مهدی حمیدییم
ایل ۲۰۱۰، چوخ ساییدا میللی فعال مختلف شهرلرده توتوقلاندی. توتوقلانانلار یاشادیقلاری شهرلرده مرجع فعاللاردان ساییلیر و اوندان اؤنجه ده دفعهلر توتوقلانیب هزینه وئرمیشدیلر. یاشیل حرکت بیتر-بیتمز زامانی، او قدر تاثیرلی فعالین بیر زاماندا توتوقلانماسی، آذربایجان ایجتماعیتیندا بیر دالغا یارادا بیلر، ایران تورکلری آدینا گوجلو سس سالا بیلردی. اما ائله اولمادی؛ بیرحددهجن اولسا دا، یئترلی دئییلدی. نییه؟!
چونکی، یارانماقدا اولان دالغا، اطلاعات و اونون مهرهلری طرفیندن اورتالیغا آتیلان قارالامالارلا یارانمادان سؤندو. قارالاما نه ایدی؟! «توتوقلانانلار پژاک ایله ایش بیرلیک ائدیرمیشلر». نه یازیق کی، بعضی سادهلوح فعال دا بو شایعهلردن تاثیرلنیب، شوبههیه دوشدولر. دوستاقدا اولان او فداکار قهرمانلاری ساوونماق یئرینه، اطلاعاتین یانیندا یئر آلمایانلار بئله سوسدولار. همین سئناریویا، ۲۰۱۲ ده «یئنی گاموح» مرکزی عضولرینین توتوقلانماسیندا دا شاهید اولدوق.
ایران اطلاعاتی تاثیرلی فعاللاری توتوقلاماقلا برابر، اونلارین اعتبار و محوریتینی ده آرادان آپارماق اوچون بو تیپ ایشلره ال آتیر. اینسانلاری توتوقلاییب شیکنجه ائدن رژیم یئرینه، شیکنجه آلتیندا اولان قینانماغا باشلاییر. رژیم بو ایشلرله، هم میللی فعاللار و میللی حرکتین خالق ایچینده ایجتیماعی سرمایهسینی داغیدیر و هم گروه/حزب یارانماغینا انگل یارادیر.
ایندی ایسه، همن سناریو میللی حرکتین اؤنجوللریندن اولان مهدی حمیدی شفیقه تطبیق اولونور. مهدی، فعاللار آراسی مودئرن دوشونجهسی ایله تانینیر. اونون اولویتلرینین باشیندا، میللیحرکتی ارتیجاعی و متحجر فیکیرلر و لمپن داورانیشلاردان قورتارماق دورور. دیالوگ و سازنده فیکیر آلیش-وئریشی مهدی اساس اؤزللیکلریندندیر. فعالیتلرینده و هابئله زینداندا اؤزوندن گؤستردیی اردملی کاراکتئر، چوخ طیفلر طرفیندن سئویلیب سایغی ایله قارشیلانماسینین اساس سببیدیر. او، میللیحرکتی لاییقیجه تمثیل ائدیر و حرکتدن یاخشی گؤرونوش یارادیر. محض بو اوزدندیر کی، بوگون مهدی بیر طرفدن سیپاه/اطلاعاتین غضبینه توش گلیب، او بیر طرفدن ده مرتجع و متحجر ایفراطیلر.
اما بیز نه دیرلریمیزی اونلارا یئدیردریک، نه ده بو دیرلری داشیان دوستلاری.
مهدی ایله منیم دوشونجهلریمیز جزئیاتدا دا چوخ یاخیندیر. اونون دوشونجه و باغلی اولدوغو قورولوشلاردان او قدر امینم کی، قطعیتله دئیه بیلرم اگر او مجاهید، پژاک، کمونیست و … هر نهدیرسه، او زامان من ده اویام.
من مهدی حمیدییم