آجلیق رُمانی، نروژ اؤلکهسینین مشهور یازاری، کنوت هامسونون اثریدیر. 1890- جی ایل چاپ اولموشدور.
هامسون، 1859- جی ایل، نروژ اؤلکهسینده و یوخسول بیر عائلهده آنادان اولموشدور. 22 یاشیندا آمریکا اؤلکهسینه کؤچ ائدیب، 1883- جی ایلدن بری، یازارلیغی اصل پئشهسی سئچیب و نئچه مشهور اثر یادگار قویموشدور. اصلینده «آجلیق» رُمانی ایله شهرت قازانا بیلمیشدیر. بیر سیرا تنقیدچیلر دئییرلر: فرانتس کافکا، «آج صنعتکار» داستانینی، هامسونون «آجلیق» اثریندن تأثیر آلارکن یازمیشدیر.
لهستان اؤلکهسینین مشهور یازاری «ایزاک باشویس سینگر»، «کنوت هامسون»و دونیا مدرن یازارلارینین آتاسی لقبینه لایق گؤرموشدور. بیر سیرا تنقیدچیلر، لاپ بئله «پست مدرن یازارلارینین آتاسی» عنوانینی هامسونا وئرمیشلر. هامسون، فرانس کافکانین بوش و دهشتلی سوژِتلریندن اؤنجه، هابئله اگزیستانسیالیستلرین سیخینتی و دارغینلیقلاریندان اؤنجه، دونیا ادبیاتین چالشه چکمیشدیر. حتی بو سیاههیه، چارلز بوکوفسکینی ده آرتیرماق اولار. همسون، داستاندا اولوب- کئچنلرین یئرینه، کاراکترلرین بئیینلرینین آلت قاتلاریلا اوغراشیر. بو مسئلهنی آجلیق رُمانیندا آچیق- آیدین گؤره بیلیریک و قاباریقدیر. کنوت هامسون، آجلیق رُمانینی یازدیقدان سونرا، یازارلیقدا «فئودور داستایوفسکی»دن ایرهلیلَمهیینی و «هنریک ایبسِن»ین اجتماعی رئالیسمینین یوخا چیخارتماسین، ادّعا ائتمیشدیر.
ایزاک باشویس سینگر، بونا معتقددیر و بوبارهده دئییر:
«20- جی عصرین بوتون ادبی مکتبلری، کنوت هامسوندان تأثیرلنیبلر.»
بونلارلا بئله، سیاسی کاریزماسی، هئچ ده ماراقلی دئییل. او، ایکینجی دونیا ساواشی ندا، نروژ اؤلکهسینده نازیلرین اَل آلتی دؤلتیندن حمایت ائتمکله، بوتون پوپولیارلیغین الدن وئرمیشدیر و اونا هیتلرچی لقبین وئرمیشلر. بیر سیرا تنقیدچیلر دئییرلر: «همسون، نازیلردن حمایت ائتمکله، تکجه نروژ یوخ، بلکه بوتون انسانلیغا خیانت ائتمیشدیر.»
آنجاق، کنوت هامسونون اثرلرینه گؤز یومماق اولماز. ایستر سئویملی اولسون، ایستر اییرَنج!
هامسونو انکار ائدنلر، دونیا ادبیاتینین پازلین پوزماق ایستهییرلر. اینگار کولوئن یازیر: «هامسونو سئومهمک اولماز. اولا بیلسین کی بیز ایللر بویو اوندان نفرت ائتمیشیک! او سانکی بیر روحدور و مزاردا قالماق ایستهمیر!»
1920- جی ایل، نوبِل مکافاتینی قازانماقدا، «آجلیق» و «یئر اوزونون مئیوهلری» اثرلرینین چوخ تأثیری اولموشدور.
1952- جی ایل همیشهلیک دونیایا گؤز یوموب.
: بو اثری، اصلینده «نادر قوجا بَیلی» آذربایجان تورکجهسینه چئویرمیشدیر، «رحیم خیاوی» جنابلاری ایسه عرب الفباسی ایله تورکجهمیزه کؤچورن اولوب. تصحیح و تحشیهسی ایله منیمله اولوب. ناشری ده آقای نظامیانین باشدا اولماغی ایله، «سونا» انتشاراتیدیر. بو بؤیوک اثرین چاپ اولماسیندا، منیم ده چوخ کیچیک حصّهده اولدوغوم نقش اوچون، سئوینیرم. انشالله اوخوجوسو بول اولار.
شاهین مرادی