آنا دیلی اوغروندا (قسمت اول)
آنا دیلیمیزی آکادمیک بیچیمده اؤیرنمک اوغروندا ایلک آددیم کیمی دوکتور علی حسینزاده(داشقی)نی یئتمیش سککیزینجی ایلده سولدوزا چاغیردیق. ایکی تئرم اوخودوق. سونرا بیر سیرا سببلردن دولایی کلاسلار دایاندیریلدی.
بیر ایل آرادان سونرا همین کیلاسلار اورمودا آچیلدی. داها سونرا خویدا طیب باجیلاری فاکولته ( دانشکده رشته ی پرستاری)سینده سیخی بیر دیل کلاسی آچیلدی. تام دیل بیلگیسی درسلری دوکتور داشقین طره فیندن وئریلدی. آنا دیلی ائیتیمیمین گلیشمه سی اوچون هر هفته جوما آخشاملاری سولدوزدان اورمویا گئدیب، اورمو بیلیم یوردونون یاناقخاناسیندا قالیب، اورادان ائرکندن خویا گئدیردیک. بئله لیکله سکسنینجی ایلده بو کورسو دا باشا ووردوق. آما بونونلا یئتمک اولارمی؟! -یوخ!!!
پاسپورتومو آلان کیمی ناخچیوان اؤزارک (خودمختار) جمهوریتینه گئتدیک. اورادا آذربایجان دیل و ادبیاتینی بیتیردیک. بیر ایل آرادان سونرا باکی یا گئتدیک. یوکسک لیسانسی آذربایجان دیلچیلییی دیل بیلیمی اوزره بیتیریب، سونراکی ایل دوکتورایا تورکولوژی – تورک دیللری اختصاصی اوزره تحصیله باشلادیق. 2015-جی ایلده بیتیردیک. سکسنینجی ایلدن ده آنا دیلیمیزی سولدوزدا اویرتمه یه باشلادیق. ۷ تئرم سولدوزون پیام نور بیلیم یوردوندا درس دئدیکدن سونرا درسلری دایاندیردیلار…
هله بهانه لرینی بورادا گتیرمیریک… سونرا سولدوزون ارشاد اداره سینده ایکی تئرم درس دئدیکدن سونرا حاجی آغا سپهری استان ارشاد اداره سینین مدیری طرفیندن اداره اطلاعاتین تاپشیریغیلا دایاندیریلدی. داها سونرا اورمودا غیری حکومتی تشکیلات اولان بیلیم یولونون سولدوز بولمه سینی آچیب اورادا اوچ ایل چالیشدیقدان سونرا اورانی دا باغلاتدیلار. سونرا اورمودا بیلیم یولودا یئنیجه دیل کلاسلارینی آچمیشدیق کی اورانی دا سکسن آلتینجی ایلده باغلاتدیلار.
آرتیق بو بوغونتولو اورتامدا هئچ بیر فعالیت گؤسترمک اولموردو. اونا گؤره یوکسک لیسانس اوزره تحصیلیمیزی داوام ائتدیرمه یه قرار وئردیک. یایلاردا و ایراندا اولدوغوموز ایللرده هر زامان آنا دیلیمیزی اؤیرتمکدن واز کئچمه دیک. دوکتورانی بیتیریب سولدوزا دؤندوکده «طلیعه فرهنگ سولدوز» موسسه سینده تکرار آنا دیلیمیزی اؤیرتمه یه باشلادیق.
دوغرودور قاباقکیلار کیمی باسقی چوخ دئییلدی آما هله خالق ایسته دییی الده ائدیلمه میشدی. سونرا اورمو ادبیات فاکولته سینده اوچ ایل تورکیه دیل و ادبیاتی بؤلومونده درس دئدیک، داها سونرا صنایع فاکولته سینده ایکی واحد آنا دیلی درسلرینی دئمه یه باشلادیق. اورمو ادبیات فاکولته سینده تورکیه بؤلومو قاپاتیلدی.
▪️آردی وار…
دکتر میرعلی رضایی