هرهنین یاشام یادداشتینداکی لحظهلر، سینما پردهسی کیمی چکیلمیشدیر. ائل یولوندا
هر سئودییین شخصین خاص آنلاری و گونلری یادیندا قالیر، اؤزو ده شکست و قهرمانلیق آنلاری…
آتامین قهرمانلیق تصویری، ۱۳۶۵-جی ایلینده، ایران عراق جنگینده، کربلای ۵ عملیاتیندان سورا مرخصییه گلمهسی ایدی. داغدان گؤی آتیمیزین بئلینده ائنیردیلر، کند جاماعاتی دا اونلاری مشایعت ائدیردیلر.
آتیمیزین کیشنرتیسی همیشه منی سئویندیرردی، همیشه مظفر کیشیلرین آتی کیشنرمیش تاریخده…
آتام جنگه گئدندن سونرا، ساری قولاقلی قوچوموزو دا جنگه کمک اوچون دالی سوره یوللامیشدیق…
بیر بوز تویوتایا میندیردیلر بوینو قیرمیزی قوتازلی، آلنی خینالی قهرمان قوچوموزو.
اوشاقلیق چاغیندا ائله دوشونوردوم، آتامدا قورتارماسا بو اؤلکهنی صدام-ین الیندن، ساری قولاقلی اَکه قوچوموز مطلق قورتاراجاق، آخی چوخ ووروشقان ایدی او.
آتام قاییتجاق سوروشدوم، قوچوموز صداما نئچه کلله وورا بیلدی؟
دئدی؛ _ ساری قوچ داوا دالاشا گلیب چیخمادی! دالدا کسیب یئمیشدیلر اونو!
من قهرمانی یئنیلمیش فیلم گؤروجوسو کیمی اولموشدوم! اینانمیردیم قوچوموزون ساواشا گئدیب چاتماماسینا! آخی او بوتون سورولرده کی قوچلارین بوینوزلارینی سیندیرمیشدی… باجیلار اونون آلنینا خینا یاخمیشدیلار، من بوینونا داغداغان باغلامیشدیم، اصیل خامادان توخونموش قوتاز تاخمیشدیم… آللاه بیلیر بلکه گؤز دَیمیشدی اونا…
*
سورالار آتام کند شورا سئچکیلرینده من یاشدا اولان، اؤزو دئمیشکن اوشاق-موشاقلاردان شکست یئمیشدی!
چوخ آغیر گلمیشدی قوجا کیشییه!
بلکه کربلای ۵ شکستیندن ده آغیررررر…
«نصرت رحمانی»نین قهرمانینا بنزهییردی؛ (- جنگجویی که نجنگید و شکست خورد!!!)
*
آتام اؤلنده داملا-داملا اؤلدو!
دالبادال عملِ جراحی، شیمیدرمانی، فیزیوتراپی و سونرا یاتیر دوشدو…
اؤلدویو گون (۱۷ دی ۱۳۸۹)، هامیمیزی ییغدی باشینا اهمالجا دئدی کی؛ – منی کند قبریستانیندا باسدیرمایین هاااا…
من ائله بیلدیم یقین دئیهجک کی، آپارین قم، مشهد، کربلا، امامزادا و یا…. – به نئیلهیهجهییک آغا؟ سوروشدوق.
دئدی؛ -خانیوردونا ساری بوغدا اکمیشم، یاخشی دا گؤیهریب، اوردا باسدیرین!
صبح آذانین سووشموشدو، کند جاماعاتی قبریستانا ساری گئدیردی، بیز بالالار و عمیلر بوغدالیغا ساری گئتدیک مزار قازماغا…
آتام بیر عؤمر اکیب تؤکدویو آتا بابا تورپاغینی بیزدن چوخ سئویرمیش… . .
اتکیازی: فوتو شکیل آتامین بوغدالیقلاریمیزداکی مزاری دیر.
سعید موغانلی
ائل یولوندا “آتانین شاعیر مزاری” و ائل یولوندا “ائولادین شاعر حیاتی”