین بوتون بو سورساتلاری، راکئتلری و حربی آوادانلیقلاری غزه زولاغینا نئجه داخیل اولوب؟
بو او دئمکدیر کی، موسساد یاتمیش‌دی؟
بئله بیر ایمکان وارمی؟
یوخ‌سا مصردن گتیریلیر؟
اگر بئله ایدی‌سه، ایسرایل مصره قارشی ایلک اتهاملاری سسله‌ن‌دیرمه‌لی ایدی.
حتی حماس-ین ایسرایله هوجوموندان اوچ گون اؤنجه مصر کشفیات اورقانلاری بؤلگه ده شوبهه‌لی حرکتلر باره‌ده موسساد-آ معلومات وئرمیش‌دیلر کی، بو دا مصرین بو هوجوم‌دا ایشتیراک ائتمه‌مه‌سینین ثبوتو ایدی.
بس نیه موسساد بئله اؤنملی خبردارلیغا محل قویمادی و ایسرایل اوردوسو غافیل اولانا قدر اؤزونو یوخویا وئردی؟
ایران ایسلام رئسپوبلیکاسینین سلاحلاری موسسادین خبری اولمادان حماسا نئجه چاتدی؟
اگر بو سلاحلار اردن چایینین غرب ساحلینین ساکینلرینه چاتسای‌دی، اینانماق اولاردی، آنجاق اونلار حماس-آ چات‌سالار، بو، چوخ شوبهه‌لی و اینانیلمازدیر، چونکی بو، دئمک اولار کی، مومکون دئییل.
بو سلاحلار روسییانین آلدیغی، ایسرایله تحویل وئریلمیش و ایران ایسلام رئسپوبلیکاسینین بایراغی و آدی آلتیندا حماس-آ موسساد آگئنتلرینین اؤزلری چاتدیردیغی سلاحلاردیر.
آیری طرف‌دن، ایسلام رئسپوبلیکاسین‌داکی موسساد عملیات‌چیلاری، ائلهجه ده اف اس بی آگئنتلری حماسی هوجوما باشلاماغا و یالاندان مقاومت جبهه‌سی سیزین آرخانیزدا اولدوغونا ایناندیردیلار، آمما بو، اصلین‌ده غزه زولاغینین ایسرایله تحویل وئریلمه‌سی اویونو ایدی. تئرورچولارلا دؤیوشمک بهانه دیر. بو بیر اویوندور؛ والسلام.
