منیم اوچون، ایلک باشدا بو بیر یاشلی اینسانین شکیلیدیر. هر بیریمیزین یاشلی آتا آناسی کیمی. دوشوننده کی، جناب براهنی نین ۸۶ یاشی وار، قبول ائلهمک لازیمدیر کی، چوخ دا یاخشی قالیبدیر. بیر چوخوموزون اییرمی یا اوتوز ایلدن سونرا بو شکیله بنزر بیر وضعیتده اولاجاغیمیزی تصور ائلهمک، او قدر ده چتین دئییل. هله قالسین کی، براهنی بی هر زامان اولدوغو کیمی بو شکیلده ده اولدوقجا یاراشیقلیدیر. هر یازارین ایستهدییی کلاسیک بیر فوتوگرافدیر بو عکس، منجه. تولستوی، داستایوفسکینین ده بنزر شکیللری وار.
هر اینسان یاشلاندیقجا، جاوانلیغی ایله فرقلنمهسی غایت نورمال و طبیعیدیر. ذاتا بئله اولماسا، قوجالیغین آنلامی بئله قالماز. دولاییسیلا بیر یاشلی اینسانین، شکیلدکی وضعیتینه بارماق قویوب، باشقالارینا عیبرت درسی وئرمک، تحقیر و غئیری اخلاقی بیر ایشدیر.
براهنی جنابلاری، بؤیوک بیر یازاردیر. کؤنول ایستردی کی، اثرلری اؤز آنادیلینده اولسون. هر چند کی، او اثرلرینده هر زامان مرکزچییلیی ائلیشدیریب و سون ایللرده ده بو موضعی اوچون هزینهلره معروض قالیبدیر، آنجاق اثرلرینین فارسجا اولماسی، گئنه تنقید اولمالیدیر. آمما سؤز تنقیدین نئجه اولماسیندادیر؟!
بو کئچرلی تنقیدی بهانه ائدیب، بیر اینسانین (هر کیم اولور اولسون) قوجالیق ظاهیریندن نتیجه/درس چیخارتماق، مدنیتسیزلیک و بوتون یاشلیلارا ایهانتدیر. دوزگون و مدنی تنقید، اینسانلارین اثری و فیکیرلری بارهده اولانلاردیر. اینسانلارین ظاهیری، جینسیتی، فیزیکی جهتدن فونکسیون فرقلیلیکلری (علیللیگی)، خستهلییینی تنقیدین بیر پارچاسی ائتمک، تربیهسیزلیک و سوء نیت علامتی دیر. بو سادجه براهنی بارهده یوخ، علی خامنهاینین ده بئله انگللی اولماسینی هدف آلانلارا دا کئچرلیدیر.
بیلیندییی کیمی، براهنی جنابلارینین، یاشلیلیغی ایله برابر، آلزایمر خستهلیی وار و غوربتده یاشاییر. و البته کی، بونلار دا اولدوقجا یایغین و نورمال ساییلا بیلن وضعیتدیرلر.
او عیبرت درسی وئرنلردن بونو سوروشماق لازیم کی، ریضا براهنی، اثرلرینی تورکجه یازسایدی، شکیلی داها فرقلی می اولاجاقدی؟!
تورکجه یازسایدی، آلزایمری اولمازدی می؟! ائلهده خالق صاحیب چیخاجاق ایدی، غوربتده یاشامایاجاقدی و شکیلی سیز ایستهین کیمی اولاجاقدی؟!
بلکی داها یاخشیسی بئله سوروشماقدیر کی، بیر یاشلی اینسانین شکیلی نئجه اولمالیدیر کی، سیزه گؤره عاقبت بخیر اولدوغو ثبوت اولسون!؟!
دومان رادمهر