ابلفزین شفاسی/ذکیه ذوالفقاری قادین محررملیک گیرندن قالمیشدی قیزینین اَلینـده
قادین محررملیک گیرندن قالمیشدی قیزینین اَلینـده، هر گون هاوا قارانلامامیشدان تاتارلانیب، گئیینیب بزنیردی ؛دورما گلدیم شاخسئـیه؛ دستهیه. قادین یازیق بیلمیردی هانگی دردینه یئتیشسین.آتاسی ائوین بیر گوشهسینده سیز- سیز سیزیلداییر؛درد اَلیندن قیوریلیر-آچیلیر، بیر یاندان دلی دولو اوغلو ایکی آیاغین تپیب بیر باشماغا کی منیم نذریم وار محلهنین دستهسین تاسوعا گونو ائوه دعوت ائتمیشم.
کیچیک ائوین بیر گوشهسینده قوجا کیشینی خستهلیک آماندان سالمیشدی. زیققیلداییب زاریلدیردی.هردن آغریلاری شیدتلی توتاندا ایلان تک قیوریلیب آچیلیردی.نیمداش کؤهنه رنگی قاچمیش یورقان دؤشهگین اوستونده اوزانمیشدی .دؤشهگین یانیندا بیر بالاجا پلاستیک دولچا ایچینـده نایلون گؤزه دَگیردی. معدهسی بولاناندا او دولچایا قایتاریردی .آچیق تاختا پنجرهدن هردن بیر خوشا گلیم نسیم ایچرییه گیرسه ایدی ده قوجا ایچیندن یانیردی. گچـدن قارا دوواردا اولان قدیمی بیر کؤهنه ساهاتین تیک-تاکی قوجانین بئینینه ایشلیردی.بو گون تاسوعایدی قیزی نین باشی چوخ شولوغویدو .اَلینده اولان بئش-اون تومن پولودا وئریب دستهیه وئریلن احسانا ور-وسایل آلمیشدی.قوجانین حالی چوخ خارابیدی.سسی چیخار-چیخماز قیزینی چاغیردی.قیز درهول ایچری گیردی.
_بالا منه بیر آغری کسیجی وئر سانجی آماندان سالیب منی.
قادین چکمهجهیی آچیب گؤردو درمان یوخدو.
–آتا درمان بیتیب؛ایندی ده هر یئر باغلیدی. او درمانلاردا سنه کار سالمیر .آنجاق منیم باشیم دا بتر قاریشیقدی.بیر آزدان دسته گلیر حیهطه سنی آپاریب دسته قاباغیندان یاتیردارام حضرت اَبلفزدن شفاوی آلارسان.
–اولسون بالا ایشیوه یئتیش ایمام حسین عوضین وئرسین.جانیم قوربان ابلفزله دؤهتورده اودو درماندا.
بیر آزدان طبیللرین سسی بونلارین کؤهنه ساخت ائولرین تیر-تیر تیتردیردی.دسته حیهطه گیرمهمیشدن بیر سورو خانیم، پوزلو- موزلو، عطیر-پودورلو،کیشی یاتان اوتاغا گیردی .جومالاشیب پنجره نین قاباغینا. دوردولار. قوجانین آغیرعذابدان ،طبیللرین سسیندن بئینی پاتلاییردی.
قیزی گلدی:
–آتا دور گئدک حیهطه ،سنین دؤهتورونده اَبلفز دیر درمانیندا.
قوجا سیزیلدایاراق: دوزدو بالا گل یاپیش دوروم. یا ابلفز اؤزون کؤمک ائله.
بیر ایکی نفرله قوجانی قاوزاییب گوجویله حیهطه آپاردیلار. دستهنین قاباغیندا اوزالدیب اوستونه بیر پتو سالدیلار و دسته باشی اونو گؤروب چوخ شورا گلدی یا اَبلفز هارایی گؤیه قالخدی. ایکی جاوان اوشاقـدا گوجویله طبیللره دؤشویورلر. زنجیرلر گؤیه قالخیب قیژیلدیلا کؤرکلره ورولوردو و هین سسی قوزانیردی …اوردا اولانلار هامیسی قان یاش تؤکورلر. بئش اون دیقه بو گؤرملی و کدرلی صحنهلردن سونرا دسته باشی هامینی اَلی ایله اوتورماغا دعوت ائلهدی ، زنجیرلری یئره قویوب باغداشی قوروب اوتوردولار.. نوحه خوان بیر یانیقلی اَبلفز مرثیهسین اوخوماغا باشلادی. پنجرهده دوران قیزلار ین گؤزلری ، هئش وضعیتی گورمهمیش تک،هیجانلا دسته اوزرینده فیرلانیردی.یئره اوتوران جاوانلاردا او طرفلرده نهسه آختاریردیرلار.
قادین بیر نئچه کومکچیایله، پیشیردیگی قیمه پلووی قابلارا چکیردی اوغلانلار دا پایلاییردیلار.اورتا دا اوزانان خسته کیمسهنین یادیندا دگیلدی. ائوین اوغلو فیر-فیر فیرلانیردی هردن بیر پنجرهنین اؤنونه کئچیب قاش-گوزویله بیرینه بیر شئیلر آنلاتیردی.
هامی یئییب–ایچنـدن سورا دسته آیاغا قالخدی.او آندا قادین گلیب آتاسینی ائوه آپارماق ایستدی. پتونو قیراغا چکنده او جان قیشقیردی:
بابا…….
بیری او طرفـدن دئدی:
خوش حالینا اَبلفز شفاسین وئردی…