رحمتلیک “صمد سرداری نیا” جنابلارینی بیرینجی دفعه آذربایجان مدنیت اوجاغیندا گوردوم (۱۳۷۹)
اوجاق بیز اولان زامان، عموما مهندس تقوی نین ائوینده قورولاردی.
مالی باخیمدان دا من بیلدیییم قدر رحمتلیک حسن دمیرچی هامی دان چوخ حمایت ائدیردی.
چئشدیلی ساحه لرده حورمتلی اوستادلاریمیز دوکتور داشقین، فیض الهی ، ارک و … چیخیش ائدیب، مقاله لر اوخوردولار.
اوستاد انتصار شعر اوخوردو.. رحمتلیک حسن آذربایجان دا موسیقی اجرا ائدردی. بعضا بیز گنج لرده مقاله / یازی لاریمیزی اوخوردوق.
رحمتلیک سرداری نیا همیشه یئنی یازی لار ، یئنی آراشدیرمالار ایله چیخیش ائدیب، گنج لری ساوادلارندیرماغا چالیشاردی.
بیر گون ارتش خیاوانیندا گوردوم.
سوروشدو نه لر اوخویورسان نه لر یازیرسان؟
من “میللی یوروش و لیدئرلیک” مقاله سین یازمیشدیم کی آچیقلادیم.
اوستاد دا یئنی کیتابی اوچون حاضیرلادیغی یازی لاری ، نوت (فیش) لاری گوستردی.
قیسساجا تبریزده یارانان بیرینجی قوروم لار، موسسه لر دن دئدی.
تبریزین تاریخ بویو مدنیت مرکزی اولدوغوندان و اونون نه دن لریندن دانیشدی….
سونرالار او کیتاب ” تبریز شهر اولین ها” آدی ایله یاییلدی.
تقریبا هامی میز او کیتابی اوخوموشوق، یا ائتگی آلیب ، یازمیشیق.
بیر کیتاب کی آذربایجان تورک میللتی نین میللی غرور دویغوسون گوجلندیردی.
بیزی اوزوموزه داها چوخ تانیتدیردی ((میللی کیملیک و هویت)).
رحمتلیک سرداری نیا همیشه تحقیق، مطالعه حالیندا ایدی.
چالیشاردی بیز گنج لری ده ترغیب ائتسین یازیب، اوخوماغا…
آما او رحتملیک یالنیز آراشدیرماچلیق ساحه سینده یوخ، بلکه یاشام طرزی ایله ده بیزلره معللیم ایدی.
بیر ادعاسیز ، چوخ متواضع ، شخصیت لی، گولر اوزلو اوستاد.
هامی میز او سایغین اوستادیمیزی چوخ سئوردیک….
او بیر جئنتئلمن آذربایجان چی یازار ایدی.
تاسسوفله چوخ تئز آرامیزدان گئتدی.
روحو شاد، یئری جنت اولسون
((۱۳۲۶/۲/۲۱_۱۳۸۷/۱/۲۲))
رسول معینی راد