معللیم گونونه سؤز آختاریردیم ، یازام. ائله کی اونلارین اوجالیق و اؤنملیکلرین گؤسترسین. سؤزون دوزو رشدییه دن ایستیردیم ، یازام. یا کی جاببار باغچه باندان .
بیر آخیجی و گؤزه ل یازی بیلگین اوستادیم ماراغالی علی مرادی جنابلاریندان “جمتا”دا اوخودوم. علی بی مرادی نین چوخ آخیجی و گوجلو قلمی واردی. بو قلم کؤلگه سینده چوخ گؤزه ل آذربایجانین ، یوکسک مقاما چاتان معللیملرین بیر – بیر سادیلامیشدی.
ایلک خوررم دینلی بابکی گتیرمیشدی. اونون خلیفه یه درس وئرمه سیندن دانیشمیشدی.
سونرا ستارخاندان دانیشیب ، اونون شرق تاریخینا و میللتینه درسیندن سؤز آچمیشدی.
داها صمد و دهقانیدان دانیشمیشدی.
رحمتلی رشدییه دن گئنیش دانیشیب ، اونون سگگیز دفه مدرسه و اوخول قوروب ، مین بیر بلایا دوشمه سیندن یازمیشدی.
آمما بیلمیرم جاببار باغچه باندان نییه دانیشمامیشدی؟ هله لیک قوی قالسین ، منده دانیشماییرام.
آنجاق بیر گؤزه ل و یئتگین قونو ایله سؤز آچماسی منه ماراق دوغوردو.
بو معللیملرین سیمیتن و لجبازلیقلاریندان دانیشماسی ماراقلیدیر.
بئله کی بابکین سیمیتنلیگی عرب خلیفه سی نین آغ ائوینده ، اونا غالیب ائتدی. خلیفه لیگین ارکانین ترپددی.
ستارخانین سیمیتنلیگی یئنیلمیش انقلابی بیر داها بوتون ایران و شرق دونیاسینا قایتاردی.
صمدله دهقانی یئتیم و اؤکسوز اوشاقلارا اوجقار کندیلرده درسین و بیلگی نین شیپ – شیرین بالین دادیزدیردی.
آمما رشدوییه ، سگگیز دفه اوخول قوروب سگگیزینده ده اوخولو داغیدیلیب یا کی یاندیریلیب ، قاچاق دوشوب حتتا بو یولدا قولو ، قیچی سینیب و بیر اؤیرنجی شهید اولوب ، یئنه دوز یولوندان چؤنمه دن داوام وئریبدیر. یاشی اؤتمه دن درس وئره – وئره هوشدان گئده رک دونیاسین ده گیشیبدیر.
بیر گؤزه ل و اوره گی اوخشایان وصیتی وارمیش. “منی اوخولون قاپیسیندا قویلایین. اؤیرنجیلر قبیریمی آیاقلاییب اوخولا وارسینلار .”
یئری وار رشدوییه نین آدین تبریز یوخ بوتون ایراندا مینلر اوخولون آلنینا یازیلسین. یئری وار معللیم گؤنو بونون دوغوم گونو آدلانسین.
یازیدان مقصدیم ، بیزده ده بیر قوجامان و سیمیتن معللیم واردیر.
کرونایا گوره مدرسه لرین قاپالانماغی شاییردلارین درسی دالی قالماسی اونو بتر ناییران ائدرکن ، اؤزون اوتا – سویا وورور بیر یول تاپسین ، درسلری یئرده قالماسین ، چالیشیر.
مودورلرله ایلگی قورور. نه ائتمه لییک؟ نه ائده بیللیک؟
مودورلر گاه تلگرامی ، گاهدا واتساپی گؤستریرلر.
سونرادا “شاد” اپلیکئیشینی قارشییا قویولدو.
منی ماراقلاندیران بونلارین هئچ بیری ده ییلدی.
آنجاق گئجه بیر – ایکی ساعاتلاری بیر – بیر اؤیرنجیلریله ایلگی قورماسیدیر.
اونلارا درس وئریب. سورغو وئریب جاواب آلماسیدیر.
بو گؤنو بوتون یئر اوزونده اؤره گی یانان و اؤره کدن درس وئرن معللیملره تبریک دئییرم.
عزیز معللیملر و معللیملریم گونوز موبارک اولسون.
رحیم عباسی