کیتاب بیر دیری دیل-دۆشۆنجه‌نین یازیلمیش باری دیر. کیتاب بیر دیری وارلیق کیمی بیزیمله دانیشیر هابئله بیزی دۆشۆنۆب، آنلاییب، قانماغا چاغیریر. فاشیست‌لر، مۆستبید ایله دیکتاتور اینسان‌لارلا قوروپلار، باشقا دۆشۆنجه‌لری چکه بیلمه‌دن اۏ دۆشۆنجه‌لر تۏپلومدا یایقین اۏلماسین دئیه، اۏنلاری توتوب، تۆرمه‌لره باسارلار. ائله‌جه ده، دۆشۆنجه قایناغی اۏلان کیتاب‌لاری دا چکه بیلمه‌دن تۏپلوم‌دان اوزاقلاشدیرماغا چالیشارلار. تاریخ بۏیو چۏخلو اینسان‌لاری ائله‌جه ده اۏنلارین کیتاب‌لارینی قفس‌لرله قفسه‌لره باسیب، اؤلدۆرۆب-یاندیریب، آغزینی باغلاییب، سانسور ائدیب، آرادان قالدیریبلار. ایران‌دا دا بئله بیر داورانیش آز اۏلماییب. بللی دیر یئتمیش یئددی ایل اؤنجه، آذر آیی‌نین ۲۶-سیندا، تبریزده، اردبیل‌ده، اورمودا، زنگان‌دا… پهلوی حاکمیتی ألی ایله یاندیریلان تۆرکجه کیتابلاریمیزی خاطیرلایا بیلرسینیز. أللی یئددی انقلابیندان سۏنرا، دۆشۆنرلر اؤزگۆرلۆک اومودو ایله یاشاییب، بیر داها کیتاب‌ل ری‌نین اؤزگۆرجه‌سینه یاشاماغینا اومودلو ایدیلار. آنجاق، سۏنراکی اۏلایلار دورومون چۏخ دا فرقلی اۏلمادیغینی هابئله دگیشمه‌‌دیگینی گؤستردی.
دؤنه‌لرله منیمله باشقا آزربایجان میللی فعال‌لارینی توتوب، بۆتۆن کیتابلاریمیزی ییغمالاییب، آپاریبلار. یانی، اؤزۆمۆزو ده، کیتابلاریمیزی دا حبس هابئله زیندانی ائدیبلر. آیلار- ایل‌لر سۏنرا اؤزۆمۆزۆ اؤزگۆر بوراخسالار دا، کیتابلاریمیزی هله اؤزگۆر بوراخماییبلار! نه‌دن؟ بیزدن داها چۏخ، کیتاب‌لاریمیزدان قۏرخدوقلارینا گؤره می؟ بیزدن داها ۏخ اۏ کیتاب‌لاردا یازیلان بیلگی‌لره له دۏشۏنجه‌لره گؤره می؟ کیتاب‌لاردا یازیلان آنا دیلیمیزه گؤره می؟
آیدین‌دیر بیر میللتی یۏخ ائتمک اۆچۆن، اۏنون دیلینی، فۏلکلۏرونو، کۆلتۆرۆنۆ، دب‌لرینی، تؤره‌لرینی، … ۏنون ألیندن آلارلار. بیر میللتین دۆشۆنن بالالاری لا دۆشۆنجه قایناغی اۏلان کیتاب‌لارینی توتوب، تۆرمه‌له‌مک ایله بیزی یۏخ ائتمه‌یه چالیشسالار دا، گله‌جک نسیل‌لریمیزله اۏنلارا آنالیق-آتالیق ائدن تۆرکچۆ ، هابئله آزربایجانچی دۆشۆنرلریمیز گۆندن-گۆنه داها آرتیق بو سییاسته قارشی دایانماقدا دیرلار.
تۆرمه‌لنمیش بیر کیتابیمیزا قارشی، هر بیر موناسیبت‌ده، بایرام‌دا، شنلیک‌لرده، دۏغوم گۆنلرینده، اۏخول‌لارین (مدرسه‌لرین) آچیلیش گۆنلرینده، هر آی، هر گۆن، هر چاغلا (ساعت)، … مین‌لر کیتاب آلینیب، میللتین ائوینه یۏل تاپیب،
ائلیناسییون، ائله‌جه ده تاجیکلشدیرمه سییاست‌لرینه قارشی، میللی تۆرک کیملیگیمیز داها چۏخ منیمسه‌نه‌جک دیر. تۆرکو اۏخو، تۆرکۆ یاز؛ تۆرکجه کیتاب آل، هر بیر تۆرکۆن میللی شوعاری اۏلماقدا دیر. یاشاسین نه موتلو تۆرکم دییه‌ن‌لر.
سیما علیپور