ایللر بوندان اونجه، هر کتده ایستر کو چری و ایسترسه ده غیری کوچری یئرلرده، قویونلارین چوبانا قوشاردیلار. هر بیر کتده، اوچ، دورد و آرتیق چوبان اولاردی. چوبان آلتی آی سوره جینده قویونو اوتاراردی. و چوبان اوتاران قویون چوخ اولدوغو اساسدا سورو دئیرلر و سورودن آز اولان قویونادا بیر تالا قویون دئیرلر. قویونو اولان بعضا ده چوبانین جامتاییسینا چوره ک و باشقا یئمک وساییلده قویاردی. چوبانلارین بعضی سی بعضا بیرینین قویونون اوغورلوق شکیلده کسرک یئدیکدن سونرا، قویون یئیه سینه دئیردی قویونو جنه وار آپاردی. و بونادا چوبانلار آراسیندا قورد پایی دئیردیلر.
سوت گونو تامام قویونلارین سوتو چوبانین اولاردی. دوز گونو دوزلاق دئییلن یئرده قویونلارا دوز وئرردیلر. چونکو قویونا واختیندا دوز وئرمه سن. قویون شیت اولار. یانی تورپاق یئیر. واوندا قویونون جییاری یارا اولار. حتی قویونون آلتین تمیزله مه سن قویونون جییاری پیشر و بونا دئیرلر قویونون جییاری پوشتک ووروب.
قویون کوپنده قولاغیندان قان آلارلار و عینی حالدا قانا دوشسه و حتی دلیجه توتسا گوزونون قاباغیندا قان آلارلار. قویون اولو دوغسا بالا سالیب دئیرلر. قویونون بالاسینا قوزو و عینی حالدا ایکی دنه بیر دوغومدا دوغسا ائکیز دوغوبدور دئیرلر. اگرسه قویون بیرداها یازدا دوغسا اونادا املیک دئیرلر. قویونون جاوانینا توغلو و دیشیسینه ایسه شیشک دئیرلر. اگرسه شیشک قویون نوبارینا دوغسا اونا بیر جه یینه دوغوب دئیرلر. قویون ساخلانیلان یئره وانا و قوزو ساخلانیلان یئره کوز و یا قوزولوق دئیرلر. و حتی قویونون قارنیندا بالاسی اولان یئره ده قوزولوق دئیرلر. بو یئره انساندا اوشاغلیق دییرلر. حتی بیر انسان اوشاغلیغینا عمل ائتدیرسه دئیرلر اوشاغلیقین چئویرتدیریب.
سوز قونوسو بودور مالین دوزیلا قویونون دوزو فرقلیدیر. قویونون دوزو کپک و یوموشاق اولار. آنجاق مالین دوزو داش دوز اولار. مال ساخلانیلان یئره په یه دئیرلر. و مالین بالاسی ساخلانیلان یئره ایسه بوزوولوق.
هر حالدا چوبان پاییزین سونوندان یازا قدر، آلتی آی سوره جینده قویونو اوتاردیقدان سونرا قویونو یئیه سینه قایتارار. و چوبان ال امه یینه هر ایگیرمی دنه قویونا بیر قوزو گوتورر. و قوزونون سئچیمی چوبانا باغلیدیر. چوبان هر هانکی قوزونو ایسته سه اونو گوتورر.
بوندان علاوه هر کتده ناخیرچی دا اولاردی. بو اساسدا قویونون چوخونا سورو، مالین چوخونا ناخیر، دوه نین چوخونا بالخی، آتین چوخونا ایلخی دئیرلر.