دوزگون بابا
داغ عظمتلی، ساوالان هئیبتلی، سهند ووقارلی، آغ ساققالیمیز پروفسور دوکتور صدیق راحاتسیزلیق و خسته لیگی اوزوندن هامیمیز نیگاران قالمیشیق!… حقیقتا دوکتورا خسته یاتاغیندا اولماق یاراشمیر… بلکه ده اونو همیشه چالیشارکن و فعالیتده گؤردویوموزدن قبول ائده بیلمیریک. کیمسه اوستادین یالنیز بیر یئرده چالیشماسینا شاهید اولا بیلمز… او عئینی زاماندا أن آزی ایکی-اوچ یئرده چالیشیردی…
ایل ۱۳۷۰ من هله اوتوزومو دولدورمامیشدیم. (تهران- چهاراه فرصت، خ.سمیه) «بنیادبعثت» قوروموندا نشریات ایشلری تورکجه بؤلومونون باشینداکی آد، دوکتور محمدزاده صدیق جنابلاری ایدی… لازیملی کیتابلار او جومله دن ایران اسلام جمهوریتی نین مدنی قانونلاری کیمی (مجموعه قوانین مدنی) کیتابلاری تورکجه یه ترجمه ائدیب، قوزئی آزربایجانا گؤندرمک اوزره کیریل (روس) الیفباسیله نشر ائدیردی. من ده روس حرفلرینی و بیلگی سایارلا ایشلمک باجاریغیم اوزوندن بختیم گتیردی و اوستادلا چالیشماق فخرینه ناییل اولدوم… «نه موتلو بانا!»
اوندا اوستادین هارداسا٬ ۴۵ یاشی اولاردی… گنج و چالیشقان سرخابلی حسین دوزگون یورولمازلیغین اورنگی!.. یانینا گلن اؤیرنجیلردن بیر دئییل، بیر نئچه اونیوئرسیته ده اوستادلیق ائتدیگینی بیلمک چنین دئییلدی… بعثت قوروموندا و عئینی واختدا انقلاب مئیدانینداکی دارالترجمه اوفیسینی ده ایداره ائتمکله مشغول ایدی…
هله بونلاردان دا علاوه آردیجیل شکیلده اؤنملی و تحقیقی اثرلر نشر ائتدیرمکله یاناشی، منظم شکیلده تورکجه اطلاعات قزئتینی ده بوراخماقدان گئری قالمیردی… بو آدامدا یورولماق دئیه بیر شئی گؤرمک مومکون دئییلدی. خاطیرلادیغیم یالنیز انئرژیلی صورتده بو ایشلرین حاققیندان گلمه سی دیر…
اینانین! من ده استاد مرتضی مجدفر ایله راضییام؛ «اونو خسته یاتاغیندا گؤرمک و قبول ائتمک چوخ چتیندیر!»
آمما من اوستادیمیزا اینانیرام. خسته لیگی یئنیب ده ساپا-ساغلام آیاغا دوراجاغی گونو صبیرسیزلیکله و اولو تانرییا یالوارا-یاخارا دوعا ائدرک گؤزله ییرم!
یاستیغین یونگول اولسون، اوستاد بابا!
آللاهین یاردیمی ایله لطفا قالخ آیاغا!
سنسیز قلمین-کاغیزین دا دادی دوزو قالمامیش!
درین صایقی ایله/
کیچیک اؤیرنجی نیز/حسن حمزه خانلی (رحیمیان)
دوزگون بابا