ایللر اونجه یانی اوشاقلیق چاغلاریندان بری فولکلور اساسیندا، چوخلو دبلر،عنعنه لر، اینانجلار و هابئله… گورورودوک.
سانکی زامان سوره جینده بونلارین توپلانتیسینیدا دوشونرکن بیرر_ بیرر آغلیمیزا گلنلری بیر بیرینین دالینا دوزمه ییده دوشوندوک.
ایندیسه بو دونه ده یازیمیزی مینجیق دئییلن بیر سوزجویون هم آنلامین و هم ایسه نئچه تورلو اولدوغونو آغلیمیز چکن قدر دوشونمه یه چالیشدیق.
اوتن چاغلاردا یاشلی قادینلار شوخلوقجا تزه گلینلری خطاب ائدنده دئیردیلر یئنه ده جینجیق مینجیقینی گتیردیر دئیه بیزی دوشونجه مئیدانینا آپاریردیر. گرچکدن بیز بونلاری سوروب و توپلایاندا همن سوردوغوموز انسانلار بیزه گولوردولر..ایندیسه سوردوغوموز انسانلارین چوخ سایی بو دونیادان کوچسه لرده،آنجاق اونلاردان آلدیغیمیز میراثلار هله ده قایناقلانیر.زامان سوره جینده چوخلو سوزجوکلرین آنلاملارینا ایللر بویو دوشوندوک. و هر بیرینین آنلامینی تاپدیقدان سونرا اوره ییمیزده سئوینج یارانیردیر. چتینلیک چک سکده آنجاق لذت ده آپاریردیق. هر حالدا اصل قونودان اوزاغلاشمایاق دئیه قاییداق جینجیق مینجیق مسئله سینه. جینجیق سوزجوک قایداسیندا ساخسی کاسا و ساخسی بارداق آنلامیندادیر. و بو اساسدان جینجیق مینجیق یانی ساخسی کاسا و بارداغدا ساخلانیلان مینجیقلار.
مینجیقا آیید مینجیق دوزمک ومینجیق سالماق( بیر نوع اینانج و مراسم ) داندا اورتایا بحث گتیرمک اولار.
مینجیق بر بزه کلی بیر نسنه اولسادا، یالنیز قادینلاردا یوخ، بلکه کیشی لرده مینجیقدان فایدالانیرلار. مینجیق یالنیز ده یرلی داشلاردان علاوه پالچیقداندا قایریلارکان مختلف رنگه بویانیر. البتده پالچیقدان قایریلان مینجیقلار یالنیز تسبیح دوزومونده ایشله نیر. تسبیح دئدییمیز سوزجوک عربجه ده اولسا، آنجاق اینانج باخیمیندان کیشیلر و قادینلار هم چئویررلر و هم ایسه استخاره ائدرلر.
قیزیل و بونا آیید ده یرلی نسنه لر،یئر تاپمامادان اونجه میر مینجیق قادینلارین بوینوندا هم ده یر و بر بزه ک باخیمیندا و هم ایسه اینانج باخیمیندان بویوندان آسلاناردیر. البتده یالنیز بویوندان یوخ، بلکه ساپا دوزه رک تئللریندن و پالتارلارینداندا آساردیلار. نئجه کی بیر دوشلوکه پیل تیکدیکدن سونرا دئیردیلر پیللی دوشلوک.
بو اساسدا مینجیقی اوشاغلارین و حئیوانلاریندا مختلف بلالردن قورونسونلار دئیه اینانج باخیمیندان بویونلاریندان آساردیلار.
دنه سی یئکه اولان مونجوغا چره که و کره که دئیرلر. چره که تسبیح قایداسینا دوندوکدن سونرا سایی اوتوز اوچ و اوتوز دوردده نه اولار. چره که نی یالنیز کیشیلر چئویررلر. تسبیحین دنه لری یوز بیر دنه اولار. و تسبیحین هر بیر دنه سینه بیر مینجیق و ایکی مینجیق دئیرلر. البتده مینجیق سوزجویو بو آنلامدان باشقا، چاینیکده قاینایان سویا دئیرلر سو مینجیغلاییر. و یا خود بیری یوخودان تر قان ایچینده اویانسایدیر دئیردیر تر اوز گوزومده مینجیق _ مینجیق دورموشدور. حتی آلاق و اوتون اوستونده دوران شئحه ده ایسه شئح مینجیقی دئیرلر.
بونا آیید مینجیقا گورا بیر آتالار سوزو وار دئیرلر( دلیک لی مینجیق یئرده قالماز )
ایندیسه مینجیق آدینا چئشیدلی آدلاریدا بیرر _ بیرر آشاغیدا قئیده آلیریق.
۱.گوز مینجیقی: بو مینجیق گوز ده یمه سین و بد نظردن قورونماق اوچون بویوندان آسارلار
۲.چیچک مینجیقی: چیچک سوزجویو گول آنلامیندان باشقا بیر نوع بدنده قیرمیزی سپینتی آلیزلیقدیر. بونا فارسجا سرخک دئیرلر. عینی حالدا چیچک چیخارتماق دان اوترو بو مینجیقی بویوندان آسارلار
۳.شه وه : زیل قارا رنگده اولان مینجیق آدی اولاراق بد نظردن قوروماق اوچون بویوندان آسارلار
۴.جین شه وه: زیل قارا رنگده اولان مینجیق و بو مینجیقین تامغاسیدا اولار
۵.گول مینجیقی:بو مینجیق اینجه و ظریف اولاراق اوستونده گولده اولدوقدان سونرا اوشاغین بوینونا آسارلار
۶.توز مونجوغو: چوخ اینجه و ظریف مینجیق
۷.داری مینجیق: چوخ اینجه و ظریف مینجیق
۸.مینایی مینجیق: بیر نوع مینجیق
۹.ساریلیق مینجیقی: بو مینجیق آدامی ساریلیق آزاریندان قوروسون دئیه بویوندان آسارلار
۱۰.یاغ بال: جینسی کهربادان اولان بیر نوع مینجیق
۱۱.قان مینجیقی: قان قوروتماق اوچون بویوندان آسلانان مینجیق
۱۲.ایت مینجیقی: حلزون
قورت مینجیقی: حلزون
۱۴.ایلان مینجیقی: مهره مار
۱۵.اوتکه مینجیقی: بیر نوع مینجیق. بو مینجیقی اینک مریض اولاندا سویون ایچینه آتاراق اینکه ایچیرتدیکدن سونرا اوتکه اوتکه دئیرلر
۱۶.آل آروادی دابانی: بیر نوع سوموکدن اولان مینجیق. بو مینجیقی بیر قورخماسین دئیه بوینوندان آسارلار
رحیم غلامی