بالا سوزجویونه اوته ری بیر باخیش

باخیش
بالا : کیچیک، گوده بوی،اوشاق، قوش جوجه سی، هم انساندا و هم حیواندا اوشاق آنلامیندان باشقا کیچیک، گوده بوی آنلامینیدا داشیییر. باخ: آخی آدام بالاسی سان(بیریندن اینجیک اولاندا ایشله درلر )، آدام بالاسی(بنی آدم )، آیی بالاسی، ایت بالاسی، قوش بالاسی و …. بالا سوزجویو کیچیک قایدالی آنلامدا بئله ده آیدینلیق وئریر. بو قاز (پیک نیک ) بالا باش باشلیق یئییر(اورنک ) .عینی حالدا بالا باش یالنیز اشیادا یوخ بلکه انساندادا کیچیک باشی اولان بیر انساندا دئمه لیییک. بالا بوش دئییمین متضاددی بویوک باش و یئکه باش اولور. بالا سوزجویو اوشاق آنلاملی اولاندا بو مثاللارلا آیدینلاشیر. بالام بیریان پیشدی( اورنک )،بالالارین آلیب قانادینین آلتینا کئچینیر( دئییم )، اوز بالامدان چکیرم( حسرت )

بالا بوی: کیچیک قد، گوده بوی، قد و بویدان کیچیک اولان. بو سوزجویه آیید آشاما قایدا بو اساسدا اولور. بالا بوی( گوده بوی )، اورتا بوی(متوسط قد )، اوزون بوی و اوجا بوی( بلند قد )
بالا قوش: یاشدان کیچیک و عینی حالدا جوجه اولان قوش، قوشلارین توک چیخاردیب و یاواش یاواش اوچان بالالاری
بالا مایا: گوورچینده دیشی اولان و جاوان و هله یومورتلامایان بیر بالا قوش. عینی حالدا بونونلا یاشیت اولان بو قوشون ائرکه یینه ده بالا نر دئیرلر.
بالا باش: کیچیک باش، خیردا باش( هم انسان، حیوان و اشیادا )
بالا باجی: کیچیک باجی، یاشدان کیچیک اولان باجی
بالا _ بالا: یاواش _ یاواش، آستا _ آستا، بو ایکی بالا سوزجویو تکرار قایداسیندا، یاواش، آستا و احتیاط آنلامیندا اولور. بالا _ بالا گلدی، بالا _ بالا دومان داغی آلدی، بالا _ بالا سئل گلدی، بالا _ بالا داشی گوتوره رک اونون باشینا ووردور.
بالاجا: کیچیک، گوده بوی .باخ: بالا جا باجی، بالاجا قارداش، بالاجا یئر، بالاجا سوز، بالاجا ائو، بالاجا باشماق، بالاجا گوز، بالاجا دام و…
بالاجالاتماق: قیسالتماق، کیچیلتمک
بالا آتماق: بیر حیوان بوغاز اولاندا، ضربه اساسیندا بالا آتیر( سقط جنین )، بو انساندا زییان ائله مک و قوتاج ائله مک اولور
بالا سالماق: اوشاق سالماق(حیواندا )
بالالی: بالاسی و یاوروسو اولان قوش
بالاخانا: دامین اوستونه چیخیلان بالاجا بیر ائوجیک. بو سوزجویه آیید دام یولودا دئیرلر. بالاخاناسین اجاره وئریب(آتالار سوزو )
بالا خانیم: کیچیک خانیم
بالا بیگ: کیچیک بیگ، موغاندا و ارشه ده تایفا آدی
بالا بولا: اوشاق، ایکی قادین بیر بیرینه چاتدیقدان سونرا، خوش بئش ائده رک دئیرلر بالا بولان نه قاییریر( اورنک )
بالالاماق: چوخ سایدا دوغماق( حیوان ) ، زاد و ولد، بالالاییب هر یانی دولدوروب، دوغوب توره تمک
بالا چیخارتماق: گوورچینده یومورتادان چیخان جوجه
بالا چکمک: گوورچین قوشونو یالنیز بالا توره تمک اوچون ساخلاماق.
بالا وئرمک: ان یاخشی جوجه و بالا تورتمک اوچون ساخلانیلان گوورچین
بالا ایت: گوده بوی ایت، کوچوک ایت

بالا سوزجویونه اوته ری بیر باخیش/رحیم غلامی