بیزی بیرلَشدیرن اۏلایلار
بو گۆنلر چۏخ آجی اۏلایلار یاشاماقداییق. خۏی زلزلهسینین سارسینتیلاری و آجی ماجرالاری داوام ائدر کن، تورکیهده باش وئرن دهشتلی و قورتونج زلزله هامیمیزی چۆخ دریندن کدرلندیردی. بو گۆنلر، بو اۏلایلار و آجیلیقدان گؤرمهسی بئله چوخ چتین اۆلان صحنهلر بیزیم تاریخیمیزین چۏخ اؤنملی بیر بؤلۆمۆ اۏلاراق، اۏلدوقجا بۆتۆن امکانلارلا سندلشدیریلمهدیرلر. چۏخ دا آغیر اۏلمایان خۏیدا باش وئرمیش زلزلهده، جان ایتکیسی آز اۏلسا دا، مال ضرری چۏخدور. ائولرین چوۏخو اؤزللیکله کندلر و شهرین کنار محله ائولری اۏتورما و یاشاما امکانلارینی ایتیریبلر و ضرر گؤرنلره جیددی یاردیم ائدن بیر دولت اۏلماسا دا، اۏنلارین دردینه قالان بیر ملتین اۏرتادا اۏلدوغو اؤنملی بیر گئرچکدیر.
بئله بیر اۏلایلار هر نه قدر بیزه جان و مال ضرری وئرسهلر ده، بیزی بیز ائتمک و بیزیم میللتلشمهمیز اۆزره بؤیۆک بیر آددیم ساییلیرلار. بو ساحهده ایلک تجربهنی قاراداغ زلزلهسینده یاشادیق، آمما بو گۆنلر اۏنونلا باش باشا قالدیغیمیز خۏی زلزلهسی، بیزی بیر داها آیاقلاندیردی.
بئله بیر آجی اۏلایلاردا هر حیسس و دویغودان اۆستۆن اۏلان، انسانلیقدیر. هر حیسس و دویغودان اؤنجه ده انسانلیق شفقتیایله میدانا گلمَک لازمدیر، ائتنیسیته، ملیت، کیملیک و سیاست فاکتورلارینا باخمادان آما تأسفله دونیا بیزیم دوشوندوگوموز قدر اومانیست و انسانلیق دونیاسیدئییل. بیز بونو دؤنه- دؤنه گؤروب تجربه ائدیریک. اصلینده هئچ ده یاخشی بیر شئیدئییل بو، آما گرچکلری گؤروب آنلاماق لازمدیر. یانلیش آنلاشیلماسین، بو دئمک، اؤزوموزو باشقا میللتلره قارشی دویارسیز اولماغا دعوت ائتمک دئییل، بلکی اؤزوموزو داها آرتیق دوشونوب، هرکسدن اؤنجه و هرکسدن داها چوخ اؤزوموزه دَیَر وئریب، اؤنَمسهییب، شفقتلی اولماغا دعوت ائتمکدیر.
خویدا یاشانان سۏرونو اینجهلهییر کن کیمین نئجه داوراندیغی، کیمیلرین یاردیم الی اوزاتدیغی و کیمیلرین دویارسیز قالاراق باشاردیقجا بو غریبانلاری یالنیز باشینا بوراخمایا قالخیشدیغی، چوخ بؤیوک و عبرت دولو بیر درسدیر. بیز تورک و آذربایجانلیلار هئچ زمان هئچ بیر ملتله بئله داورانمادیق، داورانماریق. ایرانین هانسی بؤلگهسینده هر هانسی میللت بئله بیر بلایا دوچار اولسا ألدن گلن قدر یاردیما چالیشاراق، ألیمیزدن بیر یاردیم گلمهسه ده أن آزی محبت و شفقتیمیزی اسیرگهمهمیشیک، اسیرگهمهریک آما قارشیلیق نه آلدیق؟ خوی مقدورلارینا تورکلر و آذربایجانلیدان باشقا جیددی یاردیما گلن اولمادی. ایران دولتی تورکیه و آذربایجانین یاردیم اؤنَریلرینی رد ائتدی و ایران- فارس آیدینلاری و مئدیاسی بو سورونو جیددییه آلمادی. خوی زلزلهسینین آردیندان تورکیهده باش وئرن چوخ داها بؤیوک و وهیم(قۏرخونج) زلزله سارسیلمیش روحلاریمیزی بیرداها دریندن سارسیدیب جانلاریمیزی یاخدی. دونیانین باشاباشیندان تسللی مئساژلاری و یاردیملار گلمهیه باشلادی. هر کسدن اؤنجه و هرکسدن داها چوخ آذربایجان جمهوریتی و تورک دولت- ملتلر سفر بر اولدولار. مسلمان ملتلر و دولتلر، هر زمان اومید ائولری اولان تورکیهیه اوزولمه یانینداییق مئساژی وئردیلر، یاردیما باشلادیلار. پاکستان جان قارداشینین یانیندا دوردو قارداشجاسینا. اؤزو فلاکت ایچینده اولان افغانستانلیلار یاردیما گلمهیه کابل شهرینین هاوا لیمانینا توپلاندیلار. یوزلر بلکه مینلرجه تایسیز شفقت سیمگهسی اولان خبرلر و عکسلر دونیا مئدیاسیندا یایینلاندی. تورکیه ایله هر زمان گرگینلیک و سۏرون یاشایان یونان بئله بوتون سورونلارا رغماً خصومتی بیر کنارا بوراخیب تورکیهیه قارشی تام انسانی بیر شفقتله داورانمایا باشلایاراق محبت و یاردیم ألی اوزاتدی. عین حالدا تورکیه بؤیوک دولت- ملتی ایچی بوش و یالان غرورا توتونماییب بوتون یاردیملاری دَیَرلَندیریب قبول ائتدی. چون بو بؤیوک دولت- ملت هر زمان شفقت سیمگهسی اولموشدور، اؤزللیکله تورک و مسلمان ملتلره. آما بوتون بونلار یاشانارکن، ایران- فارس شعوبیچیلیگی انسانی اخلاقدان تماماً آرینیب دونیانین أن چیرکین فاشیسمینه مبتلا اولدوغونو بیر داها گؤز اؤنۆنه سرگیلهدی. بونلارین أن دموکرات و أن مدنیتلیسی بئله، تورکیهده باش وئرن بو فلاکتدن آز دا اولسا سئویندیگینی گیزلهدهبیلمهییب “بو بلا اردوغانین تنبیهیدیر” کیمی رذالت دولو ساچما پروپاگاندالار یایماغا باشلادیلار.
بو اولایلار بیر طرفدن اورتا دوغونون أن بؤیوک بلاسینین ایران- فارس فاشیسمی اولدوغو و بیزیمله بونلارین چوخ داها بؤیوک سورونلار یاشایاجاغیمیزی اثبات ائتدی. دیگر طرفدن ده بوتون ضررلریایله بیرلیکده بیزی بیزلشدیرمهیه دوغرو بؤیوک بیر آددیم اولدو. بونلاری گؤروب، دویوب درس آلمایانلار نه زمان اوزلرینه گلهجکلر گورهسن؟
سیدمرتضی حسینی