داغلاری، دره لری و عینی حالدا کندلری دولاندیقدا، مختلف و چئشیدلی یول و بونا آیید یول آدلاریندا گوررکن، بعضا بعضی آنلاملاردا بئینیمیزی چالیشدیریردیر. بیرینجی آنلامدا یولا دوشوب. و یولا داوام وئردییم اساسدا و زامان سوره جینده گوروردوم. یولون هر طرفی یام یاشیل بیتگی اولسادا، دئدییمیز یولدا ائله زامان سوره جینده یام یاشیل بیتگی اولمالیدیر. آنجاق مختلف زامانلاردا آیاق ایزینین واسیطه سیله، اوت آلاق بئییندن گئده رک آیاغلار ایزی یئر تاپیب. و بو اساسدا یول سوزجویون آنلام باخیمیندان اوتو و آلاغی کسیلدیکدن سونرا آیاق ایزلری دوشن بیر یئر دوشوندوم.
بو قایدادا ناخیر سوزجویو مالین و عینی حالدا سیغیرین چوخ اولدوغو آنلامیندا اولسادا، آنجاق اونو اوتارانادا ناخیزچی دئیرلر. و بو حالدا ناخیرین کتدن چیخیب و باییرا اوتلاماق اوچون گئدیب و گلن یولونادا ناخیر یولو دئییلیر.
بوندان باشقا داغلاردا، مختلف خارابالاری گوره رک، دوره سی داشلارلا قالانمیش یوللاری گوردوکدن سونرا آرابا یوللارینی ان آیدینجا گورمک اولور. البتده آرابا اوزو اوتن چاغدا دورد قیچلی بیر حئیوانلا چکیلردیر.
یا باشقا بیر گورونتوده ان بالاجا آیاق ایزلرینه جیغیر و یا خود جیغیرا دئیرلر. حتی کهلیکین و بونا آیید قوشلاریندا، قارین اوستونده اولان آیاغلارینین ایزینه جیغیر دئیرلر.
بیز مختلف آدلی یوللاریدا بو داغلاردا ایزله یه بیلیریک. عشایر و شاهسئون و حتی کتلیلریندن داواملی گئت گل یولونا ائل یولو دئیرلر. و بوندان علاوه هامار یئردن چیخیب داغا طرف یوللارا داغ یولو دئییلسه ده، آنجاق ائلاتین میغاندان و ارشه دن یانی آراندان، یایلاغا طرف یوللارینادا یایلاق یولو دئیرلر. بعضا دره ایچیندن دوشن بئله جیغیر یوللارادا دره یولو دئییلسه ده، باشقا دئییم ده یئرین و یا کندین اورتاسیندان دوشن یولادا اورتا یول دئیرلر. ائل یولوندان علاوه کیچیک بیر یولا ایسه کسه یول( راه میانبر )و قارا یول(راه شوسه )دا دئیرلر. کتدن شهره گئدن یولا شهر یولو و شهردن کنده گئدن یولا ایسه کند یولو دئیرلر. اوزو یوخاری داشلیق و چتین یولا آت ائششک و یا خود آت قاتیر یولو دئیرلر.
بونلاردان باشقا کندلردنده کندلرده و حتی کندلردن شهرلره ده یول آدلاری اولور. اورنک اوچون بیزیم کتده اردبیل یولو آدینا بیر یولا راست گلدیکدن سونرا گوروروک کند اهلی ماشین اوزه چیخمادیقدان زامان آت ائششکله بو یوللاردان اردبیله گله رک وسایل آلدیقدان سونرا یئنه ده گون دوشمه ین یولوندا کنده قاییدیرمیشلار. حتی شوشه گمیرن کندینده و حتی خییه رکده لنج آوا یولونا راست گلیریک. کندیمیزده بیر یولون آدینا ائله بو گونده ده آورا یولو دئیرلر. آورا سوزجویو بو گونکو ارباب کندینین گرچک و دوغرو آدیدیر. و بونلاردان علاوه گوو یول(رنگ آنلاملی ) .داش یولو( اوتن چاغلاردا داش کسن کندینده دگیرمان داشینی کسه رک، اوکوز آراباسیلا بو داشلاری بو یولدان آپاراراق باشقا یئرلره سوواریش اساسیندا ساتارمیشلار. بو اساسداندی بو یولا داش یولو آد وئریبلر ). سیچان یولو، پیشیک یولو، قاریشقا یولو، سو یولو( باغدا دیوارلارین آلتیندا بیر بالاجا دلیک قویدوقدان سونرا اوردان باغین ایچینه سو آپاراردیلار ) .سودوک یولو( مجرای ادرار ).سامان یولو( کهکشان راه شیری ).مکه یولو، هاوا یولو، دنیز یولو,ماشین یولو و ها بئله….
ترکیبی قایدادا مختلف اورنک گتیرمک اولور.یول یولاق، یول یوندم، یولا چیخماق، یولا سالماق ، یولا دوشمک، یولچو( مسافر ) یولچو یولدا گره ک( آتالار سوزو ) و…
ایندیسه اوسته گلن یول سوزجویو ایز، اثر، رد آنلامیندا ایشلن سه ده، آنجاق یول سوزجویو مذهب آنلامینیدا یئتیریر، باخ یولسوز، یولسوزون بیری یولسوز
سون آنلامدا یول سوزجویو زوغدان چکمک و یا خود کسیب گوتورمک وکسیب آتماق آنلامیندادیر. باخ: باشینین توکون یولوب و یئله وئردیر. بوندان علاوه تارلادا مرجی و نوخود توپلایان آداما یولماچی دئسه لرده. آنجاق ائله مرجی و نوخودادا تارلا اوستونده یولما دئیرلر. یا خود بیریندن سورولاندا نه ایش گورورسن. دئییر یولماچیلیق ائدیرم. بو اساسدا بیر بیتگینی زوغدان چیخاردان آداما دئیرلر یولوب و لاپ زوغوندان چیخارتدیر. یولماقدان آماج یالنیز ال واسیطه سیله یولمالییق. یوخسا اوراق و بونا آیید ایشلرله یوخ. حتی بیر قوشون قانادینین توکو چکیلنده اونا یولوق قوش دئیرلر.
و سوندا بیر نئچه نفر بیرلیکده سفره گئتسه لره اونلارا یولداش دئیرلر. و بو گونلرده یولداش دوست و رفیق آنلامیندا ایشله نیر.
