تواضعکارلیق،ادب،معرفت،فداکارلیق ،بیلیم،مدنیت دوشونجه،صداقت ،دؤزوم و باشقا باشقا گؤزللیکلر
بئله انسانا هئچ دوستاق یاراشیرمی!؟یوخ، آمما وطن و میللتینین قایغیسی اونو خسته اولاراق آغیر زیندانلارا و مختلف ایشکنجهلره معروض قویوب.
بو گؤزل بؤیوک انسانین یئنی شکلین سانال دونیاسیندا گؤرجک چوخ فیکیرلر بئینیمده دولاندی آمما آلقان معللیمین «بیر گون قیامته گلهجهیم من» آدلی شعری منی اؤزونه چکدی. سایین آلقان دوستومون بو شعری هم مهندس علیرضا فرشی نین دورومونا اویغون بیر شعریدیر همده کی توپلوموموزون فعلی وضعیتینه اویغون بیر احوالات!
دئمک شاعیر بو شعرده اومودون الدن وئرهرک یورولموش بیر موبارز کیمی توپلوما حاکیم اولان بیر سیرا گرچکلری نظرده آلاراق گلایه و شکایت دیلیله شعرین باشلاییر آمما سونرا ایناندیغی دوشونجه دن گوج آلیب یئنیدن اومودلهنرک ظفره دوغرو موباریزه سین دوام ائدیر
اوستاد آلقانین بو شعرینی تقدیم ائدیرم یورولماز عالی کاراکتئره ییلهنن سایین مهندس علیرضا فرشی جنابلارینا
سونوندا تانریدان جناب فرشیه جان ساغلیغی و اوزون عؤمور دیلهییرم و ظالیملره ویجدان عذابی!
بیر سؤنمز آلووام خالق اوجاغیندا
نه قدر دونیا وار یاناجاغام من
کؤکرهییب گؤیلره اولدوزلار بویو
قارانلیق گئجهنی داناجاغام من
گؤزومده بیر اوزون یول چکیر منی
بیر گون حقیقته قوووشام گرک
چینقیللی داشلارین اورهیین یاریب
داریخمیش گولله تک سوووشام گرک
بو یورد ازل گوندن بیزه دوشمهدی
بوردا چؤسکو میخی چالمایاجاغام
آند اولسون بابکین قان بایراغینا
داها بو توپراقدا قالمایاجاغام
آتاما باباما نه وایا قیلدی
منه ده نه وایا قیلا بو توپراق
گؤزومده بیر مانات قارا پول دئییل
داشلاری گؤهردن اولا بو توپراق
بو یئر ساتقینلارین اوولاغی اولموش
بوردا دوز اینسانلار یاشایا بیلمز
بوردا باغلی قوللار باغلی دیللرین
چکیب غم شلاله سین داشییا بیلمز
بوردا آلا قارقا بالا چیخارتماز
بوردا ایت قویونو یاتاقدا یئییر
بوردا باشا چاتماز اوزون آرزولار
بوردا غم گولوشو دوداقدا یئییر
بوردا بیر سرطان سوواشیب بیزیم
سوروب قانیمیزدان سارالدیب سویور
بوردا حاق دانیشان حاققا چاتانماز
سئرچه لر قارتالین گؤزلرین اؤیور .
سنه قوربان اولوم آی آنایوردوم
قفسده ساخلاما بو تایدا منی
هنر گؤیلرینین پارلاق اولدوزو
بختیار سسلهییر اوتایدا منی .
دورمایین قارشیمدا چکیلین گئری
ایندیجه اود یاغیب آلوو قوسارام
ائلیمه اوباما خور باخانلارین
یاندیریب چوخاسین داردان آسارام
بو باشسیز کاروانین اووسارین توتوب
آزادلیق یوردونا چکمهسم اولماز .
ایندی سؤز عصریدی آتیشمالاردا
سؤزو توپ یئرینه چاخمالییام من
بیر گوجلو سئل اولوب داغی چاخنادیب
جوشقون دنیزلره آخمالییام من .
منه اؤلوم یوخدو دونیالار بویو
آلقانام فکر ائتمه اؤله جه یم من
قوشولوب بوزقوردا قول-بویون اولوب
بیر گون قیامته گله جه من
اومید و بوتون گؤزللیکلر سنده جمعیدیر/علیرضا شیرزاد