بو دا ایچی بوش چیخدی
حماس ایله اسرائیلین قانلی-قارا ساواشیندان ایگیرمی سکگیز گون اؤتوب. ایگیرمی گون اولار اسرائیل غزه زولاغینین قوزئی بؤلگهسینی آغیر بمبالارلا یئرله بیر ائدیر. بیر هفته دن چوخدور اسرائیلین پیادا قوشونو، ان گلیشمیش تکنیکال سیلاحلارلا غزه زولاغینا گیریب و حماس سیلاحلیلاریلا یئرآلتی تونللرده اﯙز-اﯙزه دؤیوشورلر. بو مدت ده غزه اهالیسی هر تورلو ساواش جنایتلریله اﯙزبه اﯙز قالیب. بشریتین اوره گینی گؤینه دن هر تورلو حربی بربرلیک غزه ده باش وئریر.
نئچه گون اوللرده، حماس هوجوموندان سرخوش اولانلار، حماسا به-به دئییب ال چالیردیلار. سانکی حماسین حمله سینده الی له اشتراکی اولدوغونو هره بیر جور گؤستریردی. حتی بعضی محفللرده بو حملهنی ایران حاکمیتی پلانلاشدیردیغیندان سؤ ز گئدیردی. سونرالار وضعیت گئت-گئده دگیشدی. ساواش جیددیلشدیکجه هر کس اؤزﯙنو آریتلاماغا باشلادی. ایندی غزه جماعتی اسرائیلین قانلی تاپداغی آلتیندا قالیب.
کیمسه اینانمازدی عمل مئیدانیندا، عرب دؤولتلری حماسین آرخاسین بوسایاق بوشالدارلار! بو گونهدک حماسا هئچ بیر عرب دؤولتیندن فاکتیکی بیر حربی دستک وئریلمهییب. یالنیز یمن نئچه فوزه آتیب، اونلار دا هدفه چاتماییب و یا گؤیده وورولوب.
اومود قالمیشدی لبنانداکی حسن نصرالله جنابلارینا. بیر هفته دی اوردا-بوردا دؤهول چالینیر کی جناب نصرالله بو جمعه گونو اسرائیله قارشی هجوم فرمانی وئرهجک.
اما سن دئمه حسن نصرالله جنابلاری دا، ایچی بوش ایمیش.
نصرالله بی دانیشدی. آمریکانی بیر چوخ قینادی. اسرائیلین بو ساواشین آردیندا محو اولاجاغینی وعده وئردی. عراقدا آمریکالیلارین اﯙزهرینه حمله ائدن قوروپلارا باراک الله دئدی. ایرانین حماس حملهسینده الی اولمادیغینی قات-قات وورغولادی. آنجاق حزبالله قوشونونا اسرائیل تورپاغینا هجوم فرمانی وئرمهدی!
البته نصرالله جنابلاری بو فرمانسیزلیغی سؤز گولشدیرمکلرله اؤرت-باسدیر ائتدی. او دئدی:« حزب الله همان أزل گونلردن اسرائیل علیهینه ساواش باشلاییب و اسرائیل سرحدلرینه سالدیری گئرچکلشدیریب.
اونون بو سؤزو، آچیق آیدین، حزباللهین بو ساواشدا، یئمک شکلینده یوخ بلکه یالاماق صورتینده اشتراکینین آردیجیللیغینین گؤستریجیسی دیر. یعنی یازیق غزه اهالیسی و بیچاره حماسلی لار اؤزﯙنوز اؤز باشینیزا چاره قیلین.
بونلارین هامیسینین تورک دؤولتلرینین قوشون لاری اونلارین وریندن گئدیب اسرائیل علیهینه ساواشاجاق گؤزلنتیلری ده چۏخ ماراقلی دیر.
بیری یۏخدورمو بونلارا دئسین، عاغیللی اۏلان اؤزگه ایپی ایله قویویا گیرمز.
یازار: حسن ارک
۱۴۰/۸/۱۲