بو دوغما و طبیعی عئیبدن و ایراددان تمیزلنمک اوچون، چوخ چالیشمالی ایدیک. عبا و عمامه نی راحاتلیقلا یئره قویمادیق. لهجه میزی دوزتمک اوچون مشق ائدیردیک. دونه-دک فارسلار تورکچه مشق ائدردیلر. بوگون ایسه وضعیت دگیشمیشدی. بیز، ایللر “صاد”، “ضاد”، “ذال” مشق ائتدیگیمیز، فلکه-ده دؤیولدوگوموز سایاق، بوگون “قاف” حرفینی دوزگون ایفاده ائتمک اوچون دؤیولوردوک. آماج و هدف “قند یئدیک” یئرینه “گند یئدیک” وضعیتینه دوشمه یَک. اوزون سؤزون قیساسی، بیر گون گؤزومو آچدیم، گؤردوم: – ایرانلی اولمامیزی ثابت ائتمک اوچون، اولدوقجا سرعتله قاباغا قاچاراق دامین او بیری طرفیندن باشی اوسته یئره دوشموشوک. داها آنا دیلی، مدنیت، ادبیات، شعر، تاریخ، گله نک و گؤره نگی، هامیسینی دانمیشیق. بیرکس بیزی تورکچه سسله سه ایدی، ائله جه ده تورک اولدوغوموزو بیلسه ایدی، اوتاناردیق.
عجبا بو قدر زحمتلر نتیجه وئردی می؟ فلاکت فقط بو ائو ایله ده سونا چاتمادی، هر ایکی دونیادا ضرر گؤردوک. بیر کیچیک مخالفت سازی چالماق ایسترکن، یئنیلدیک و وحشی تورک اولماغا سانیق (متهم) اولدوق. بوتون یئری و گؤیو تمیزلدیک، آنجاق تورک اولماق لکه سینی اؤزوموزدن سیله بیلمدیک. هئچ زامان بیزی تورک دئییل دئیه قبول ائتمه دیلر.
هر نه ایش گؤردوک، گئنه ده اؤزگه قالدیق. نئچه واقت بوندان قاباق تبریزده اوستادلاریمین ائوینه گئتدیم. قاپی نین گیریشیندن اوستادیمین محضرینه دک آغلادیم. بو پئشمانلیق و اوتانماق آغلاماسی اونلارین روح ایدی، (منی آغلاماغا زورلوردو). آنانین روحوندان اوتانماق، وطندن اوتانماق. هر الدن وئردیگیمیز ارزشلردن اوتاندیم، سونوندا اوزاغا آتیلمیش و داش قالاغی اولموش بیر وضعیته دوشدوک.
سید حسن تقی زاده: بیز تورک ایدیک.
ترجمه: ایشیق سؤنمز