مرحوم رضا براهینینین آذربایجانا او قدر ربطی وارکی، ساعدینین، جواد مجابینین، بهمن فرسینین ربطی وار. حتی بیراز دا ایرهلی گئدیرم، بیر چوخ انسانلار بو تحلیلله چیخیش ائدیرلرکی، براهنی تورکجه یازماسا دا، آذربایجان محیطینی یازمیشدیر. بو قاعده ایله ده ائتنیک اولاراق کورد اولان یاشار کمال دا تورکیه ده، آنادولوداکی کوردلرین حیاتینی تورک دیلینده تصویره چکمیشدیر. یاشار کمالین کورد ادبیاتینا نه قدر ربطی وارسا، براهنینین ده تورک ادبیاتینا او قدر دخلی واردیر. آنجاق یاشار کمالی تورک ادبیاتینین ایچینده، براهینی ده فارس ادبیاتینا عایددیر. عباس معروفی مشهور رومانی«سمفونی مردگان» اردبیلده باش اولان حیاتلاری روایت ائدیر. آنجاق عباس معروفی بیر فارس اولاراق، فارس دیلی یازیچیسیدیر.
۲_ رضا براهینی «زبان مادریم را قورت دادم» کیمی سمبولیک بیر جملهنی هر یئرده تکرارلاییر، اوندان بیر تروما کیمی دانیشیر. حالبوکی مرحوم وجودی تروما کیمی دئدیی وضعیته هئچ بیر ایش گؤرمور. گویا زبان مادری دئدییی ادبیاتدان و دیلدن باشقا بیر شئیدیر. آنادیلی مسئلهسینده، بوینوندا اولان مسئولیتی آیری گروهلارین باشینا آتیر. براهنی تورکیهده تحصیل آلیب یاشامیشدیر. اگر تورکجهنی بیلیردیسه، نیه او دیلده یازماییب و تلویزیون و قورولتایداکی شعارلارلا اؤزونو ارضا ائدیب، اگر بیلمیردیسه، اؤز دئدیگی کیمی ان پروبلماتیک مضوعسونون نیه دالیسینی توتوب و اؤیرهنمه ییبدیر؟ اگر بو دیلی باشارمیردیسا، هانسی تخصصه دایاناراق تورکجهنی فارسجا ایله قیاسلاییب، توتوتشدوروب، فارس دیلینین تورک دیلیندن داها گؤزل، داها گوجلو اولدوغونو ادعا ائدیر. بیر ده کی اؤز دیلینی اؤیرنمهیه نیه چالیشماییب؟ ایندی بیزیم دیلیمیزده بو قدر انسان یازیر، بونلارین هئچ بیریسی تورکجهنی رسمی تحصیلدن اؤیرنمهمیشلر.
۳_ شجریان اؤلمهمیشدن قاباق دئسهیدیکی کئشگه ایراندا آیری اتنیکلرینده موسیقیسینده ایفا ائتسهیدیم، او شجریانین نیسگیلیدیر. ائتنیک موسیقی سینه باغلیلیغی و ارتباطی دئییل. براهینی آسمیلاسیونون قاباغیندا دیز چؤکموش، اؤز دئدییی سلطه دیلینه مغلوب گلمیش بیر یازیچیدیر. اؤزو دئیریکی من سهو ائدیب سیزین دیلینیزده«فارس» یازمیشام. براهنی آذربایجان یازیسینا عبرت سمبولودور. اؤزگلشمه، بیگانهلیک و اودوزماغین سمبولودور.
براهنینی ان چوخ سلطنت طلبلر چیرپیردی، اونا حملهلر ائدیردیلر. بو بیزی آلداتمامالیدیر. اونلار براهنینی آن چوخ سولچولوغو، ایران انقلابی طرفدارلیغی و آیت الله خمینی_یه یازدیغی نامه سینه گؤره اوندان نفرت ائدیرلر. آذربایجانچیلیغینا گؤره دئییل.
بیزدهکی سولچو باخیش دا بوندان استفاده ائدیر و عمومی ذهنیتی ائله جایدیریرکی گویا براهنی آذربایجانین سمبولودور اونا گؤره اونا نفرت هجمهسی یارانیر. حالبوکی سببلر تمامن آیریدیر. بیر ده بو سول باخیشین براهنیله یاناشماسیندا صیرف رومانتیک، شاعرانه، سمبولیزه اولموش متنلر وار. بو یاناشمادا بیر قورخو وار. براهنی ایله گئرچک بیر یاناشما قورخوسو. بو رومانتیک یاناشمالاردان بیر نوعو براهینینی بیر فرد اولاراق نیسگیل نمونهسی گؤسترمکدیر. رضا براهنی بیر عمر غربین امکاناتی ایچینده یاشایییب فارسجا بؤیوک اثرلر یارادیب. حیاتی چوخ دا نیسگیللی ساییلماز. ایراندا یاشانیلان نورمال عؤموردن ده چوخ یاشایییبدیر. آنجاق کلاسیک سول رفتاری اولان بو رومانتیک و فردی نیسگیلی اورتایا سرگیلمک اونون اجتماعی ساحهسینه توخونماقدان قورخماق، اؤرت_باس ائلهمکدیر.
دومان اردم