دیوان لغات التورک مثللری:۱-«اَرقاسِیز اَلب، جَرِک سِیوماس.»
معناسی بئلهدیر: آرخاسیز ایگید، صفلری و یا آلایلاری پوزا بیلمز. (دؤیوش صفلرین دئییر.)
دوغرودور، مین ایل بوندان قاباق ایشلهنیلن مثلیمیز، ایندی ده ایشلهنیر، اوخویاق:
«آرخالیدیر، آرخاییندیر.»
«بیر کیشی آسلان دا اولسا، بیر شهره نئیلییه بیلر؟»
«آرخالی کؤپک، قورد باسار.»
«تک الدن سس چیخماز.»
۲-«اَرمَکوکا، بُلِت یُک بُلور.»
یعنی: تنبل و کاهال آداما، باشینین اوستونده دوران بولود دا یوک ساییلر.
بو گونکو مصداقلاری بئلهدیر:
«تنبلین ایشی سحره قالار.»
«تنبل دئیر وئر یئییم، اؤرت یاتیم، گؤزله جانیم چیخماسین.»
«کاهالا یوموش بویوراسان، اون کتابلیق نصیحت ائدر.»
«کاهال عورت، بئشیگی یاتارکن ییرغالار.»
۳-«بئش اَرنَکاک تُوز اَرماس.»
یعنی: بئش بارماغین بئشی ده بیر اولماز. دقیقاً ایندی ده بچ فورمدا ایشلهنیر. باشقا واریانتلاری دا وار:
«آلله بئش بارماغین بئشینی ده بیر جوره یاراتماییب.»
«بئش بارماغین بئشی ده بیر قرار اولماز.»
«بئش بارماق دوز دئییلدیر.»
«هر اوخویان ملّا پناه اولماز، هر قاطیرچی موراد.» (دئییرلر بو مثلی بیرینجی دفعه شاه قاجار او تایدا ایشلهدیب و ملّا پناهین شعرلرین اؤز اوردوسو ایله برابر توتورموش. بو اوزدن بو مثلی دیلینه گتیریب.)
- شاهین مرادی دیوان لغات التورک مثللری